جے ووٹ نُوں عزت مل جاندی تے پاکستان دی دنیا وچ جگ ہنسائی نہ ہوندی: آگو مسلم لیگ ن مریم نواز ……٭رویل نیوز٭

لاہور (نمایندا رویل) آگو مسلم لیگ ن مریم نواز نے کہیا اے کہ پارٹی دا اِک ای بیانیا اے ووٹ نُوں عزت دوو‘ نواز شریف دے بیانیے دی قیمت 4 سال توں ادا کر رہے آں پر پچھے نہیں ہٹے‘ میاں نواز شریف نے اپنے حصے دا کم کر دِتا اے‘ نیب دا کردار بہت گھناؤنا اے تے انتقامی کارروائیاں دے بعد نیب ہُن آپ اِک مطلوب ادارا بن گیا اے‘ میرے لئی بولنا سوکھا اے تے چُپ رہنا مشککل اے‘ کدی اسیں بول کے ایہناں نُوں ایکسپوز کیتا‘ کدی چُپ رہ کے ایہناں نُوں بُہتا ایکسپوز کیتا‘ عمران خان نُوں پہلے آن دا شوق سی ہُن جان دا خوف اے‘ جعلی کیس بنا کے پہلے وی کجھ حاصل نہیں ہویا تے نہ ای ہُن کجھ حاصل ہووے گا۔ ایہناں خیالاں دا اظہار اوہناں نے نیب دفتر دے باہر مسلم لیگ ن تے پولیس وچکار ہنگامی آرائی کارن پیشی منسوخ ہون دے بعد ماڈل ٹاؤن وچ مسلم لیگ ن دے آگوواں نال پریس کانفرنس وچ کیتا۔ اوہناں نے کہیا کہ جس طرحاں پرامن تے نہتے کارکناں اُتے پتھر برسائے گئے‘ سپرے کیتا گیا‘ اتھرو گیس سُٹی گئی ایہدے نال کئی کارکنان زخمی ہوئے میں ایہدی بھرویں نندیا کردی آں تے مسلم لیگ ن دے جہڑے کارکنان میرے نال اکسُرتا دے اظہار لئی جبر دا ساہمنا کردے اوتھے کھلوتے رہے اوہناں نُوں سلام پیش کردی آں۔ اوہناں نے کہیا کہ جدوں میری گڈی نیب دفتر دے نیڑے پہنچی اوس ویلے مینوں پتا نہیں سی کہ دوجے پاسے لوکائی دا سمندر موجود اے تے اچانک اتھرو گیس دی شیلنگ شروع ہو گئی جہدے کارن گڈی نال موجود لوک دور ہٹ گئے تے گڈی کلی ہو گئی۔ ایسے اثناء وچ نیب دفتر دے بلکل ساہمنے‘ رکاوٹاں دے پِچھوں میری گڈی اُتے پتھراؤ ہویا‘ میری گڈی بلٹ پروف سی ایہدے باوجود ونڈو سکرین ٹُٹ گئی تے سیکیورٹی گارڈز نے بغیر کسے حفاظتی شیواں دے گڈی دے ساہمنے کھلو کے میری حفاظت کیتی۔ آگو مسلم لیگ (ن) نے کہیا کہ نیب ولوں جاری اعلامیے وچ میڈیا راہیں ایہ تاثر دین دی کوشش کیتی گئی کہ جہڑی زمین میں خریدی سی اوس زمین اُتے قبضا کیتا سی پر نیب دے طلبی دے نوٹس وچ کوئی ایہو جہیا الزام موجود نہیں سی۔ اوہناں نے نیب ولوں جاری نوٹس پڑھ کے سناندیاں ہویاں کہیا کہ ایہدے وچ الزام کوئی نہیں اے‘ بہت مبہم رکھیا گیا اے کیوں جے مینوں بلانا مقصود سی تے ہُن میں ایہ کہن وچ حق اُتے آں کہ مینوں بلان پچھے مینوں نقصان پہنچانا مقصود سی کیوں جے اج میرے نال سلوک کیتا گیا‘ میں پاکستان دے 72 سالاں وچ ایہ ہوندیاں نہیں ویکھیا۔ اوہناں نے کہیا کہ اج پرویز رشید صاحب میری گڈی وچ سن تے جدوں ونڈو سکرین اُتے حملا ہویا تے اوہناں نے کہیا کہ شکرو کرو ایہ بلٹ پروف گڈی سی‘ جے ایہ بلٹ پروف گڈی نہ ہوندی تے شیشا ٹُٹدا تے ایہدے بعد پتھر میرے سر اُتے وجدے کیوں جے میں فرنٹ سیٹ اُتے بیٹھی ہوئی سی جے ایہ بلٹ پروف گڈی نہ ہوندی تے ساہمنیوں پولیس دی وردی وچ ملبوس بندے جہڑے میری گڈی اُتے پتھر سُٹ رہے سن مینوں نہیں پتا کہ پولیس والے سن یاں نہیں پر اوہ پولیس دی وردی وچ سن تے پنجاب پولیس عمومن انج نہیں کردی۔ مریم نواز نے کہیا کہ انتقامی کارروائیاں دے بعد نیب ہُن آپ اِک مطلوب ادارا اے‘ نیب دا کردار بہت گھناؤنا اے‘ نیب پولیٹیکل انجینئرنگ تے جوڑ توڑ دا ادارا بن چُکیا اے۔ نیب دے ساہمنے پیش نہ ہونا شاید قانون دی بُہتی پاسداری ہووے گی حکومت نُوں ہر محاذ اُتے ناکامی دا ساہمنا اے‘ عمران خان نُوں اقتدار وچ آن دا بہت شوق سی‘ عمران خان نُوں ہُن جان دا خوف اے‘ عمران خان جنے ظلم کر چکے نیں‘ اوہناں نُوں ہُن اپنے انجام توں خوف آندا اے۔ اوہناں نے کہیا کہ حکومت نُوں نواز شریف اُتے رحم نہیں آیا سی ایہناں نُوں اپنے اُتے رحم آیا‘ تہاڈے اپنے وزیراں نے کہیا نواز شریف دی صحت ٹھیک نہیں‘ تُسیں نواز شریف دی صحت اُتے سیاست کیتی‘ نواز شریف ایہناں دی تحویل وچ بیمار ہوئے‘ حکومت نے اپنے آپ نُوں بچان لئی نواز شریف نُوں باہر گھلیا۔ مریم نواز نے کہیا کہ ایہ نواز شریف دا بیانیا نہیں ایہ ساڈے آئین دا بیانیا اے‘ پارٹی دے سارے آگو نواز شریف دی قیادت تے ووٹ نُوں عزت دوو اُتے متفق نیں۔ جے ووٹ نُوں عزت مل جاندی تے پاکستان دی دنیا وچ جگ ہنسائی نہ ہوندی۔ نواز شریف دی کوئی وی تصویر ساہمنے آندی اے تے ایہناں نُوں تکلیف ہوندی اے‘ساڈیاں نیب دیاں پیشیاں بہت خاموش ہویا کردیاں سن۔اوہناں کہیا کہ لیگی کارکناں نے رکاوٹاں ہٹا کے نیب دفتر جان دی کوشش کیتی تے پولیس نے اوہناں نُوں اگے جان توں روکیا جہدے اُتے لیگی کارکن بپھر گئے‘ اوہناں نے پولیس اُتے پتھراؤ کیتا تے ہتھا پائی وی ہوئی۔ پولیس نے لیگی کارکناں نوں منتشر کرن لئی اتھرو گیس دی بھاری شیلنگ کیتی‘ واٹر کینن تے لال مرچاں دے سپرے دا استعمال کیتا تے جوابی پتھراؤ وی کیتا جہدے نتیجے وچ کئی کارکن زخمی ہو گئے۔ نیب نے حالات دی خرابی دی وجھا توں مریم نواز دی پیشی منسوخ کر دِتی جہدے کارن مریم نواز نیب دفترتوں واپس رونا ہو گئے۔ نیب مطابق شر پسند عناصر ولوں جان بُجھ کے حالات خراب کرن وجوں پیشی منسوخ ہو گئی تے نویں تاریخ دا اعلان چھیتی کیتی جاوے گا۔ مریم نواز قافلے دے نال دُبارا واپس نیب آفس دے باہر پہنچ گئے جتھے اوہناں نے میڈیا نال گلبات کردیاں ہویاں کہیا کہ جواب دین آئی آں تے جواب دے کے ای جاواں گی۔ کجھ دیر بعد مریم نواز واپس رونا ہو گئے جہدے بعد پولیس نے علاقے وچ موجود لیگی کارکناں دی پکڑ دھکڑ شروع کر دِتی۔ پولیس نے 50 توں ودھ لیگی کارکناں نُوں گرفتار کر لیا اے۔