جاپان وِچ وسیا کوریا ــــ لیکھ ـــ٭رویل٭

جاپان وِچ وسیا کوریا ــــلیکھ ـــ٭رویل٭

رانا محمد زبیر صابر

جاپان تے کوریا درمیان کئی لڑائیاں ہوئیاں کئی واری دویں ملک اک دوجے تے بھارے پئے۔آخر دوسری جگت جنگ لڑی گئی تے دنیا دا نقشا ہی بدل گیا۔کئی نویں ملک بنے دنیا وِچ بہت سارے بدلاؤ آئے۔دوسری جگت جنگ توں پہلاں جاپان نے کوریا توں کجھ لوک قیدی کر کے مزدوری لئی جاپان لیاندے۔ایہ لوگ جاپان دی ہار توں بعد ایس ملک وِچ پھس کے رہ گئے۔ایہناں دا ملک کوریا جو کہ اک ملک سی شمالی تے جنوبی کوریا وِچ ونڈیا نہیں سی گیانہ رہیاکوریا وِچ کوئی سرکار نہیں سی جو ایہناں نوں قبول کردی۔جاپان جنگ ہار چکیا سی تے امریکا تے اقوام متحدہ جاپان دی دوبارہ تعمیر لئی مُل ورتن کر رہے سن۔نویں بنی جاپانی سرکار نے کوریا ئی لوکاں نوں جاپان وِچ رہن دی اجاز ت دے دِتی۔ایہناں لوکاں وِچوں کجھ لوک واپس کوریا گئے پر زیادہ تر جاپان ہی رہے۔کوریا جان والے لوکاں وِچوں وی کئی واپس آگئے۔

ایہ لوک اپنی کوریائی شناخت گنوانا نہیں سی چاہندے تے جاپان ورگے ملک وِچ جتھے مخالفت چ اک وڈی آبادی ہووے ایہ کم کوریائی لوکاں لئی بہت اوکھا سی۔کوریائی آگوواں نے اک تنظیم بنائی جہنوں chogryonدا ناں دِتا گیا۔ایس تنظیم نوں بناؤن دا مقصد کوریائی لوکاں دی زبان، شناخت،کلچر نوں بچاؤنا تے جاپان وِچ وسدے کوریائی لوکاں دی ترقی لئی کم کرنا سی۔

ایس تنظیم نے لوکاں دے دِتے پیسے نال ہی کم شروع کیتے اپنے سکول بنائے گئے جتھے بالاں نوں کوریائی زبان وِچ نصاب پڑھایا جاندا سی، پیانگ یانگ یونیورسٹی، ہوٹل، بینک تے ہو ر کئی ادارے کھولے جہناں نال کوریائی لوک بہت امیر بن گئے تے اپنے سکول،یونیورسٹی ہو ون دی وجھا توں ایہناں دی زبان وی بچی رہی۔ایس تنظیم نے اک کلچرل سنٹر وی بنایا جیہدے وِچ کوریا نال جڑے ہر شے موجود اے۔کوریائی لوکائی دے کپڑے، کھانے،رواج، تواریخ بارے ہر شے جو رکھی جا سکدی سی ایس سنٹر وِچ رکھی گئی اے۔ایہ سبھ کجھ ایس تنظیم نے اپنے بالاں نوں اپنے ورثے نال جوڑن لئی کیتا اے۔ کوریا ئی لوکاں دی نویں نسل جو کہ جاپان دی جم پل اے کوریا دی وفادار اے تے اپنی کوریائی شناخت تے فخر کردے نیں۔ایہ بچے کوریائی تنظیم ہیٹھ بنے سکولاں وِچ ہی جاندے نیں۔کوریائی سوانیاں دا لباس چگوری تے جاپان وچ پابندی اے کوریائی کُڑیاں سکول وِچ آ کے اپنا روایتی لبا س یونیفارم دے طور دی بدلدیاں نیں۔سکول وِچ جاپانی نصاب کورین ترجمے نال پڑھایا جاندا اے تے بالاں نوں کورین تے جاپانی دویں زباناں سکھائیاں جاندیاں نیں۔کوریائی لوک جاپان وِچ وی اپنے بالاں دے کوریائی ناں رکھدے نیں جو کہ جاپانی ناواں توں وکھ نیں۔

کوریائی لوکاں نوں جاپان وِچ مندا سمجھیاجاندا اے ایہدی وجھا کئی صدیاں دی دشمنی تے لڑائیاں نے جو لٹریچر وِچ زہر دی شکل وِچ موجود نیں نویں نسل ایہنوں بھُلنا وی چاہوے تے بُھل نا سکے۔اک واری chongryonتنظیم تے الزام لگا کہ ایہ شمالی کوریا دا خفیا ہیڈ کوارٹر اے جیہڑا پابندی لگی شمالی کوریا دی حکومت نوں غیر ملکی کرنسی تے پیسا دیندی اے۔ایس الزام توں بعد ایس تنظیم دے کئی بینک بند کر دِتے گئے صرف سکول، یونیورسٹی تے کجھ ہو ٹل ای باقی رہن دِتے گئے۔

ساڈی پاکستانی کمیونٹی اک وڈی گنتی وِچ باہر لے ملکاں وِچ رہ رہی اے۔ایہ لوک اپنا کلچر بچا رہے نیں نہ ای اپنی زبان۔بچے جدوں دین نوں وی چھڈ جاندے نیں اوس ویلے خیال آؤندا اے کہ شاید ایہناں ملکاں وِچ نہ وسے ہوندے۔دوسرے ملک وِ چ رہن وِچ کوئی ماڑی گل نہیں۔پر اوتھے رہ کے اپنی زبان،کلچر تے شناخت دی راکھی کرنا سبھ توں ضروری کم اے۔زبان،کلچر تے شناخت کیویں بچائی جا سکدی اے ایہ اسیں کوریائی لوکاں توں سِکھ سکدے آں۔کوریائی لوک ساڈے لوکاں توں گھٹ گنتی وِچ باہر رہ رہے نیں پر جتھے وی ایہ وسدے نیں اپنی زبان،کلچر تے شناخت نوں برقرار رکھدے نیں۔

کوریائی لوکاں توں ہور کجھ نہیں زبان،کلچر تے شناخت بچاؤنا ای سکھ سکدے آں۔