پاک سرزمین دی ترقی تے خشحالی نُوں یقینی بنان لئی کوئی کسر نہیں چھڈی جاوے گی ،خُشحالی واسطے دُعاواں:وزیراعظم عمران خان……٭رویل نیوز٭

اسلام آباد (نمایندا رویل) مملکت خداد پاکستان دا 74 واں ازادی دیہاڑ ایس عزم دی تجدید نال منایا گیا کہ پاک سرزمین دی ترقی تے خشحالی نُوں یقینی بنان لئی کوئی کسر نہیں چھڈی جاوے گی‘ جشن ازای دیاں تقریباں دا اغاز صبح سویرے اسلام آباد سنے چاراں صوبائی دارلحکومتاں وچ توپاں دی سلامی نال ہویا۔ اسلام آباد وچ 31 تے لاہور دے محفوظ شہید گیریژن وچ 21 توپاں دی سلامی دِتی گئی‘ دن دا اغاز ملک و قوم دی سلامتی‘ ترقی تے خشحالی لئی خصوصی دُعاواں نال ہویا۔ ایس موقع اُتے علمائے کرام‘ مشائخ عظام تے مفتیان کرام نے مقبوضا کشمیر دے مظلوم مسلماناں دے حق وچ وی خصوصی دُعاواں کیتیاں۔ وزیراعظم عمران خان نے قوم نُوں 74 ویں ازادی دیہاڑ دی مبارکباد دیندیاں ہویاں کہیا اے کہ پاکستان اِک عظیم خاب دا ناں سی تے ایہ خاب بانیان پاکستان قائد اعظم محمد علی جناح تے علامہ اقبال دا سی‘ قائد دے اوس پاکستان ول ساڈا سفر شروع ہو چکیا اے جہڑے پاکستان وچ سارے شہریاں لئی قانون برابر تے اِک اسلامی فلاحی ریاست ہووے گی‘ اسیں کشمیریاں نُوں ہر سطح اُتے ہر طرحاں دا تعاون فراہم کردے رہواں گے۔ کشمیری بڑی بہادری نال بھارت دے غیر قانونی قبضے دا مقابلا کر رہے نیں‘ اوہناں نے ہور کہیا کہ کرونا صورتحال نال کامیابی نال نبڑن اُتے اپنی قوم نُوں مبارکباد پیش کردا آں۔ قوم دے ناں اپنے اِک ویڈیو پیغام وچ وزیراعظم عمران خان نے کہیا کہ خاب ایہ سی کہ اسیں پاکستان نُوں اسلامی فلاحی ریاست بنانا سی تے ایس ریاست دے اندر قانون دی اُچیرتا قایم کرنی سی‘ جتھے سارے انسان رنگ و نسل دے بغیر برابر ہونے سن تے ایہناں دے حقوق ریاست دی ذمے داری سی۔ اوہناں نے کہیا کہ اسیں اوس سفر ول نکلے ہوئے آں تے مینوں کوئی شک نہیں کہ انشاء اللہ اِک دن اوس منزل اُتے اسیں پہنچ جاواں گے پر ایہدے لئی جدوجہد کرنی پوے گی۔ گل نُوں جاری رکھدیاں ہویاں اوہناں نے کہیا کہ قوم نُوں میں دوجی مبارکباد ایہ دینا چاہندا آں کہ جس طرحاں قوم نے رَل کے کرونا وایرس دا مقابلا کیتا شاید ای کسے ہور نے ایس طرحاں بیلنس کیتا‘ شروع وچ سانوں خوف سی اِک پاسے لوک کرونا نال مرن گے جد کہ دوجے پاسے لاک ڈاؤن لان نال لوک بھُکھ نال مرن گے سانوں اللہ دا شکر ادا کرنا چاہیدا اے کہ اج کرونا دے کیسز تھلے تے معیشت اُتے جانا شروع ہو گئی اے پر ایہ نہیں کہ اسیں جنگ جت چکے آں‘ حالے وی چیلنجز ساہمنے نیں‘ سبھ توں وڈی احتیاط ایہ اے کہ اسیں جدوں باہر جائیے تے فیس ماسک پائیے کیوں جے ایہدے نال وباء دے کھلرن دے امکانات گھٹ ہو جاندے نیں۔ قوم نُوں تیجی مبارکباد دیندیاں ہویاں اوہناں نے کہیا کہ ساڈے 2 سال بہت مشکل لنگھے نیں پر ایہدے بعد ساڈی معیشت اُٹھنا شروع ہوئی اے‘ جس طرحاں سانوں حکومت ملی بہت مشکل حالات سن ساڈے کول غیر ملکی زرمبادلا نہیں سی‘ اسیں قرضیاں دیاں قسطاں نہیں دے سکدے ساں‘ شروع وچ اسیں دیوالیا وی ہو رہے ساں۔ اوہناں نے کہیا کہ ملک جے قرضیاں یاں واجبات اُتے دیوالیا ہو جاوے تے ملک اُتے بہت بُرے اثرات آندے نیں‘ ڈالر آنا گھٹ ہو جاندے نیں‘ رُپیا تھلے ڈِگدا اے تے ڈالر دی قیمت اُتے چلی جاندی اے جہدے کارن درآمد کیتیاں جان والیاں شیواں مہنگیاں ہو جاندیاں تے ملک وچ مہنگائی آ جاندی اے‘ اسیں بہت بُری مہنگائی توں بچے آں کیوں جے اسیں دیوالیا ہون توں بچ گئے ساں ایہدا ایہ مطلب نہیں کہ لوکاں دے حالات سوکھے سن‘ میں جاندا آں کہ لوکاں دے حالات مشکل سن تے ہیگے نیں پر خشخبری ایہ اے کہ حالات بہتر ہو رہے نیں۔ اپنے پیغام وچ اوہناں نے ہور کہیا کہ جے تُسیں ویکھنا اے کہ کاروباری برادری دا ملکی معیشت اُتے کنا اعتماد اے تے سٹاک مارکیٹ ویکھو‘ ساڈی مارکیٹ کامیابی نال ریکارڈ اُتے گئی اے‘ لوکاں دا اعتماد ودھنا شروع ہو گیا اے‘ اسیں تعمیراتی صنعت نُوں اوہ سہولتاں دِتیاں نیں جہڑیاں کدی پاکستان دی تواریخ وچ ایس شعبے نُوں نہیں ملیاں سن‘ تعمیراتی شعبے دے نال 40 صنعتاں اُتے اُٹھنا شروع ہوندیاں نیں جہدے نال لوکاں نُوں روزگار ملنا شروع ہو جاندا اے تے دولت ودھنی شروع ہو جاندی اے تے 2 کم ہوندے نیں اِک تے ٹیکس ودھنا شروع ہوندا اے تے اسیں ایس ٹیکے نُوں ہیٹھلے شعبے نُوں اُتے لیان لئی استعمال کر سکدے آں جد کہ دوجا ایہ کہ اسیں قرض واپس کر سکدے آں۔ اوہناں نے کہیا کہ جدوں سانوں اقتدار مِلیا تے 2 وڈے بھار سن‘ اِک ایہ کہ پچھلیاں حکومتاں نے قرضے لئے ہوئے سن‘ ایہدے اُتے پہلے سال جنا ٹیکس اکٹھا کیتا 4 ہزار ارب رُپئے وِچوں 2 ہزار ارب رُپئے قسطاں وچ ادا کیتے‘ جہدے نال ادھا پیسا رہ گیا ملک چلان لئی جہدی وجھا توں ہور قرضا لینا پیا‘ دوجا بھارتوانائی دے شعبے دا اے کیوں جے بجلی ہنگی بنا رہے ساں کیوں جے جہڑے معاہدے ہوئے اوہدے وچ بجلی مہنگی بن رہی اے تے اسیں اوس قیمت اُتے لوکائی نُوں بجلی ویچ نہیں سکدے ساں‘ ایسے وجھا توں ساڈی صنعت برصغیر دی صنعت نال مقابلا نہیں کر سکدی کیوں جے اوتھے بجلی سستی سی‘ ایسے وجھا توں ساڈی معیشت اُٹھ نہیں رہی سی‘ پر اللہ دا شکر اے اج ساڈی آمدنی ودھنا شروع ہو گئی اے تے کرونا وایرس دے باوجود جولائی و چ ٹیکس وصولی ہدف توں ودھ ہوئی اے تے اگے ہور بہتر حالات نظر آ رہے نیں‘ کرونا دی وجھا توں دنیا دیاں برآمدات گھٹ ہوئیاں اے پر پاکستان دی برآمدات ودھنا شروع ہو گئیاں اے‘ ایہدے علاوا سینمنٹ دی ویچ وٹک اُتے جا رہی اے تے اگے حالات ہور بہتر ہو ندے جان گے۔ قوم نُوں مبارکباد دیندیاں ہویاں اوہناں دا کہنا سی کہ حکومت تے بجلی پیدا کرن والے ازاد ادارے (آئی پی پیز) دے وچکار لمے مذاکرات دے بعد ساڈا کل معاہدا ہو گیا اے‘ جہدے نال بجلی دی پیداواری قیمت گھٹ ہونا شروع ہووے گی‘ صنعت نُوں فایدا ہووے گا تے آن والے دناں وچ ایہدے توں لوکائی وی فایدا چُک سکے گی‘ آن والے دناں وچ اسیں بجلی دے ترسیلی نظام نُوں بہتر کراں گے تے چوری تے لائن لاسز نُوں گھٹ کرن لئی اصلاحاتی پیکج لیاواں گے‘ جہدا نتیجا ایہ ہووے گا کہ بجلی دی قیمت گھٹ ہووے گی۔ اوہناں نے کہیا کہ ساڈے اُتے قرضیاں تے دوجا مہنگی بجلی دا بھار اے‘ پر ایہناں معاہدیاں نال میں اِک صنعتی پاکستان ویکھ رہیا آں‘ جتھے لوکاں نُوں روزگار مل سکے گا۔ اپنے خطاب دے آخر وچ اوہناں نے کہیا کہ میں مقبوضا کشمیر دے لوکاں نُوں پورے پاکستان ولوں پیغام دینا چاہندا آں کہ اسیں تہاڈے نال کھلوتے آں تے تہاڈے لئی سیاسی‘ سفارتی تے ہر طرحاں دی جدوجہد کردے رہواں گے تے دُعا کراں گے کہ اللہ تہانوں ازادی دیوے تے اوہ حق دیوے جہڑا 70 سال پہلاں اقوام متحدا دیاں قرار داداں وچ دِتا گیا سی۔