حکومتی اقدامات دے سِٹے ساہمنے آ رہے نیں، مشکل ویلا چھیتی ختم ہوندا ویکھ رہیا آں ……٭رویل نیوز٭

اسلام آباد (نمایندا رویل) وزیراعظم عمران خان نے بنکاں ولوں تعمیرات دے شعبے وچ متحرک کردار ادا کرن دے عزم اُتے اطمینان دا اظہار کردیاں ہویاں کہیا کہ تعمیرات دا شعبا معیشت دے ودھا دا ضامن اے‘ تعمیرات دے شعبے دے فروغ نال بنکاں لئی منافع بخش بزنس دے بے شمار موقع میسر آن گے۔ جمعرات والے دن وزیراعظم عمران خان دی صدارت ہیٹھ نیشنل کوآرڈینیشن کمیٹی برائے ہاؤسنگ‘ کنسٹرکشن اینڈ ڈویلپمنٹ دا ہفتا وار اجلاس ہویا جہدے وچ وزیر اطلاعات سینیٹر شبلی فراز سنے ہورا نے رلت کیتی۔ اجلاس وچ ملک دے سارے وڈے بنکاں دے صدر تے آباد دے نمایندیاں نے وی رلت کیتی۔ اجلاس وچ رلتیاں نُوں تعمیرات دے شعبے وچ بنکاں ولوں سوکھے قرضیاں تے رقماں دی فراہمی د ے حوالے توں ہون والی ٹورا کاری اُتے بریفنگ دِتی گئی۔ پاکستان پاکستان بنکس ایسوسی ایشن نے وزیراعظم نُوں دَسیا کہ حکومت ولوں تعمیرات دے فروغ لئی موافق پالیسیاں تے بنکاں لئی سہولت کاری نال نجی بنکاں دی حوصلا افزائی ہوئی اے۔ سارے بنک تعمیرات دے فروغ خصوصن گھٹ تے درمیانی آمدنی والے بندیاں نُوں گھر دی سہولت دی فراہمی وچ اپنا کردار ادا کرن لئی پُرعزم نیں۔ صدر بنک آف پنجاب تے صدر بنک الفلاح نے نواں پاکستان ہاؤسنگ پروگرام دے تحت گھراں دی اُساری دے فروغ لئی متعارف کروائے جان والے پراڈکٹَس اُتے بریفنگ دِتی۔ ہور بنکاں دے صدور نے وزیراعظم نُوں دَسیا کہ تعمیرات دے فروغ دے حوالے توں بنکاں ولوں پراڈکٹ تیار کیتے جا چکے نیں جہڑے کہ بڑی چھیتی متعارف کروا دِتے جان گے۔ وزیراعظم نے اجلاس نال خطاب کردیاں ہویاں کہیا کہ حکومت ولوں بنکاں دے سارے تحفظات نُوں دور کر دِتا گیا اے۔ بنکاں ولوں دِتے جان والے قرضیاں اُتے حکومت ولوں اعلان کردا سبسڈی دی فوری فراہمی لئی سٹیٹ بینک نُوں با اختیار بنا دِتا گیا اے۔ فور کلوڑر قوانین دے معاملے دی مؤثر پیروی کیتی جا رہی اے‘ اوہناں نے کہیا کہ بنکاں نُوں ہدایت کیتی کہ گھراں دی تعمیر دے حوالے توں درخاستاں نُوں سوکھا تے سہل بنایا جاوے تاں جے گھٹ تے وچکارلی آمدنی والے بندے ایس سہولت توں ودھ توں ودھ فایدا چُک سکن۔ ایس توں وکھ وزیراعظم عمران خان نال مشیر پارلیمانی امور بابر اعوان نے ملاقات کیتی جہدے وچ آئینی‘ سیاسی تے قانونی امور اُتے تفصیلی مشاورت کیتی گئی۔ وزیراعظم نے پارلیمانی امور دی بہترین انجام دہی اُتے بابر اعوان دی کمکاری نُوں سلاہندیاں ہویاں کہیا کہ حکومت احتساب تے ریفارم دے پروگرام اُتے سختی نال عملدرآمد کرے گی‘ 5 اسل وچ ادارا جاتی تبدیلی دا ایجنڈا پورا کر دواں گے۔ اوہناں نے کہیا کہ مشکل ویلے وچ کیتے اوکھے فیصلیاں دا پھَل ملنا شروع ہو چکیا اے‘ حکومت دا نواں پارلیمانی سال ملکی ترقی تے خشحالی دا سال ہووے گا‘ معاشی استحکام حاصل کرنا حکومت دی پہلی ترجیح اے‘ حکومتی اقدامات دے نتیجے وچ مشکل ویلا چھیتی ختم ہوندا ویکھ رہیا آں۔ایس توں وکھ وزیراعظم نے خیبر پختونخوا وچ ہر خاندان نُوں صحت کارڈ فراہمی دی تقریب نال خطاب کردیاں ہویاں کہیا کہ خیبر پختونخوا وچ ہر خاندان نُوں 10 لکھ رُپئے تک دی ہیلتھ انشورنس دِتی جا رہی اے۔ عزت تے کامیابی لئی محنت کرنی پیندی اے‘ اللہ نُوں خُش کرنا پیندا اے۔ وزیراعظم نے کہیا کہ لوکائی دی خدمت توں ودھ کے اللہ نُوں خُش کرن والی کوئی شے نہیں‘ لوکاں نُوں غربت دی لکیر توں تھلے لے جان والی وڈی وجھا بیماری اے۔ اوہناں نے کہیا کہ بیماری نال گھر دا پورا بجٹ متاثر ہو جاندا اے۔ کرونا وباء دے باوجودصحت کارڈ دے اجراء اُتے صوبائی حکومت نُوں مبارکباد دیندا آں۔ وزیراعظم نے کہیا کہ خیبر پختونخوا نُوں ویکھ کے ہُن ہور صوبیاں اُتے وی ہیلتھ انشورنس لئی دباء ودھے گا۔ کوشش ہووے گی کہ پنجاب حکومت وی ہر خاندان نُوں ہیلتھ انشورنس فراہم کرے۔ سندھ وچ وی لوکائی مطالبا کرے گی کہ اوہناں نُوں وی ہیلتھ انشورنس دِتی جاوے۔ ہیلتھ کارڈ دی وجھا توں ہسپتالاں اُتے وی کمکاری بہتر کرن دا دباء ودھے گا۔ اوہناں نے کہیا کہ ہیلتھ کارڈ دی وجھا توں صحت دیاں سہولتاں پنڈاں تے چھوٹے شہراں وچ وی پہنچن گیاں۔ وزیراعظم نے کہیا کہ ممکن بناؤ کہ سبھ دے کول ہیلتھ کارڈ ہووے ایہدے نال ڈیٹا بیس بنے گا۔ ڈیٹا بیس بنن نال پیسے دا خرچ مانیٹر کیتا جا سکے گا۔وزیراعظم نے کہیا کہ اسیں اوس راہ ول جا رہے آں جہڑا بانیان پاکستان دا مشن سی۔