کٹھ پتلی وزیراعظم ہاؤس وچ بیٹھا اے،لوکائی دے معاشی حقوق اُتے میرا مؤقف دباء دی وجھا توں تبدیل نہیں ہونا:بلاول بھٹو زرداری ……٭رویل نیوز٭

اسلام آباد (بیورو رپورٹ) پاکستان پیپلز پارٹی دے چیئرمین بلاول بھٹو زرداری نے واضح کیتا اے کہ میرے پورے خاندان نُوں گرفتار کر لوو‘ 18 ویں ترمیم‘ آئین تے جمہوریت اُتے آنچ نہیں آن دواں گے‘ دباء محسوس کر رہے آں تے سانوں وی لاین وچ آن لئی دھمکیاں دِتیاں جا رہیاں نیں‘ اسیں کل وی دباء وچ نہیں آئے تے اج وی دباء وچ نہیں آواں گے‘ کٹھ پتلی وزیراعظم ہاؤس وچ بیٹھا اے‘ اوہدی ڈور کدھروں ہوروں ہلدی اے‘ ایہ نہ ملٹری کورٹ اے نہ ان کیمرا کورٹ اے‘ لوکائی نُوں حق اے عدالت آن دا تے کارروائی ویکھن دا‘ وکیلاں نُوں عدالت آن توں روکیا گیا جہدے نال کارروائی وچ دیر ہوئی‘ کیہ ایہ سبھ جج اُتے دباء پان دی کوشش سی‘ ایہ میرے نال تے میرے خاندان دے نال نفسیاتی کھیڈ کھیڈ رہے نیں‘ پیپلز پارٹی نے یحییٰ خان‘ ضیاء الحق تے پرویز مشرف دی آمریت دا مقابلا کیتا‘ اج وی ایس کٹھ پتلی حکومت دی مخالف کر رہی اے تے کردی رہوے گی۔ پیر نُوں احتساب عدالت وچ توشا خانا ریفرنس و چ پچھلے صدر آصف علی زرداری دی پیشی دے موقع اُتے بلاول بھٹو زرداری وی عدالت وچ موجود سن۔ عدالت دے باہر میڈیا نال گلبات کردیاں ہویاں اوہناں نے کہیا کہ اسیں محسوس کر رہے آں کہ ساڈے اُتے دباء اے‘ سانوں دھمکیاں دِتیاں جا رہیاں نیں کہ اسیں وی لاین وچ آ جائیے‘ اسیں وی سکرپٹ نُوں فالو کریے تاں جے18 ویں آئینی ترمیم‘ این ایف سی ایوارڈ وچ تبدیلی ہووے‘ ایوان توں کالا قانون منظور ہووے پر اسیں کل وی دباء وچ نہیں آئے اج وی دباء وچ نہیں آواں گے۔ اوہناں نے کہیا کہ اگے جا کے تُسیں ویکھو کہ 1973 آئین‘ این ایف سی ایوارڈ‘ جمہوری حقوق‘ انسانی حقوق ایس ملک دے غریب لوکائی دے معاشی حقوق اُتے میرا مؤقف دباء دی وجھا توں تبدیل نہیں ہووے گا۔ عدالتی کارروائی بارے گل کردیاں ہویاں اوہناں نے کہیا کہ ایہ عدالت فوجی‘ اِن کیمرا عدالت یاں آمر دی عدالت نہیں کہ اسلام آباد دی پولیس فاروق ایچ نائیک‘ لطیف کھوسا تے ہور وکیلاں دے نال بدسلوکی کیتی تے عدالت وچ جان دی اجازت نہیں دِتی گئی جہدی وجھا توں سنوائی دیر نال شروع ہوئی تے کارروائی وی متاثر ہوئی۔ چیئرمین پی پی پی نے کہیا کہ ہر ملزم دا وکیل ایس گل اُتے احتجاج کر رہیا سی‘ کسے نُوں د ھکے وجے‘ کوئی زخمی ہویا کسے نُوں اندر نہیں آن دِتا گیا‘ کیہ ایہ ازاد ریاست وچ ہوندا اے‘ پاکستان دی لوکائی‘ سپریم کورٹ دے وکیلاں توں کیہ لُکان دی کوشش کیتی گئی۔ اوہناں نے کہیا کہ تہانوں کیہ خوف اے کیہ ڈر اے‘ کیہ ایہ جج اُتے دباء پان دی کوشش سی یاں ساڈے اُتے دباء پان دی‘ کیہ آصف زرداری توں اینا ڈردے او کہ صرف عدالت وچ پیشی دے موقع اُتے پوری اسلام آباد دی پولیس نُوں ایدھر کھلار دیندے او۔ اوہناں نے کہیا کہ اج پاکستان تے پاکستان پیپلز پارٹی لئی اِک تواریخی دن اے اج 17 اگست اے‘ ہر جیالے نُوں ایہ تاریخ یاد اے‘ اج مینگو ڈے سی‘ جہڑا ایس ملک دے آمر جنرل ضیاء الحق دا آخری دن سی تے اج جہڑا ہائبرڈ رجیم چل رہیا اے‘ کٹھ پتلی وزیراعظم ہاؤس وچ بیٹھا اے پر اوہدی ڈور کدھروں ہوروں ہلدی اے ایس ہائبرڈ رجیم دا ویاختتام ہونا اے۔ اوہناں نے کہیا کہ ایہ جعلی تے کٹھ پتلی جمہوریت نہیں چلے گی تُسیں سمجھدے اوہ کہ وزیراعظم نُوں وی کٹھ پتلی وانگوں چلائیے‘ میڈیا نُوں وی کٹھ پتلی وانگوں چلائیے‘ احتساب عدالتاں دے ججاں توں لے کے پتا نہیں کس سطح تک دے ججز نُوں کٹھ پتلی وانگوں چلائیے تے ہر اپوزیشن اُتے نیب تے کیسز راہیں دباء پا کے اوہناں نُوں وی کٹھ پتلی وانگوں چلان دی کوشش کرکریے‘ تہاڈی ایہ کوشش ناکام ہووے گی۔ بلاول بھٹو زرداری نے کہیا کہ پاکستان پیپلز پارٹی نے یحییٰ خان‘ ضیاء الحق تے پرویز مشرف دی آمریت دا مقابلا کیتا تے اج وی ایس کٹھ پتلی حکومت دی مخالفت کر رہی اے تے کردی رہوے گی۔ اِک سوال دے جواب وچ اوہناں نے کہیا کہ جدوں تہاڈے کول دلایل نہیں ہوندے‘ کوئی کیس نہیں ہوندا تے گالھاں‘ بدسلوکی تے طاقت اُتے انحصار کرنا پیندا اے تے اج ایہ دوویں شیواں ویکھیاں گئیاں کہ کس طرحاں سپریم کورٹ دے وکیلاں دے نال انتظامیا تے پولیس نے بدتمیزی کیتی تے کس طرحاں نیب دے وکیل اپنے سنگی وکیل نُوں گالھاں کڈھ رہے سن۔ اوہناں نے کہیا کہ اج ایہ ساڈے نال ہو رہیا اے کل کسے ہور نال ہو سکدا اے‘ ایہ بہت عجیب گل اے کہ ایسے نیب دے اِک جج نے عالمی وباء کارن طبی بنیاداں اُتے آصف زرداری نُوں حاضری لئی ویڈیو لنک دی رعایت دِتی جد کہ ایسے عدالت دے دوجے جج لئی وباء نہیں کھلری ہوئی‘ اوہناں لئی کووڈ 19 کوئی شے نہیں اے۔ بلاول بھٹو نے کہیا کہ پچھلے صدر نُوں صحت دی خراب صورتحال دے باوجود جج دے ساہمنے حاضر کروایا گیا حالاں جے ڈاکٹر نے اوہناں نُوں باہر نکلن توں منع کیتا ہویا اے تے ایہدے بعد عدالتی کارروائی نُوں وی اگے نہیں ودھایا گیا تاں جے اسیں اگلی پیشی اُتے دُبارا آصف زرداری نُوں کرونا دے خطرے دے باوجود پیش کریے۔ اوہناں نے کہیا کہ ایہ میرے تے میرے خاندان دے نال نفسیاتی کھیڈ کھیڈ رہے نیں‘ دھمکی دین دی کوشش کر رہے نیں کہ جے میں اپنے مؤقف توں پچھے نہیں ہٹاں گا تے میرے والد‘ پارٹی کارکنان‘ سنگیاں دے نال انتقامی سلوک کیتا جاوے گا پر میں اپنے مؤقف توں پچھے نہیں ہٹاں گا۔ چیئرمین پی پی نے کہیا کہ اج دے دن دے بارے وچ اسیں ایہ سوال تے پُچھ ای سکدے آں کہ اج ے دن دے واقع دے حوالے توں تفتیش کیوں نہیں ہوئی‘ اج تک سانوں پتا نہیں کہ ایس دن کیہ ہویا سی۔ اوہناں نے کہیا کہ اسیں انصاف دی توقع تے امید رکھدے آں کیوں جے جے اسیں جمہوری قوتاں عدالتاں توں امید نہیں رکھن گیاں تے کون رکھے گا‘ اسیں جمہوری‘ پرامن قانون دا راہ اپنانا اے‘ اسیں اج تک انتظار کر رہے آں کہ ذوالفقار علی بھٹو دے عدالتی قتل دے کیس دی سنوائی ہووے‘ انصاف دِتا جاوے اوہ سارے کیسز زیر التوا نیں‘ ایہناں عدالتاں وچ بے نظیر بھٹو دا قتل کیس وی موجود اے۔ بلاول نے کہیا کہ احسان اللہ احسان فرار ہویا پر کسے عدالت نے نوٹس نہیں لیا‘ ایہ ریاست پاکستان دی ناکامی اے کہ اوہ دہشتگرد نُوں ٹرائل ت نہیں پہنچا سکی اوہ اے پی ایس دے بچیاں نُوں انصاف نہیں دے سکی تے تہانوں کیہ انصاف دین گے۔ اوہناں نے کہیا کہ انصاف دی توقع کردے آں‘ اسیں جمہوری قانونی راہ رکھدے آں۔