kraamaat@gmail.com
+ +92 333-430-6384


سِک مِتراں دی/حفیظ تائب


حفیظ تائب December 12, 2019


مُک گئی کالی رات غماں دی

کھِنڈ کھِنڈ پئی خشبو فجراں دی

چُپ چپیتی رُخصت ہوئی

دُنیا وچوں فصل خزاں دی

تَن مَن دے وچ چانن لگا

رنگ لیائی سِک مِتراں دی

اوس سمے وچ میں جا پُجا

ٹَپ کے کندھ چودہ صدیاں دی

اُس نوں غار حرا وچ ڈِٹھا

جس بدلی تقدیر دِناں دی

میں وی ٹوراں گل اوسے توں

جس تو ں ٹُردی گل کرما ں دی

فر ڈِٹھی اوہ ذات صفا تے

خالق ول خلق نوں بُلاندی

طائف دے لئی پھل پُھل منگے

جتھے بارش سی پتھراں دی

شیما بچپن دے وچ ویکھی

جس دے سر تے چھاں بدلاں دی

ارقم ؓ دے پُت زید ؓ نے ڈِٹھی

ہرنی کلمہ جہدا الاندی

لبھے کوئی مثال نہ جس دے

اُچے خلق تے سُچے نیا ں دی

علم ہے جس دے در دا نوکر

عقل ہے جس دے گھردی باندی

جس دا ذکر ہے لُوں لُوں کردا

جس دے گیت ہے نس نس گاندی

کدی نہ جس دی سخی طبعیت

مانگت نوں خالی پرتاندی

جس دی ذات گرامی تھاں تھاں

دو جگ وچ رحمت ورتاندی

جس دی نیویں نظر ازل توں

ہستی دا سینا دھڑکاندی

جس دی یاد مُبارک اَج وی

رُوحاں دے ویڑھے مہکاندی

جس دی نوری سیرت ہر دَم

سوچاں وچ گلزار کھڑاندی

جس دی دعوت رہی ہمیشا

عزماں دے بوہاں کھڑکاندی

اُس دی اُمت دی بے حالی

میتھوں تے نہیں ویکھی جاندی

سُن لے ربا! میرے ہاڑے

حل کر دے مشکل رُوحاں دی

فیر اُس چھیکڑلی اُمت نوں

بخش قیادت سبھ قوماں دی

میں شاعر کملی والے ؐ دا

منگاں خیر سبھ انسانا ں دی

شعر میرے نوں دے تاثیراں

تِکھی کر دے لَے درداں دی

ربّا!میریا سوہنیا ربّا!

روح میری اے ڈاہڈی ماندی

ڈاروں وچھڑی کونج دے وانگوں

جِند نمانی رہے کُرلاندی

میری قسمت وچ وی لکھ دے

دُھوڑ اوہناں روشن راہواں دی

پُھٹ پُھٹ پیندی جہناں وچوں

شوخی ہَولے پُھل قدما ں دی

مینوں وی اِک وار وکھا دے

اوہ وستی اپنے رنگاں دی

جالی پاک دے کول کھلو کے

ڈالی پیش کراں نعتاں دی

ایسے حالت دے وچ ٹُٹے

ڈوری تائب ؔ دے ساہواں دی

٭٭٭٭٭