قومی گیت

اکرم ریحان

میں دھرتی دا گھبرو پُتر دھرتی میری ماں

ایسے کارن ایہدی دھپ وی لگدی مینوں چھاں

میں دھرتی دا گھبرو پُتر دھرتی میری ماں

سونے ورگی دھرتی کھِڑدے چاندی ورگے پُھل

ساراجٙگ وی اس دھرتی دا بن نہیں سکدا مُل

پیار پریتاں دے وچ گُھجّے اس دے شہر گراں

میں دھرتی دا گھبرو پُتر دھرتی میری ماں

دیس مرے دی دھرتی اُتّے وگدے پانی پنج

آپس دے وچ رل کے جسراں کھیڈن ہانی پنج

جنّت دا اک ٹوٹا جاپے ایہدی ہر اک تھاں

میں دھرتی دا گھبرو پُتر دھرتی میری ماں

اس دھرتی نے دُلّا جمیا ،جمیا جگّا جٹ

ویری ولّے ویکھ لوون جے مُچھ نوں دے کے وٹ

کھلے کھلوتے ویری یارو کر جاندے نیں بھاں

میں دھرتی دا گھبرو پُتر دھرتی میری ماں

اوئے شریرا شر دے تُخما کھول کے سن لے کن

جد تک رہنا امبر سر تے انبر اُتّے چن

رہنا دنیا دے نقشے تے دیس مرے دا ناں

میں دھرتی دا گھبرو پُتر دھرتی ماں

مولا موڑ لیا توں ایتھے امناں والی رُت

تیرے اگّے عرضاں کردے دھرتی ماں دے پُت

شالا کنیں پین ہمیشا خبراں خیر دیاں

میں دھرتی دا گھبرو پُتر دھرتی میری ماں

چیتر چیتر رُتاں ایتھے سنگھنے ساوے رُکھ

نگری نگری خُشیاں نچّن گِدھا پاون سُکھ

اس دھرتی دی اکرم جیؔ میں کیہ کیہ صفت کراں

میں دھرتی دا گھبرو پُتر دھرتی میری ماں