جعلی حکمراناں نُوں گھر گھلاں گے‘ نیب نُوں استعمال کر کے سانوں چُپ نہیں کروایا جا سکدا: مولانا فضل الرحمان ……٭رویل نیوز٭

اسلام آباد/ کوئٹہ (نمایندا رویل) جمعیت علماء اسلام دے مرکزی امیر مولانا فضل الرحمان نے اپنی رہایشگاہ اُتے شہید اسلام مولانا محمد حنیف دے جانشین تے جمعیت علماء اسلام دے مرکزی آگو مولانا مفتی محمد قاسم دی قیادت وچ ملن والے وفد نال گلبات کردیاں ہویاں کہیا کہ ملک نُوں آئین تے قانون دی اُچیرتا ول لے کے جانا چاہندے آں‘ آمرانا رویاں نال پہلے وی لڑے ساں ہُن وی لڑاں گے‘ ذاتی تے پارٹی مفادات توں بالا تر ہو کے سوچنا پوے گا۔ لوکائی دے حقاں دی جنگ لڑاں گے‘ جعلی حکمراناں نُوں گھر گھلاں گے‘ نیب نُوں استعمال کر کے سانوں چُپ نہیں کروایا جا سکدا‘ تواریخ دی بدترین دھاندلی نُوں جس طرحاں جمیعت علماء اسلام نے چیلنج کیتا کوئی دوجی سیاسی جماعت نہیں کر سکی تے اسیں جہڑا مضبوط مؤقف اپنایا پاکستان دا بچّا بچّا اوہدی گواہی دے رہیا اے کہ ایس انداز وچ ملک دی کسے ہور سیاسی جماعت نے اینا واضح مؤقف نہیں اپنایا‘ جمعیت علماء اسلام اِک سیاسی جماعت اے تے اپنی 100 سالا تواریخ رکھدی اے‘ جے مقتدر قوتاں ساڈے راہ وچ رکاوٹ نہ بنن تے ملک دی وڈی سیاسی جماعت جمعیت علماء اسلام اے‘ اسیں عام بندے دی اواز آں تے اوہناں دے حقاں لئی جدوجہد جاری رکھاں گے‘ اوہناں نے کہیا کہ وطن عزیز نُوں لا الہ الا اللہ دے ناں اُتے حاصل کیتا گیا تے جہڑے ملک دا آئین کہندا اے کہ اسلام پاکستان دا مملکتی مذہب ہووے گا‘ قرآن و سنت دے منافی کوئی قانون نہیں بنے گا‘ پر اج تک ایس حوالے توں اِک وی قانون سازی نہیں ہو سکی‘ اسیں کس طرحاں نویں نسل نُوں یقین دلوائیے کہ واقعی اوہ ازاد ہو چکے! اسیں ذاتی مفادات توں بالا تر ہو کے ایس ملک دی بقاء دی جنگ لڑ رہے آں‘ ایس ویلے ملک دی معیشت ڈُب چکی اے‘ ملک دے ہر شعبے نال وابستا بندے پریشان نیں‘ ایہ نا اہل حکمران تے پاکستان اِکو نال نہیں چل سکدے‘ حکومت چلانا موجودا حکومت دے وَس دی گل نہیں‘ موجودا حکومت دے خاتمے دی ذمے داری جتھے سلیکٹرز اُتے اے اوتھے اپوزیشن اُتے وی اے‘ ایہناں نُوں جہڑی ڈِھل مل رہی اے ایہ ڈِھل اِک وڈے انجام لئی اے‘ کشمیر تے فلسطین دے لوک اپنی سرزمین دی جنگ لڑ رہے نیں تے اسیں مصلحتاں دا شکار ہو چکے‘ صہیونی قوتاں دے ناجایز قبضے نُوں تسلیم کرن ول ودھ رہے آں‘ یو اے ای دا اسرائیل نال معاہدا فلسطینیاں دی 70 سالا جدوجہد ازادی دی نفی اے‘ یو اے ای دا فیصلا نہ ای عرب دنیا دی نمایندگی اے تے نہ ای مسلم امت دی۔