پاکستان کلا ملک اے جہنے دہشتگردی دا مقابلا کیتا،فوج سنے ساریاں اداریاں وچ اتفاق اے کرپشن اُتے کوئی سمجھوتا نہیں:صدر پاکستان ……٭رویل نیوز٭

اسلام آباد (نمایندا رویل) صدر مملکت ڈاکٹر عارف علوی نے کہیا اے کہ فوج‘ عدلیا‘ میڈیا‘ حکومت‘ پارلیمنٹ سنے سارے ادارے اِک پیج اُتے نیں تے فوج سنے سار ے اداریاں وچ اتفاق اے کہ کرپشن اُتے کوئی سمجھوتا نہیں ہونا چاہیدا اے۔ پارلیمنٹ دے سانجھے اجلاس نال تیجی وار خطاب کردیاں ہویاں صدر مملکت ڈاکٹر عاف علوی نے کہیا کہ پاکستان دے سارے سیاسی‘ عسکری ادارے‘ عدلیا تے میڈیا ملک دی تعمیر و ترقی تے کرپشن دے خاتمے لئی اِک صفحے اُتے نیں۔ اوہناں نے کرونا وایرس بارے حکومتی اقدامات دا اعتراف دنیا نے کیتا‘ وباء دے بارے وچ لوکاں نُوں ڈرایا جا رہیا سی کہ سڑکاں اُتے روگی ہون گے۔ سائنس تے ڈیٹا دے حوالے توں طارق بن زیاد ذہن وچ آندا اے جہنے کشتیاں ساڑیاں تے فتح حاصل کیتی۔ اسیں ایہو جہیا ای وژن اختیار کیتا تاں جے معیشت وی چلے تے عبادتگاہاں وی کھلیاں رہن۔ اللہ دی مدد اودوں آندی اے جدوں تُسیں امت دا خیال رکھو‘ سمارٹ لاک ڈاؤن کامیاب رہیا‘ لوکائی تے علماء دا وی ایس حوالے توں شکر گزار آں۔ اوہناں نے کہیا کہ پاکستان کلا ملک اے جہنے دہشتگردی دا مقابلا کیتا۔ انسانی حقاں دے طعنے دین والے آپ 100 مہاجرین نُوں وی پناہ نہیں دے سکدے۔ دوجا وڈا کارناما افغان مہاجرین نُوں پناہ دِتی۔ انتہاء پسندی دا مقابلا کرنا وی قوم دی وڈی جت اے۔ میں فوجیاں تے سیاستداناں نُوں مبارکباد پیش کردا آں۔ عارف علوی نے کہیا کہ افسوس دی گل اے کہ پاکستان وچ چنگیاں خبراں دا پرچار نہیں کیتا جاندا‘ نویں حکومت آئی تے ملک کرپشن وچ جکڑیا ہویا تے قرضے وچ ڈُبیا ہویا سی۔ سانوں آندیاں ای آئی ایم ایف تے سنگیاں توں امداد دا مشورا دِتا گیا۔ قوم دی ودھان دی بجائے سانوں کہیا گیا ایہ نہیں کیتا گیا اوہ نہیں کیتا گیا۔ ایہ زمانا اوہ اے جدوں قم نُوں کھڑا ہون دا کہنا چاہیدا اے کہ تُسیں مقابلا کر سکدے او۔ صدر مملکت دا کہنا سی کہ خارجا محاذ اُتے حکومتی کمکاری تعریف جوگ اے۔ وزیراعظم نے جس طرحاں کشمیر دا مسئلا اجاگر کیتا تے اسرائیل بارے دو ٹوک مؤقف اختیار کیتا ایہدے اُتے اوہناں نُوں مبارکباد پیش کردا آں۔ وزیراعظم دے اسرائیل نُوں رَد کرن دے بیان نال ہور ملکاں نُوں وی ہمت ملی۔ سعودی عرب تے پاکستان اِک دوجے دی فکر کرن والے سنگی ملک نیں۔ اپنے خطاب وچ صدر نے مسئلا کشمیر اُتے پاکستان دی تائید کرن والے دوست ملکاں چین‘ ترکی‘ ملائیشیا‘ آذر بائیجان تے ایران دا وی شکریا ادا کیتا۔ اوہناں نے کہیا کہ بھارت وچ تناؤ ساڈے لئی وی نقصان دہ اے۔ بھارت وچ ہندوتوا فاش ازم نہیں چل سکدا تے چھیتی کشمیر ازاد ہووے گا۔ اسیں پاکستان وچ شہریاں نُوں آپس وچ جوڑ رہے آں‘ ہندستان وچ مودی حکومت سڑے اُتے تیل سُٹن دا کم کر رہی اے۔