وزارت صحت سکول کھولن لئی تفصیلی  طریقے بیان کرے گی،سکول کھولنا حالات دی درستی نال  ممکن اے: وفاقی وزیر تعلیم شفقت محمود   ……٭رویل نیوز٭

اسلام آباد (بیورورپورٹ) وفاقی وزیر تعلیم شفقت محمود نے کہیا اے کہ جے حالات ٹھیک ہوئے تے 15 ستمبر نُوں سکول کھولاں گے‘پچھلے 2سالاں وچ شعبا تعلیم نُوں کئی چیلنجز دا ساہمنا کرنا پیا اے‘ تعلیم وچ طبقاتی ونڈ نُوں ختم کرن لئی اقدامات کررہے آں‘ اِک تعلیمی نصاب دا اجرا کیتا جا چکای اے‘ پاکستان دی 73سالا تواریخ وچ ایہ کم پہلے نہیں ہویا‘ پہلے مدرسے‘ سکول تے ایلیٹ سکولز دا اپنا اپنا نظام سی۔ وفاقی حکومت دیاں کوششاں نال پہلی توں پنجویں تک اِک تعلیمی نصاب بن گیا اے‘ ایہ نصاب سارے مکاتب فکر نال مشاورت دے بعد بنایا گیا اے‘ مجوزا نصاب وزارت تعلیم دی ویب سائٹ اُتے موجود اے‘ وفاقی حکومت ہُن ماڈل ٹیکسٹ بک بنا رہی اے‘ اپریل 2021 وچ پورے ملک دے سکولاں وچ اِک نصاب ہووے گا۔ ایہناں خیالاں دا اظہار اوہناں نے پچھلے دن پریس کانفرنس خطاب کردیاں ہویاں کیتا۔ اوہناں نے کہیا کہ چالو سال کووڈ 19کارن سکول‘ جامعات بند کرنیاں پئیاں‘ سارے اہم فیصلیاں وچ صوبائی اکائیاں نُوں نال لے کے چلے۔ سکول کالجز بند کرنا ہووے یاں 9 ویں‘ 10 ویں‘ 11 ویں‘ 12 ویں دے امتحانات تے بچیاں دی اپ گریڈیشن بارے مشاورت نال فیصلے کیتے گئے۔ وفاقی حکومت نے بچیاں نُوں اگلیاں کلاساں وچ اپ گریڈ کرن لئی اِک فارمولا بنایا جہدے تحت 29 بورڈ ز نے عمل کیتا‘ 1 فارمولے دے تحت بچیاں نُوں پروموٹ کیتا گای‘ کیمبرج دے رزلٹ نال لوکاں نُوں بہت پریشانی دا ساہمناکرنا پیا‘ اسیں کیمبرج نال گل کیتی‘ اسیں اوہناں نُوں دَسیا ایہ رزلٹ سانوں قبول نہیں‘ کیمبرج نے ساڈی گل نُوں تسلیم کیتا ایہ وڈی کامیابی اے‘ 7 ستمبر نُوں بین الصوبائی وزرائے تعلیم اجلاس ہووے گا‘ امید اے اسیں 15 ستمبر نُوں سکول کھول دواں گے‘ وزارت صحت سکولز کھولن لئی تفصیلی طریقا کار وضع کرے گی۔ وفاقی وزارت تعلیم نے 7 اپریل نُوں ٹیلی سکول دا اجرا کیتا‘ گیلپ پول مطابق 70 توں 80 لکھ بچے تعلیم حاصل کر رہے نیں‘ ہائر ایجوکیشن لئی آن لاین تعلیم دا اغاز کیتا گیا۔ انٹرنیٹ بارے بچیاں نُوں بہت اوکڑاں دا ساہمنا کرنا پیا‘ وزیراعظم نے ایس معاملے اُتے اجلاس کیتے‘ ہُن پورے ملک وچ انٹرنیٹ سروس دین جا رہے آں۔ کمی ایہ سی کہ درس نظامی دی ڈگری نُوں منیا نہیں جاندا سی‘ مدرسیاں دے نال معاہدا کیتا اے کہ درس نظامی دے نال عمومی نصاب وی پڑھانا لازمی ہووے گ‘ بین الصوبائی وزرائے تعلیم کانفرنس وچ سارے صوبیاں دی مشاورت نال سبھ فیصلے کیتے گئے‘ چھیویں توں 10 جماعت لئی اِک جامع نصاب اُتے کم کیتا جا رہیا اے‘ ہُن غیر مسلم پڑھیار سکولاں وچ اخلاقیات دے مضمون دی بجائے اپنا مذہب پڑھ سکن گے‘ ساڈا نصاب دور حاضر دے سارے تقاضے پورے کردا اے‘ اقلیتاں لئی اوہناں دے مذہباں دیاں شیواں نصاب وچ شامل کیتیاں گئیاں نیں‘ وزیراعظم دی ہدایت اُتے بچیاں نُوں ہنر وی سکھایا جاوے گا‘ ہنر مند پاکستان پروگرام دا اسیں اغاز کیتا‘ ہنر مند پاکستان راہیں ہنر دی تعلیم دے رہے آں‘ 1 لکھ 70 ہزار بچیاں نُوں ہنر دین دا پلان بنایا اے‘ 50 ہزار بچیاں نُوں مختلف اداریاں وچ گھل چکے آں‘ احساس پروگرام راہیں 50 ہزار بچیاں نُوں شکالر شپس دین دا پروگرام بنایا اے جہناں وچ 1 ہزار نرسز نُوں سکالر شپس دِتیاں جان گیاں‘ آرٹ تے کلچر دی ایجوکیشن لئی 1 ہزار توں ودھ سکالر شپس نیں‘ بی اے‘ بی ایس دا کورس 2 سال دی بجائے 4 سال دا کر دِتا اے‘ اسلام آباد وچ 7 نویں سکولز بنا رہے آں‘ 11 ہزار بچے اسلام آباد وچ سکولاں وچ نہیں جا رہے س‘ 7 ہزار بچے ہُن سکولاں وچ جا رہے نیں۔ اک تعلیمی نصاب دا اجرا سکولاں وچ طبقاتی ونڈ ختم کرن ول اِک قدم اے‘ ایلیٹ سکول دا بچا مدرسے دے سکول دے بچے نال گل نہیں کر سکدا اے‘ مشاورت نال سارے مکتبا ہائے فکر‘ صوبیاں تے ماہرین دی مشاورت نال اِک نصاب بنایا گیا اے‘ اپریل 2021 توں پاکستان دے سارے سکولاں وچ اِک نصاب پڑھایا جاوے گا‘ مدرسیاں نے تعلیم لئی اپنا حصا پایا اے‘ مدرسے حکومت توں پیسے نہیں لیندے ایہناں نُوں خراج تحسین پیش کردے آں‘ سارے مدرسے ہُن قومی نصاب وی پڑھان گے‘ سارے مدرسیاں نُوں اسیں رجسٹرڈ کراں گے‘ مدرسیاں توں نکلے ہوئے بچے مختلف شعبیاں وچ جان گے۔