غزل/ارشاد سندھو

روپ دیاں جاگیراں مونہوں بولدیاں

کئی کئی نیں تصویراں مونہوں بولدیاں

رت پیانی پیندی مُڑ مُڑ اکھراں نوں

اَیویں نہیں تحریراں مونہوں بولدیاں

کر تے سہی توں مِٹھیاں اپنے لہجے نوں

ویکھیں فر تاثیراں مونہوں بولدیاں

اودوں تیکر جِت جاندے سی لنگڑے وی

جد تک نہیں سن ہیراں مونہوں بولدیاں

میں تکیا اے کھا بہندے نیں تَتّیاں ای

ویکھ کے لوکیں کھیراں مونہوں بولدیاں

آؤندے رہندے نِت سُنہڑے اُجڑن دے

ہُندیاں جے تقدیراں مونہوں بولدیاں

سندھو ایتھے دِل چریندے رہنے نیں

جِنا چِر نہیں لیراں مونہوں بولدیاں