kraamaat@gmail.com
+ +92 333-430-6384


تعلیمی ادارے،اسیں تے کرونا ـــ٭رویل کالم٭


رانا محمد رضوان خان August 07, 2020


تعلیمی ادارے،اسیں تے کرونا ـــ٭رویل کالم٭

رانا محمد رضوان خان

کرونا پاروں جتھے ہور بہت سارے ملکی ادارے تباہی دے دہانے اُتے اپڑ گئے نیں اوتھے پرایویٹ تعلیمی ادارے وی اپنی بقا دی جنگ بغیر کسے سامان تے حکومتی غفلت کارن ہارن ای والے نیں۔مندے بھاگاں نال ساڈے ملک وچ پہلے ای تعلیم کسے وی حکومت دی پہلی ترجیح نہیں رہی تے وباء دے دناں وچ تے ممکن ہو وی نہیں سکدی،کیوں جے ہر اک نوں اپنی جان دے لالے پئے ہوئے نیں۔

چالو صورتحال تعلیم لئی تیزی نال کسے وی وڈے دُکھانت ول ودھ رہی اے،جیہدے نال تقریبن 90فیصد پرایویٹ سکول متاثر ہون گے۔ جے حکومت تے وزارت تعلیم دا رویا ایہو رہیا تے سال دے اخیر تک ادھے سکول جو مہینا پنج ہزار رُپئے توں گھٹ فیس لیندے نیں، بند ہو جان گے۔ویکھیا جاوے تے جیہڑے سکولاں دا تعلیمی سال مارچ یاں اپریل توں شروع ہوندا اے، اک تے اوتھے نویں داخلے نہیں ہو سکے اُتوں بُہتے ماں پیو بالاں دیاں فیساں بھرن توں قاصرنیں۔ ایس ویلے حقیقی تصویر ایہ اے کہ اٹھواں مہینا شروع اے پر ایہناں اداریاں نوں اک مہینے دی فیس وی پوری نہیں ملی۔اصل وچ پرایویٹ تعلیمی اداریاں نے کدی حکومت ول کسے رعایت لئی نہیں ویکھیا سگوں کُجھ تعلیم فروش اداریاں توں وکھ باقی کئی تعلیمی ادارے عملن اپنی آئینی ذمے واری چنگے ڈھنگ نال نبھاندے وکھالی دیندے نیں پر ایس بحران وچ جتھے حکومت تعمیراتی،ٹیکسٹایل تے دوجے ہور شعبیاں نوں غیر معمولی سہولتاں دیندے ہوئے قانون تک نوں نظر انداز کر رہی اے، کالے دھن لئی ایمنسٹی سکیماں دِتیاں جا رہیاں، قومانتری امداد آ رہی اے پر مندے بھاگاں نال پورے ملک وچ صرف اک ای شعبے نوں قربان کیتا جا رہیا اے جو کہ پنج ہزار توں گھٹ فیس لین والے 90فیصد پرایویٹ سکول تے کالج نیں۔میری حکومت توں اپیل اے کہ ایس شعبے نوں بیگانا نہ سمجھے سگوں پنجاہ لکھ لوکاں دا روزگار تے تن کروڑ بالاں دا مستقبل سمجھیا جائے تے ایس مقدس شعبے دی چھیتی مدد کیتی جائے۔ ایس بارے کُجھ تجویزاں حاضر نیں جو نہ صرف عمل جوگ نیں سگوں ایس اوکھے ویلے وچ چنگی حکمت عملی وی نیں۔

1۔نجی تعلیمی ادارا سکول ہوئے یاں مدرسہ،کالج ہوئے یاں یونیورسٹی،جہدے بارے کسے وی قسم دا فیصلا کرنا ضروری ہوئے، اوہدے نمایندے نوں تناسب نال رلتی کیتا جائے تاں جے زمینی حقایق تے اصل صورتحال نوں مُکھ رکھدے ہوئے فیصلے کیتے جا سکن۔

2۔ خاص طور اُتے سکول کھولن نہ کھولن بارے صحت دے ماہراں،کرونا بارے ملکی آنکڑیاں تے ہور ملکاں دے طریقا کار نوں مُکھ رکھیا جائے۔

3۔گھر بیٹھے بال جو تعلیم توں دور ہو رہے نیں ضروری اے کہ مستقل سکول بند کرن دی بجائے اوہناں لئی سکولاں نوں پابند کیتا جائے کہ چنگے ڈھنگ نال آن لاین پڑھائی دا سلسلا شروع کر ن تاں جے ماں پیو فیس وی دین تے سکول سٹاف نوں ویلے سِر تنخاہ وی مل سکے۔تے جتھے ممکن ہوئے ایس او پی بنا کے سکول تے کالج وی کھول دِتے جان۔

4۔فیصلا کردے ہوئے بُہتیاں فیساں لین والے سکولاں تے کالجاں لئی وکھ تے سمال میڈیم اداریاں دااُچیچا خیال رکھیا جائے۔

5۔نِکے سکول سبھ توں ودھ متاثر وی نیں تے اوہ غریب بالاں نوں سبھ توں ودھ رعایت وی دے رہے نیں، اوہناں نوں واضح ریلیف پیکج دتا جائے۔

6۔فیساں دی وصولی نہ ہون دے برابر اے سگوں ہُن تیکر بقایاجات وی ودھ گئے نیں جو ہور ودھن گے،اِنج دی صورتحال وچ بنکاں نوں ہدایت کیتی جائے کہ اوہ تعلیمی اداریاں نوں بنا سود دے سوکھیاں شرطاں اُتے قرضے دین تاں جے ادارے اک سال تیکر اپنے سسٹم نوں چلا سکن۔

7۔پنج ہزار توں گھٹ فیس والے سکولاں کول ہن عمارتاں دے کرایے،اُستاداں تے سٹاف دیاں تنخاہواں تے ہور خرچیاں لئی پیسے نہیں تے اوہناں نوں ریلیف پیکج تے چالو ورھے لئی ہر طرحاں دے ٹیکس توں چھوٹ دتی جائے۔

8۔امتحانی بورڈاں نے امتحانی فیس لئی ارباں رُپئے لئے نیں جیہڑے ورتے نہیں گئے،ایہناں پیسیاں تے ہور سرمائے نوں ورتدے ہوئے بالاں دے وڈی پدھر اُتے ٹیسٹ کیتے جان تے اوہناں دی قوت مدافعت ودھان لئی اقدامات کیتے جان۔

9۔سرکاری سکولاں دے معیار نوں اُچا کردے ہوئے موثر حکمت عملی اپنائی جائے تاں جے وڈی گنتی وچ پرایویٹ سکول تے کالج بند ہون تے تعلیمی ادارے کُھلن مگروں بالاں تے پڑھیاراں نوں ایڈجسٹ کیتا جاسکے۔

بے شک تعلیم کسے وی قوم دی ترقی تے پکی بنیاد دا اہم حصا اے۔ایہنوں اِنج مندے حالاں تے حالات دے رحم و کرم اُتے نہیں چھڈیا جا سکدا۔

کُجھ کرو رب لئی۔۔۔!

ایہ نہ ہوئے کہ بہت کویل ہو جائے