وزیراعظم دا ہمیشا میرے اُتے اعتماد رہیا اے:وزیر اعلا پنجاب عثمان بزدار ……٭رویل نیوز٭

لاہور(نمایندا رویل) وزیر اعلا پنجاب عثمان بزدار نے کہیا کہ وزیراعظم عمران خان نے ہمیشا میرے اُتے اعتماد کیتا اے ایس لئی ہمیشا فرنٹ فٹ اُتے کھیڈاں گا۔ ایوان صعت و تجارت لاہور وچ خطاب کردیاں ہویاں وزیر اعل اپنجاب دا کہنا سی کہ کرونا بحران نال خُش اسلوبی نال نبڑ رہے آں تے ملک وچ کرونا وباء دے بعد حالات بہتر ہو رہے نیں۔ اوہناں نے کہیا کہ تاجر برادری دے مسئلے ترجیحی بنیاداں اُتے حل کرنا چاہندے آں‘ لاہور چیمبر آف کامرس وچ پہلا ون ونڈو اپریشن شروع ہویا اے‘ لاہور چیمبر آف کامرس وچ ایہ سٹیٹ آ ف دی آرٹ سہولت اے۔ وزیر اعلا پنجاب دا کہنا سی کہ نیب نے مینوں مجرم دی حیثیت نال نہیں سدیا سگوں میں نیب دے ساہمنے آپ پیش ہویا‘نیب جدوں وی بلائے گا آپ جاواں گا تے نیب دے سارے سوالاں دے جواب دواں گا۔ اوہناں دا کہنا سی کہ ارکان ومی تے صوبائی اسمبلی اپنے حلقیاں دے مسئلیاں لئی ملاقاتاں کردے رہندے نیں‘ کوشش کراں گے کہ ارکان پارلیمنٹ دے مسئلے حل کریے۔ عثمان بزدار دا کہنا سی کہ وزیراعظم دا ہمیشا میرے اُتے اعتماد رہیا اے‘ انشاء اللہ فرنٹ فٹ اُتے کھیڈاں گے۔ پنجاب وچ آٹے تے کھنڈ دے بحران دے حوالے توں گل کردیاں ہویاں عثمان بزدار دا کہنا سی کہ پنجاب وچ آٹے تے کھنڈ دی صورتحال دی مانیٹرنگ کیتی جا رہی اے۔ اوہناں نے کہیا کہ بدقسمتی نال کدی زرعی کھوج ول توجا نہیں دِتی گئی‘ سارے ادارے اپنا کم کرن گے تے حالات وچ بہتری آئے گی۔