کشکول تے ایٹمی طاقت نال  نال نہیں چل سکدے‘ ویلے دی ضرورت اے کہ کشکول نُوں توڑیا جاوے:شہباز شریف ……٭رویل نیوز٭

لاہور (نمایندا رویل) پاکستان مسلم لیگ (ن) دے صدر تے قائد حزب اختلاف محمد شہباز شریف نے کہیا اے کہ کشکول تے ایٹمی طاقت اِکو نال نہیں چل سکدے‘ ویلے دی ضرورت اے کہ کشکول توڑیا جاوے‘ کسے نے ساڈے اُتے کشکول نُوں ٹھوسیا نہیں‘ جے اسیں کشکول توڑنا اے تے جویں پاکستان ایٹمی طاقت بنیا اوسے طرحاں اسیں کشکول وی توڑ سکدے آں تے ویلا آئے گا کہ ایہ کشکول ٹُٹ جاوے گا‘ اج آئی ایم ایف دا اینا دباء اے کہ اسیں عام تنخاہ دار دی تنخاہ وی نہیں ودھا سکے‘ اوہ قوماں کدی ازاد نہیں ہوندیاں جہڑیاں معاشی طور اُتے ازاد نہ ہون‘ 73 سالاں بعد اج ویکھ لوو بنگلا دیش تے سری لنکا کتھے نیں‘ افغانستان دی کرنسی کتھے اے تے ساڈی معاشی حالت کہو جہی اے‘ پاکستان لئی خون دین والیاں نے اسلامی فلاحی ریاست دے قیام لئی قربانیاں دِتیاں سن نہ کہ نیب نیازی گٹھ جوڑ ہووے‘ جے سانو پاکستان نُوں دنیا وچ مقام دوانا اے تے سانوں جھوٹھ‘ الزام تراشی دی سیاست نُوں ختم کرنا تے شفاف احتساب نُوں فروغ دینا پوے گا ورنا آن والیاں نسلاں سانوں معاف نہیں کرن گیاں۔ ایہناں خیالاں دا اظہار اوہناں نے جشن ازادی دے سلسلے وچ پارٹی دے مرکزی سیکرٹریٹ ماڈل ٹاؤن وچ پرچم کشائی دے بعد تقریب نال خطاب کردیاں ہویاں کیتا۔ شہباز شریف نے پوری قوم نُوں جشن ازادی دی مبارکباد دیندیاں ہویاں کہیا کہ 73 سال پہلاں قائداعظم دی انقلابی لیڈر شپ وچ 14 اگست 1947 نُوں پاکستان وجود وچ آیا تے ایہ تواریخ دا اِک انہونا واقع سی۔ لوکاں نے پاکستان ول اپنی عزت تے وقار نُوں بچان لئی تواریخی ہجرت کیتی۔ 73 سالاں وچ پاکستان نُوں وڈیاں کامیابیاں مِلیاں جہناں وِچوں سبھ توں اہم پاکستان دا ایٹمی طاقت بننا سی تے اج دشمن پاکستان ول میلیاں اکھاں نال نہیں ویکھ سکدا‘ جے اسیں اپنیاں کمزوریاں ول نظر ماڑیے تے اوہ وی بہت زیادا نیں جویں اج پاکستان ایٹمی طاقت اے تے دوجے ہتھ وچ کشکول اے۔ کشکول تے ایٹمی طاقت اِکو نال نہیں چل سکدے‘ ویلے دی ضرورت اے کہ کشکول نُوں توڑیا جاوے۔ اوہناں نے کہیا کہ کرونا نے پوری دنیا وچ تباہی مچائی‘ ایہدے اُتے تے مہنگائی زمین اُتے آنی چاہیدی سی پر اج اسماناں نال گل کر رہی اے۔ اوہناں نے کہیا کہ نواز شریف دے دور وچ نویں تے جدید ہسپتال بنائے گئے‘ مفت دوائیاں ملدیاں سن‘ مفت علاج ہوندا سی‘ اج اوتھوں ایہ ساریاں سہولتاں ختم کر دِتیاں گئیاں نیں۔ مسلم لیگ (ن) دی حکومت نے ملک وچ اینی بجلی پیدا کیتی کہ ملک دی ہر لوڑ پوری ہو سکدی اے تے اج لوڈشیڈنگ ہو رہی اے تے ایہ حکومت دی نا اہلی اے۔