اداکارعدنان صدیقی اپنے بالپن دے ویلے نُوں یاد کرن لگے ……٭رویل نیوز٭

لاہور (رویل نیوز) جگت پدھر تے نامنا کھٹن والے اداکار عدنان صدیقی دا کہنا اے کہ اوہناں دے والد کہندے سن کہ جتھے انسان دا بچپن لنگھیا ہووے اوہ اوس تھاں نُوں کدی بھُل نہیں سکدا۔ اداکار نے فوٹو تے ویڈیو شیئرنگ ایپ انسٹا گرام اُتے اپنے بچپن دیاں یادگار تصویراں شیئر کردیاں ہویاں نال ای اوہناں دی تفصیل وی دَسی۔ اداکار دا کہنا سی کہ ”ایس البم دا میرے نال ہونا جویں بچپن دامیری زندگی وچ پرت آن وانگوں اے‘ ایس البم نُوں ویکھدیاں ہویاں کئی پرانیاں یاداں مِلیاں نیں جہناں وِچوں اِک میں اپنے والد دی کہانی تہاڈے ساریاں نال شیئر کرداآں۔‘ اداکار نے دَسیا کہ اوہناں دے والد تقسیم ہند دے بعد یوپی توں پاکستان ہجرت کر کے پہنچے‘ عدنان صدیقی نے کہیا کہ والد ہمیشا بھارت دیاں تے اپنے بچپن دیاں گلاں کردے سن تے اسیں اوہناں نُوں کہندے ساں کہ تہانوں ایتھے آیا اِک عرصا لنگھ گیا پر تُسیں فیر وی بھارت دیاں گلاں کردے او۔‘ عدنان صدیقی دے ایس شکوے دے جواب وچ اوہناں دے والد دا جواب انتہائی پُر اثر ہوندا سی جہڑا عدنان اج تک نہیں بھُلا پائے کہ ”جہڑی تھاں تُہاڈا بچپن لنگھیا ہوندا اے‘ اوہ تھاں نہیں بھُلائی جاندی تے میرا بچپن بھارت وچ لنگھیا اے