kraamaat@gmail.com
+ +92 333-430-6384


اخیرلی ساہ / حیدر علی حیدر


حیدر علی حیدر December 10, 2019


جدوں شام دے چھے وجے تے خیال آیا کہ مینوں چاچے فوجی کول جانا سی پر میں تے لمی تان کے ستا ہویا ساں "یارا اکھاں ملدا ہویا جدوں منجی توں اٹھیا تے اوہنوں گویڑ آیا" کالھاں نال مونہ تے پانی دا چھٹا ماریا تے چاچے فوجی دی راہے پے گیا۔

حالے ادھا پینڈا مکیا نہیں سی کہ گلی وچ حال دہائی پےگئی.لوک چاچے فوجی دی دُکان ول نسدے جاندے سن یارا وی تیز پیراں نال چاچے فوجی دی دکان ول نس پیا۔دکان تے اپڑدیاں نال ای کیہ ویکھدا اے کہ چاچے دی گھر والی دے مونہ چوں جھگ نکل رہی سی اوہدیاں تنے دھیاں وین پا پا رو رہیاں سن . کول کھلوتیاں سوانیاں دے تبصرے نے دس پائی کہ خالا نے زہر پی لئی اے.

یارا منجی دے نیڑے ہویا ہویا تے خالا نوں دو سد مارے.

تیجے سد پہلاں ای خالا نے اوکھی سوکھی ہو کے یارے دی وینی نپ کے کہیا "وے پت یاریا! رب دِھیا ں دین توں پہلاں اوہناں دے داج وی دے دیندا" اینی گل کرن مگروں اوہدی" اخیرلی ساہ "وی نکل گئی۔