سلمان شہباز دے کول پیسا کتھوں آندا اے ایہدا علم نہیں،شریف فیملی دے چیف فنانشل ملزم محمد عثمان     ……٭رویل نیوز٭

لاہور (نمایندا رویل) شریف فیملی دے چیف فنانشل افسر ملزم عثمان نے شہباز شریف فیملی لئی منی لانڈرنگ دا اعتراف کر لیا۔ وسیلیاں دے مطابق قومی احتساب بیورو (نیب) نے شریف فیملی دے چیف فنانشل افسر محمد عثمان توں ہُن تک ہون والی تحقیقات دی رپورٹ جاری کر دِتی اے‘ جہدے مطابق ملزم محمد عثمان نے کرپشن تے کرپٹ پریکٹسز نال شہباز شریف فیملی لئی منی لانڈرنگ کیتی تے اوہدا اعتراف وی کر لیا اے۔ نیب رپورٹ وچ دَسیا گیا اے کہ ملزم محمد عثمان نے 2005 وچ شریف فیملی دی رمضان شوگر مل وچ 90 ہزار مہینا وار اُتے نوکری شروع کیتی‘ 2006 وچ نواز شریف فیملی نے شہباز شریف فیملی توں حدیبیہ انجینئرنگ مل لے لئی‘ تے فیر 2007 وچ شہبا ز شریف فیملی نے اپنے بزنس نُو ودھان لئی شریف فیڈ مل سنے ہور کمپنیاں بنائیاں۔ رپورٹ دے مطابق سی ایف او محمد عثمان توں جدوں نویاں کمپنیاں بنان لئی فنڈز دے بارے سوالات کیتے گئے تے ملزم عثمان دے مطابق نویاں کمپنیاں لئی غیر ملکی ترسیلات تے قرضا جات دے وسیلے بنائے گئے‘ غیر ملکی ترسیلات تے قرضا جات لئی شہباز شریف دی گھر والی نصرت شہباز تے اوہناں دے پُتراں دے بینک اکاؤنٹس استعمال کیتے گئے‘ 2007 توں پہلاں غیر ملکی ترسیلات نُوں حمزہ شہباز ویکھدے سن۔ نیب رپورٹ مطابق ملزم محمد عثمان توں شہباز شریف لئی منی لانڈرنگ بارے سوالات وی کیتے گئے تے ملزم محمد عثمان نے بیان دِتا اے کہ اوہ سبھ کجھ سلمان شہباز دے کہن اُتے کردے سن‘ سلمان شہباز دے کہن اُتے وقار ٹریڈنگ کمپنی نے 600 ملین دیاں جعلی غیر ملکی ترسیلات کیتیاں‘ ساری رقم چیک راہیں سلمان شہباز دے ذاتی اکاؤنٹ وچ منتقل کیتی گئی‘ پر سلمان شہباز دے کول پیسا کتھوں آندا اے ایہدا علم نہیں۔ رپورٹ وچ کہیا گیا اے کہ بے نامی اکاؤنٹس دے حوالے توں ملزم محمد عثمان توں تحقیقات حالے جاری نیں۔