مقبوضا کشمیر دی لوکائی نُوں کلا نہیں چھڈاں گے،‘ پاکستان افغانستان وچ امن چاہندا اے،پاکستان اک لمی جدو جہد بعدوں حاصل کیتا گیا اے:صدر مملکت ڈاکٹر عارف علوی ……٭رویل نیوز٭

اسلام آباد (نمایندا رویل) صدر مملکت ڈاکٹر عارف علوی نے کشمیریاں دی حمایت کردیاں ہویاں کہیا اے کہ مقبوضا کشمیر دی لوکائی نُوں کلا نہیں چھڈاں گے‘ اوہناں دی اخلاقی‘ سیاسی تے سفارتی حمایت جاری رکھاں گے‘ پاکستان دی کامیاب سفارتکاری دے کارن اقوام متحدا دے سیکرٹری جنرل‘ انسانی حقاں دیاں عالمی تنظیماں‘ چین‘ ترکی تے سعودی عرب سنے ہور دوست ملکاں نے مسئلا کشمیر اُتے پاکستان دے مؤقف دی حمایت کیتی اے‘ ہتھیار بند فوجاں تے پاکستانی قوم نے دہشتگردی دا بہادری نال مقابلا کیتا جہدے اُتے ایہناں نُوں خراج تحسین پیش کردا آں‘ افغانستان وچ امن لئی امن معاہدا اہم قدم اے‘ پاکستان افغانستان وچ امن چاہندا اے‘ سی پیک نال خطے وچ ترقی تے خشحالی دے نویں دور دا اغاز ہویا اے‘ کرونا وباء دے باوجود پاسکتان دے معاشی اشاریے مثبت راہ اُتے گامزن نیں‘ حکومت دیاں دانشمندانا پالیسیاں تے قوم دے تعاون نال کرونا وباء خلاف کامیابی ملی‘ پچھلے 2ورھیاں دے دوران حکومت تے قوم نے کرپشن دے خلاف علم اُچا کیتا۔ ایہناں خیالاں دا اظہار اوہناں نے 74 ویں ازادی دیہاڑ دی مرکزی تقریب نال خطاب کردیاں ہویاں کیتا۔ اوہناں نے کہیا کہ قوم نُوں 74 ویں ازادی دیہاڑ دی مبارکباد پیش کردا آں‘ 23 مارچ 1940 نُوں مسلماناں نے قرار داد مقاصد پاس کیتی‘ اوہ اِک خاب سی جہدی تکمیل 14 اگست 1947 نُوں ہوئی۔ پاکستان لمی جدوجہد دے بعد حاصل کیتا گیا جہدے بعد تکمیل پاکستان لئی ایس ملک نُوں حضرت محمد خاتم النبینؐ دی سنت‘ علاما اقبال تے قائداعظم دے خاباں دے مطابق بنان دی جدوجہد شروع ہوئی‘ ایہ جدوجہد اج وی جاری اے۔