کشمیر وچ بنیادی حقاں تے انسانی ہمدردی دی صورتحال خراب نوں روکن لئی عمران خان تے  صدر وولکن بوزکر دی ملاقات ……٭رویل نیوز٭

اسلام باد (نمایندا رویل) وزیراعظم عمران خان نال اقوام متحدا جنرل اسمبلی دے نو یں چُنے گئے صدر وولکن بوزکر نے ملاقات کیتی اے‘ وزیراعظم نے وولکن بوزکر نُوں اقوام متحدا جنرل اسمبلی دے 75 ویں سیشن دے صدر دے طور اُتے انتخاب اُتے مبارکباد پیش کیتی۔ ملاقات وچ وزیراعظم نے اقوام متحدا دے جنرل اسمبلی دے صدر نُوں مقبوضا کشمیر دی سنگین صورتحال بارے اگاہ کیتا جو کہ اقوام متحدا سلامتی کونسل دے ایجنڈے وچ 7 دہاکیاں پرانا مسئلا شامل اے‘ وزیراعظم نے اوہناں نُوں دَسیا کہ 5 اگست 2019 دے بعد توں مقبوضا کشمیر وچ انسانی حقاں تے انسانی ہمدردی دی صورتحال انتہائی سنگین اے ایہدے نال نال کشمیری لوکائی دے حقاں دی منظم انداز وچ خلاف ورزی دا سلسلا جاری اے تے مقبوضا وادی دی حیثیت نُوں تبدیل کرن دی کوشش کیتی جا رہی اے اوہناں نے ایہ گل زور دے کے کہی کہ اقوام متحدا نُوں سنگین صورتحال دے حل وچ اپنا کردار ادا کرنا چاہیدا اے تے ایہنوں یقینی بنایا جاوے کہ کشمیری لوکائی نُوں اوہناں دا مُڈھلا حقدِتا جاوے جہدے اُتے اقوام متحدا دی سلامتی کونسل دیاں سنبندھتقرار داداں وچ اوہناں نال وعدا کیتا گیا اے‘ وزیراعظم نے اوہناں نُوں اپنی حکومت ولوں کرونا وباء اُتے قابو پان تے ایہدے سماجی تے اقتصادی اثرات نال نبڑن لئی اقدامات بارے اگاہ کیتا جہدے وچ انسانی جاناں دے بچاء‘ روزگار نُوں محفوظ بنانا تے معیشت دا بچاء پہلی ترجیح وچ شامل سی‘ اوہناں نے دَسیا کہ اوہناں دی حکومت نے غریب تے لوڑ مند بندیاں لئی 8 ارب ڈالر دا بیل آؤٹ پیکج دِتا جو کہ پاکستان دی تواریخ وچ کسے وی حکومت ولوں بلند ترین سماجی سیکیورٹی پیکج سی‘ وزیراعظم نے ہور قرضا ریلیف بارے عالمی اقدام بارے اپنیاں تجویزاں بارے وی دسیا گیاتے ایہ گل زور دے کے کہی کہ ترقی پذیر ملکاں نُوں کرونا وایرس وباء دے سماجی تے اقتصادی اثرات توں بچان لئی وڈے پیمانے اُتے مالی مدددین دی ضرورت اے‘ وزیراعظم نے اوہناں نُوں اگاہ کیتا کہ اوہ ماحولیاتی تبدیلی‘ اسلام فوبیا تے ترقی پذیر ملکاں توں غیر قانونی مالیاتی رقماں دی منتقلی ورگے مسئلیاں نال نبڑن نُوں پہلی ترجیح دیندے نیں۔ اوہناں نے امید ظاہر کیتی کہ اقوام متحدا دے 75 ویں سیشن وچ ایہناں معاملات نُوں اُچیچدِتی جاوے گی۔