بھُکھ تے غربت دے خاتمے اُتے ریاستی وسایل کیوں خرچ نہیں کیتے جا رہے:بلاول بھٹو زرداری ……٭رویل نیوز٭

اسلام آباد (نمایندا رویل) پاکستان پیپلز پارٹی دے چیئرمین بلاول بھٹو زرداری نے پوری قوم نُوں ازادی دیہاڑ دی مبارکباد دیندیاں ہویاں کہیا کہ ازادی دی قدر حقیقی جمہوریت وچ لُکی اے۔ انسانی وقار تے احترام تے انسانیت دی تقری دی ضمانت جمہوریت دے علاوا ہور کوئی نظام نہیں دیندا۔ ازادی دیہاڑ اُتے قوم دے ناں اپنے پیغام وچ بلاول نے کہیا کہ ساڈی قوم دے نوجوان متحرک تے ازادی دی اہمیت و افادیت توں چنگی طرحاں واقف نیں‘ پاکستانی قوم اپنی ازادی دا تحفظ کرنا جاندی اے‘ جہنوں ایہ عزم تحریکِ ازادی توں وراچٹ وچ مِلیا اے‘ پاکستان دی تحریک ازادی اِک پُرامن سیاسی جدوجہد سی‘ قائداعظم دی قیادت ہیٹھ ساڈے وڈکیاں نے آن والیاں نسلاں دی خاطر سامراج دیاں زنجیراں توڑ یاں سن تاں جے آن والیاں نسلاں نُوں جبر‘ مذہبی امتیاز تے ہر طرحاں دیاں زیادتیاں توں محفوظ رکھیا جاوے‘ ساڈے وڈکیاں نے قربانیاں دِتیاں تاں جے اسیں اپنی عبادت‘ اظہار رائے‘ تے ایسوسئیشن دی ازادی توں فایدا چُکیے تاں جے اسیں ووٹ دی طاقت راہیں حکومتاں دا احتساب کر سکیے تاں جے سانوں کسے دیر بغیر انصاف دی فراہمی یقینی ہووے‘ دور اندیشی تے خُد احتسابی زندا قوماں دے اوصاف ہوندے نیں۔ بلاول بھٹو نے کہیا کہ سانوں ویکھنا چاہیدا اے کہ آٹا‘ کھنڈ تے پٹرول ورگیاں روزدیاں استعمال دیاں شیواں اج مافیاز دے کنٹرول وچ کیوں نیں‘ 74 ویں ازای دیہاڑ اُتے لوکائی سوال چُک رہی اے‘ سوال اے کہ بھُکھ تے غربت دے خاتمے اُتے ریاستی وسایل کیوں خرچ نہیں کیتے جا رہے‘ اوہ وسایل ازادی اظہار رائے تے میڈیا تے مخالفین نُوں نَپن لئی کیوں استعمال کیتے جا رہے نیں؟