اَزادی دے حوالے نال اِک نظم ــــ٭رویل٭

جتھے چرخاکتن والیاں

ہجر وچھوڑے کتن

جتھے جمدیاں نال نمانے

زہر دے چھَنے چٹن

جتھے پگ سنبھالن والے

پیریں پگاں رولن

کنک اساڈے کھیت دی کھا کے

بولی غیر دی بولن

جتھے گھر دی سردل اتے

رَت اسمانوں وسے

جتھے گلیاں انھیاں ہوون

رستاکوئی نہ دسے

جتھے ہڈیاں بھر بھر ڈگن

اتھرو سُٹن ماواں

جتھے ہوکے دین دہائی

اندروں نکلن ہاواں

اوتھے دسو کہدے لئی میں گیت خشی دے گاواں

کاہدا میں آذاد آں لوکو کاہدے جشن مناواں

جس دھرتی تے جنت بیٹھی

دوزخ وانگر سڑدی

رحمت دا سر ننگا ویکھ کے

کجنوں دُنیا ڈردی

جتھے دن دے چانن اندر

رات دے نھیرے نچن

اگ برود دے بھانبڑ اندر

سفنے اَکھ دے مچن

جتھے ساہواں گروی رکھ کے

اپنا ماس بچاون

جتھے بھکھ مکاون خاطر

لوکی موہرا کھاون

اس دھرتی تے کہڑے جھنڈے دسو میں لہراواں

کاہدا میں آزاد آں لوکو کاہدے جشن مناواں ۔۔۔۔۔۔!

٭٭٭٭٭