کراچی دی تعمیر و ترقی لئی پیپلز پارٹی‘ پی ٹی آئی تے ایم کیو ایم دا ایکا  ……٭رویل نیوز٭

کراچی (اُچیچا نمایندا) وزیر اطلاعات سندھ ناصر شاہ دا کہنا اے کہ کراچی دی تعمیر و ترقی لئی پیپلز پارٹی‘ پی ٹی آئی تے ایم کیو ایم دا ایکا تے اتفاق چنگی گل اے۔ ترجمان سندھ سندھ حکومت مرتضیٰ وہاب نے کراچی دے مسئلے حل کرن دے حوالے توں کمیٹی دی تشکیل دی تصدیق کردیاں ہویاں کہیا کہ کمیٹی وچ وفاق تے سندھ حکومت دے 3`3 نمایندے شامل ہون گے‘ کمیٹی دے چیئرمین وزیر اعلا سندھ مراد علی شاہ ہون گے‘ کمیٹی وچ سندھ ولوں صوبائی وزراء ناصر شاہ تے سعید غنی شامل ہون گے جد کہ وفاق ولوں وفاقی وزراء اسد عمر‘ علی زیدی تے امین الحق شامل ہون گے۔ مرتضیٰ وہاب دا کہنا سی کہ کمیٹی صوبے دے ترقیاتی کماں وچ حایل رکاوٹاں نُوں دور کرے گی‘ پورے سندھ وچ ترقیاتی کماں نُوں تیز تے ویلے سر مکمل کیتا جا سکے گا‘ سندھ سرکار صوبے دی ترقی لئی رَل کے کم کرن نُوں ہمیشا تیار اے‘ ساریاں حکومتاں رَل کے کم کرن تے مسئلے حل ہون گے۔ دوجے پاسے کراچی دے مسئلیاں دے حل لئی کمیٹی اُتے گل کردیاں ہویاں صوبائی وزیر اطلاعات ناصر شاہ نے کہیا کہ تِناں جماعتاں دا کراچی دی ترقی لئی رَل کے کم کرن دا عزم لوکائی لئی خشخبری اے‘ پیپلز پارٹی‘ تحریک انصاف تے ایم کیو ایم دا ایکا کراچی دی تعمیر و ترقی وچ میل پتھر ثابت ہووے گا۔ ناصر شاہ دا کہنا سی کہ کراچی دشمن عناصر نُوں ایہ ایکا اِک اکھ نہیں چنگا لگے گا‘ چیئرمین بلاول بھٹو زرداری دی قیادت وچ صوبا سندھ تے خاص طور اُتے کراچی نے ریکارڈ ترقی کیتی اے‘ سندھ حکومت ہر اوس جماعت یاں بندے نُوں خُش آمدید کہوے گی جہڑے کراچی دی ترقی وچ کردار ادا کر ن گے‘ سندھ سرکار نے نالیاں دی صفائی دے حوالے توں وفاقی حکومت تے این ڈی ایم اے نُوں خُش آمدید کہیا۔