صوبے دی ونڈ…… پیپلز پارٹی دا منافقانا رویّا……٭رویل٭

بدھوار والے دیہاڑ پیپلز پارٹی نے کراچی‘ حیدرآباد‘ لاڑکانا‘ سکھر‘ روہڑی‘ نوابشاہ‘ اوباڑا‘ خیرپور‘ دادو‘ جیکب آباد‘ سجاول‘ ٹنڈومحمد خان سَنے سندھ دے بہت سارے شہراں توں وکھ اسلام آباد پریس کلب ساہمنے ”کراچی اُتے قبضا نامنظور“ دے نعرے ہیٹھ وکھالے کیتے تے ریلیاں کڈھیاں۔ ایہناں وکھالیاں ا وچ تقریرکاراں نے آکھیا کہ نہ سندھ دی ونڈ برداشت کراں گے نہ کراچی اُتے کسے دا قبضاہون دیاں گے۔

سندھ دی حد تائیں پیپلز پارٹی دا ایہ ڈراما بہت چنگا اے۔ سندھ دی ونڈ بارے گل کرن دا اختیار نہ وفاقی سرکار نوں اے‘ نہ کسے ہور نوں۔ کسے صوبے دیاں حداں بدلن بارے ملکی دستور وچ اک طریقا مِتھ دِتا گیا اے جہدے بغیرصوبے نوں ونڈیا نہیں جا سکدا نہ ای اوہدیاں حداں وچ کوئی تبدیلی ہو سکدی اے۔ سندھ بارے پیپلز پارٹی دی ایہ کوشش چنگی اے تے پنجابیاں دی اکثریت وی ایہدے نال اے۔

پر پنجاب دی واری پیپلز پارٹی نوں کیہ ہو جاندا اے؟ نویں نویں سیاست وچ آئے نوجوان بلاول بھٹو زرداری‘ لاہور وچ بہ کے پنجاب ونڈن دیاں گلاں کردے نیں جد کہ اوہناں دے پنجابی بوٹ پالشیے تے جھولی چُک وی پوری پوری بے غیرتی نال اوہناں دا ساتھ دیندے نیں۔ جے پارٹی پنجاب دی ونڈ دی گل نرا پنجاب دے جنوبی علاقیاں وچ مقبولیت یاں ووٹاں دے راتب دی خاطر کردی اے تاں اوہدا رویّا افسوسناک ای نہیں‘ احمقانا وی اے کیوں جے پارٹیاں اپنے منشور پاروں حکمرانی کردیاں ہوندیاں نیں‘ نعرے بازی پاروں نہیں۔ منشور نوں چھڈ کے نعرے بازی اُتے آدھار کرن دا ای نتیجا اے کہ اوہی پیپلز پارٹی جو کدی پورے پنجاب تے سندھ دی وارث سی‘ اج ادھے سندھ دی پارٹی اے۔

بلاول بھٹو زرداری ای نہیں‘ اوہناں دے بوٹ پالشیے دو نمبری پنجابی لیڈراں نوں وی سمجھ لینا چاہیدا اے کہ پنجاب دی ونڈ دی گل کر کے اوہ باقی پنجاب وچ مقبولیت دی بجائے مستقبل وِچ چھتر کھان دا سامان کر رہے نیں۔ اوہناں دی ڈرامے بازی پاروں پورے پنجاب وچ پیپلز پارٹی دا بوریا بسترا گول ہو چُکیا اے تے اپنیاں کرتوتاں پاروں کل نوں سندھ اندر وی صفایا ہو جاون دے پورے امکان موجود نیں۔

جے پیپلز پارٹی مستقبل وچ کدھرے ووٹ لین دی سوچ رکھدی اے تاں اوہنوں پنجاب تے سندھ واسطے اِکو پالیسی اختیار کرنی پئے گی۔ جے سندھ دی ونڈ نہیں تاں پنجاب دی ونڈ وی نہیں۔ مِٹھّا مِٹھّا ہَپ ہَپ‘ کوڑا کوڑا تُھوہ نہیں ہو سکدا۔ سندھ ونڈن دے خلاف جلسے جلوس تے پنجاب دی واری اوہدے اُلٹ عمل؟ ایہ کہڑے اصول مطابق اے؟ تے کہڑے اسمانی صحیفے وِچ لکھیا اے؟ بہتر اے کہ ایہ پہلاں ای بندے بن جاون نہیں تاں پنجاب وچوں ایہناں دا صفایا انج ہووے گا کہ صرف سیاسی تواریخ وچ ای ایہناں دا ذکر کالے لفظاں نال ہویا کرے گا۔