بلاول بھٹو تے شہباز شریف رَل کے وی اِک شادی ہال وچ  وی جلسا نہیں کر سکدے:  فواد چودھری ……٭رویل نیوز٭

اسلام آباد (اُچیچا نمایندا رویل) وفاقی وزیر سائنس و ٹیکنالوجی فواد چودھری نے دعوا کیتا اے کہ مریم نواز حکومت نہیں شہباز شریف خلاف تحریک چلا رہے نیں‘ ن لیگ اندرونی لڑائی توں فارغ ہووے گی تے حکومت خلاف سوچے گی۔ نجی ٹی وی نال گلبات کردیاں ہویاں فواد چودھری دا کہنا سی کہ مریم نواز دی سیاست پارٹی قیادت اُتے قبضا کرن دی اے۔ شہباز شریف پارٹی قیادت توں ڈِگن گے تے فیر ای مریم سیاست کرن گے جد کہ شہباز شریف دی وی سیاست مریم نواز کیمپ دے خلاف اے۔ فواد چودھری نے دعوا کیتا کہ شہباز شریف دی ترجیح اے کہ مسلم لیگ ن دی قیادت اُتے اپنا قبضا مستحکم کریے۔ جدوں تک مریم تے شہباز دی لڑائی ختم نہیں ہوندی‘ او اے پی سی وچ جا کے کیہ کرن گے؟ مسلم لیگ (ن) اندرونی لڑائی توں فارغ ہووے گی تے فیر ای فیصلا کر پائے گی کہ حکومت دے خلاف کیہ حکمت عملی اختیار کرنی اے؟ وفاقی وزیر دا کہنا سی کہ اپوزیشن دے کول ایس ویلے کوئی سیاسی رول نہیں‘ بلاول بھٹو تے شہباز شریف رَل کے وی اِک شادی ہال وچ جلسا نہیں کر سکدے۔ جہڑی پیپلز پارٹی نُو اسیں جاندے آں اوہ کدی چاراں صوبیاں دی زنجیر ہوندی سی‘ اج حالت ایہ اے کہ آصف زرداری نُوں اپنی پیشی اُتے راولپنڈی وچ لوک نہیں مل رہے‘ اوہ کروڑاں رُپئے خرچ کر کے سندھ توں لوک لیا رہے نیں۔ پنجاب دی سیاسی صورتحال اُتے گل کردیاں ہویاں اوہناں نے کہیا کہ پنجاب وچ تبدیلی آندی اے تے فیر پوری دی پوری اسمبلی وزیر اعلا دی امیدوار اے۔ جے عثمان بزدار وزیر اعلا بن گئے نیں تے فیر تے کوئی وی وزیر اعلا بن سکدا اے۔ اوہناں نے کہیا کہ شراب دے لائسنس وچ عثمان بزدار نُوں بلا کے وزیر اعلا دی تضحیک کیتی گئی‘ ایس طرحاں نہیں کرنا چاہیدا سی۔ اداریاں نُوں مضبوط کرنا چاہیدا اے‘ وزیر اعلا آفس وی اِک ادارا اے‘ قومی احتساب بیورو دی کمکاری اُتے گل کردیاں ہویاں اوہناں دا کہنا سی کہ نیب چیئرمین جسٹس ریٹائرڈ جاوید ابقلا نے بہت کم کیتا‘ اوہناں نُوں تجویز اے کہ جدوں نیب کسے نُوں بلائے تے ترجمان میڈیا وچ آ کے تفصیلات وی دَسے‘ جہڑے کیس نیب توں میڈیا نُوں جاندے نیں‘ اوہدے اُتے نیب نُوں میڈیا نُوں بریف کرنا چاہیدا اے۔