سمارٹ لاک ڈاؤن دے بعد مائیکرو سمارٹ لاک ڈاؤن کراں گے‘ احتیاط دی ضرورت اے:اسد عمر ……٭رویل نیوز٭

اسلام آباد (بیورو رپورٹ) وفاقی وزیر منصوبا بندی تے ترقی اسد عمر نے کہیا اے کہ سمارٹ لاک ڈاؤن دے بعد مائیکرو سمارٹ لاک ڈاؤن کراں گے‘ احتیاط دی ضرورت اے‘ بل گیٹس تے وولکن بوزکر نے وی پاکستان دی تعریف کیتی‘ ملک وچ کرونا وایرس بلکل ختم نہیں ہویا‘ کیسز وچ کمی اُتے کسے فتح دا اعلان نہیں کر رہے‘ جامع منصوبا بندی دے مثبت نتیجے ساہمنے آئے‘ وباء وچ کمی دے نال پابندیاں وی گھٹ کردے گئے‘ دھرکو اے کرونا وچ کمی دی فتح لا پرواہی نال شکست وچ نہ بدل جاوے۔ وفاقی وزیر اسد عمر نے میڈیا بریفنگ دیندیاں ہویاں کہیا کہ لوکاں ولوں سن رہیا آں کہ کرونا مُک گیا‘ کرونا وایرس بلکل وی ختم نہیں ہویا‘ پورے ملکو چ کرونا کیسز وچ کمی ہوئی اے‘ امپیریل کالج دی رپورٹ وچ کہیا گیا کہ پاکستان وچ 10 اگست نُوں بُہتیاں مَوتاں ہون گیاں تے 78 ہزار مَوتاں ہون گیاں‘ جو امپیریل نے کہیا اوہدے مقابلے وچ کل 15 مَوتاں ہوئیاں‘ ساڈے لئی ایہ 15 مَوتاں وی بُہتیاں تے افسوسناک نیں‘ اسیں کوئی فتح ڈکلیئر نہیں کر رہے‘ کرونا حالے مُکیا نہیں‘ ایس لئی اسیں ہتھ اُتے ہتھ رکھ کے نہیں بَہ سکدے۔ پاکستان وچ کل کیسز 2 لکھ 85 ہزار نیں‘ ٹریک ٹریس نال مجموعی طور اُتے 48 فیصد ٹیسٹ کیتے گئے تے 38 فیصد کیسز ایسے نظام دا نتیجا نیں‘ اِک بیمار بندے راہیں اسیں 10 لوکاں تک پہنچے آں۔ اوہناں نے کہیا کہ سمارٹ لاک ڈاؤن دے بعد مائیکرو سمارٹ لاک ڈاؤن ول جا رہے آں‘ ملٹی سٹوری بلڈنگ یاں کسے محلے وچ لاک ڈاؤن ول جا رہے آں ہُن اسیں لوکاں دی گھر وچ اکلاپے دی پالیسی بنا رہے آں۔