مہنگائی ـــــــ٭رویل کالم٭

مہنگائی ـــــــ٭رویل کالم٭

شیخ محمد انور

مہنگائی نے ایس سال ہور کنے گھراں دیاں عید دیاں خشیاں کھو لئیاں؟ لا قانونیت، آپادھاپی نے عام بندے دے حوصلے پست کردتے نیں۔ عید اوہناں خشیاں دا ناں اے جو دل وچوں پھوٹدیاں نیں۔ عید الاضحٰی مسلماناں لئی انتہائی خشی دا تہوار اے کیوں کہ عید الاضحٰی حج دے فورن بعد منائی جاندی اے۔ مسلماناں لئی ایہ دن خشی دا دن اے جہنوں اوہ اپنی حیثیت مطابق گزاردا اے۔ ایس دن لئی ہر کسے دی کوشش ہوندی اے کہ یاں تے اوہ اپنے بالاں لئی بکرا خریدے یاں جے اوہدی جیب اجازت نہ دیوے تے فیر اوہ وڈے جنور وچ حصا پاندا اے۔ ہر کوئی اپني ایس مذہبی تہوار نوں شایان شان نال منان لئی بھرپور کوشش کردا اے پر ویکھیا ایہو گیا اے کہ ساڈے ایتھے عید توں پہلے ای مہنگائی عروج اُتے ہوندی اے۔ اوہناں شیواں جہناں دی طلب زیادا ہوندی اے اوہدی رسد وچ مصنوعی قلت پیدا کرکے مہنگائی دا جواز بنایا جاندا اے تے طلب رسد دے بنیادی اصول تحت زندگی دیاں لوڑاں دی ہر شے دیاں قیمتاں وچ بے پناہ وادھا کیتا جاندا اے ایس حال وچ مہنگائی نوں جایز قرار دین لئی اک بے وزن دلیل ایہ وی ہوندی اے کہ ایس مہینے کیوں کہ پیداوار دی اوسط تے گلت کار گھٹ ہوجان پاروں گھٹ ہوجاندی اے ایس لئی شیواں دا مصنوعی بحران بنا دتا جاندا اے تے اوہ جنور جو عام دناں وچ کجھ ہزاراں دا ملدا اے ایس مذہبی تہوار دے موقع اتے اوہدی قیمت اسمان نال گلاں کررہی ہوندی اے۔ ہونا تے ایہ چاہیدا اے کہ مذہبی تہوار دے موقع اتے مناسب فایدا لے کے ایہنوں ویچیا جاوے نہ کہ لٹ مار کیتی جاوے۔ اہل ثروت لوک تے وڈے وڈے سٹوراں توں خریداری کرلیندے نیں پر سفید پوش لوکاں کول یوٹیلٹی سٹورز توں سوا کوئی راہ نہیں ہوندی۔ ایہناں سرکاری سٹوراں توں لیناں وچ لگ کے جوں خریداری کرنی پیندی اے اوہ ایس جدید دور وچ ایس زمانے وچ ویلا ضایع کرن والی گل اے۔

ملازمت پیشا لوک خاص کر تنخاہ وچ گزارا کرن والے لوکاں نوں وادھو خرچے لئی اینا ای پریشان ہونا پیندا اے جنا کہ حکومتان نوں اپنا بجٹ بنان لئی۔ پر روز بروز مہنگائی نے غریباں کولوں وی خشی سہن دی طاقت کھو لئی اے تے عید دے موقع اتے اپنے بال بچیاں لئی نویں کپڑے، جتیاں تک دی خریداری بوجھ بنا دتی اے۔ ساڈے معاشرے وچ موجود مختلف طبقیاں وچوں نوازیاں جان والا طبقا ہر مشکل تے مالی تکلیف نال ازاد اے پر متوسط لوکاں توں لے کے انتہائی محدود آمدنی والیاں لئی موجودا عہد دی آمد اک جان لیوا خشی برابر سی۔ ایس لئی مہنگائی تے کرونا نے لوکاں نوں سوچن سمجھن دی صلاحیت کھو لئی اے کہ اوہ ایس تہوار نوں ہس کے منان یاں رو کے پر ایہدے باوجود وی کجھ نہ کجھ تے بچیاں لئی کرنا ای پیندا اے۔ حیرت انگیز گل ایہ کہ گراں فروشاں چینی 100 رُپئے کلو ویچنا شروع کردتی اے۔ مزے دی گل ایہ کہ ایہناں ذخیرا اندوزاں نوں پچھن والی کوئی نہیں۔ ساڈے معاشرے وچ اج وی ایہو جہے غریب محلے نیں کہ جتھے وسف والے دکان توں سودا سلف لیان دے عادی انج نیں کہ چھٹانک یاں پا چینی روز منگوان دی استطاعت رکھدے نیں ایس سال تے چکن دیاں قیمتاں وچ وی بے پناہ وادھا ہویا جہدے پاروں عام لوکائی نے سبزی ول دا رُخ کیتا تے معلوم ہویا کوئی سبزی وی 100 رُپئے توں گھٹ نہیں۔ ویکھیا جاوے تے اک پاسے تے کرونا دے خوف نال کوکاں دی روٹی بند ہوگئی اے پر دوجے پاسے مہنگائی فروشاں لوکاں دا لہو چوسنا شروع کردتا اے۔ ویکھیا جاوے تے پچھلے سال دی نسبت ایس سال ہر شے دی قیمت وچ 40 توں 50 فیصد وادھا ہویا اے۔ کجھ شیواں وچ تے خورے ایس توں وی ودھ وادھا ہویا ہووے۔ کہڑا ایسا شخص ہووے گا جو اپنے بچیاں نوں چنگے لیڑیاں وچ نہ ویکھنا چاہندا ہووے گا یاں اوہدی خاہش نہ ہووے گی کہ گھٹو گھٹ عید اتے تے اوہدے گھر چنگا کھانا پکایا جاوے یاں بچیاں دی خاہش اتے گھٹو گھٹ اجتماعی قربانی وچ حصا پایا جاوے۔

ہونا تے ایہ چاہیدا سی کہ ایس واری لوکائی نوں اپنے فریج خالی رکھنے چاہیدے سن پر ایسا ہویا نہیں۔ کجھ سمجھ نہیں آوندا نکیاں نکیاں خاہشاں کویں پوریاں ہون گیاں؟ ایس واری جتھے مہنگائی نے لوکاں دا لک بھن دتا اے اوتھے بے حسی وی بہت زیادا ودھ گئی اے۔ دکان دار نال قیمت اتے ذرا جہی بحث کرو تے بدتمیزی اتے اُتر آوندے نیں ایتھے تیکر کہ کپڑا کڈھواو تے پسند نہ آوے تے اوہناں نوں زحمت ہوندی اے۔ اندازا کرو جہناں دے 4,5 بچے ہون تے تنخاہ 20 ہزار ہووے اوہناں نوں اپنے بھین بھرواں نوں عید دینا کویں ممکن ہووے گا؟

گوشت کھان دا تصور تے غریب بندے لئی ختم ای ہوندا جارہیا اے رمضان المبارک تے عید دے موقع اتے وی کُکڑی دا گوشت 350 رُپئے کلو رہیا۔ سیب جو عام دناں 60 رُپئے وِکدا سی اج کل 150 رُپئے وک رہیا اے۔ رقم الحروف نوں خریداری دے سلسلے وچ بازاراں وچ جان دا موقع ملیا تے اوتھے وی سوانیاں دی خریداری وچ گلے شکوے زیادا سنائی دتے۔ کُڑیاں لئی چوڑیاں تے مہندی وغیرا دی خریداری عروج اتے رہی پر اک ایہو جہی غریب سوانی جو کسے دے گھر وچ نہ صرف آپ کم کردی اے سگوں اوہدے بچے وی ماہوار تنخاہ اتے لوکاں دے گھراں وچ کم کردے نیں اوہناں لئی وی عید زحمت توں وکھ کجھ نہیں سی۔