کرونا نال نِبڑن لئی پاکستان دیاں کوششاں توں سکھنا چاہیدا اے: وولکن بوز ……٭رویل نیوز٭

اسلام آباد (بیورو رپورٹ) اقوام متحدا دی جنرل اسمبلی دے نو منتخب صدر وولکن بوز کر نے کہیا اے کہ دنیا نُوں کرونا نال نبڑن لئی پاکستان دیاں کوششاں توں سِکھن دی ضرورت اے‘ کدی نہیں بھُل سکدا کہ ترکش شہری آں تے پاکستان دا بھرا آں‘ جنوبی ایشیاء وچ امن تے استحکام لئی مسئلا کشمیر دا حل ہونا ضروری اے‘ وزیراعظم عمران خان دے خیالاں توں متاثر ہویا‘ اوہ خطے تے دنیا وچ امن قایم کرن وچ دلچسپی رکھدے نیں‘ وزیراعظم تے اقوام متحدا دا نقطا نظر عالمی معاملات اُتے ای ای سمت وچ اے۔ اقوام متحدا جنرل اسمبلی دے صدر وولکن بوزکر دے نال سانجھی پریس کانفرنس دے دوران وزیر خارجا شاہ محمود قریشی نے کہیا کہ وولکن بوزکر نال ملاقات خوشگوار رہی اسیں اوہناں نُوں کرونا نال نبڑن لئی اقدامات افغانستان وچ امن دے قیام لئی پاکستان دے کردار تے مقبوضا کشمیر وچ انسانی حقاں دیاں خلاف ورزیاں بارے اگاہ کیتا۔ اوہناں نے کہیا کہ بھارت دے اِک پاسی اقدامات نال خطے نُوں درپیش خطریاں اُتے وی گلبات ہوئی تے بھارت ولوں سرحدی خلاف ورزی بارے وی دَسیا گیا اے‘ بھارت دے غیر قانونی اقدامات نال خطے دے امن نُوں خطرات لاحق نیں‘ 1 سال وچ سلامتی کونسل وچ مسئلا کشمیر 3 وار بحث ہیٹھ آنا بہت اہمیت دا حامل اے‘ ساڈی خاہش اے کہ جنرل اسمبلی وچ وی مسئلا کشمیر بحث ہیٹھ آئے۔ اوہناں نے ہور کہیا کہ پاکستان دا سیاسی نقشا عوامی امنگاں دا ترجمانا ے پاکستان نے نقشے وچ جونا گڑھ دی پوزیشن واضح کر دِتی اے۔ ایس موقع اُتے اقوام متحدا دے نومنتخب صدر وولکن بوزکر نے کہیا کہ پاکستان آ کے خُشی محسوس ہوئی‘ پاکستان نے بہترین انداز نال مجمانی کیتی‘ جنرل اسمبلی دے سیشن دی صدارت میرے لئی اعزاز اے‘ پروہنکاری اُتے پاکستانی حکام دا بہت شکر گزار آں‘ اقوام متحدا دے نقطا نظر نال ایہ دورا بہت ضروری سی پاکستان اقوام متحدا بہت متحرک رکن اے‘ پاکستان اقوام متحدا دے مشنز وچ ودھ چڑھ کے حصا لیندا اے میں اِک پاکستانی نُوں ڈپٹی چیف کیبنٹ وی چنیا اے۔ اوہناں نے کہیا کہ وزیر خارجا شاہ محمو د قریشی نال اہم امور بارے گلبات ہوئی‘ ایہدے علاوا وزیراعظم عمران خان نال وی ملاقات ہوئی‘ وزیراعظم عمران خان نے مقبوضا کشمیر بارے صورتحال توں اگاہ کیتا‘ ملاقات وچ وزیراعظم دے خیالاں توں متاثر ہویا۔ وولکن بوزکر نے کہیا کہ کرونا وایرس نال نبڑنا پوری دنیا دے ملکاں لئی چیلنج اے‘ پاکستان ایس عالمی وباء نال بہترین انداز نال نبڑیا‘ دنیا نُوں کرونا نال نبڑن لئی پاکستان دیاں کوششاں توں سکھن دی ضرورت اے‘ پاکستان وچ کرونا دی صورتحال بہتر اے‘ وباء دے خلاف پاکستان نے کئی ملکاں توں بُہتا چنگا کردار ادا کیتا اے‘ کرونا دے خلاف متحدا جدوجہد لئی سانوں وسایل دی ضرورت اے‘ کرونا دے کارن پاکستان وچ جانی نقصان اُتے افسوس اے‘ ایس ویلے کووڈ 19 سبھ توں وڈی ہیلتھ ایمرجنسی اے پاکستان دنیا لئی بہترین مثال بن کے ساہمنے آیا اے‘ ستمبر وچ کرونا دی صورتحال دا جایزا لواں گے جہدے وچ اہم کردار ادا کرن دی کوشش کراں گا۔ اِک سوال دے جواب وچ اوہناں نے کہیا کہ کدی نہیں بھُل سکدا کہ ترکش شہری آں تے پاکستان دابھرا آں‘ مسئلا کشمیر دے حوالے توں ترک حکومت دا اصولی تے دو ٹوک مؤقف اے‘ عالمی سطح اُتے جھیڑیاں تے ہور چیلنج دا ساہمنا اے‘ جنوبی ایشیا وچ امن تے استحکام لئی مسئلا کشمیر دا حل ہونا ضروری اے‘ کشمیر دے بارے وچ سلامتی کونسل دیاں قرار داداں موجود نیں۔