وِرودھی پارٹی  چاہندی ا ے کہ پاکستان بلیک لسٹ وچ چلا جاوے:  شبلی فراز……٭رویل نیوز٭

اسلام آباد (نمایندا رویل) وفاقی وزیر اطلاعات و نشریات سید شبلی فراز نے کہیا اے کہ میاں نواز شریف باہر بَہ کے سیاست کر رہے نیں‘ اسیں اوہناں نُوں واپس لیاواں گے‘ قانون اپنا راہ لوے گا‘ ساڈیاں کوششاں تیز ہو گئیاں نیں۔ اسلام آباد وچ پریس کانفرنس کردیاں ہویاں اوہناں دا کہنا سی کہ نواز شریف لندن وچ بَہ کے کافی پی رہے نیں‘ اوتھوں بلاول بھٹو تے فضل الرحمان نال رابطا اے۔اوہناں دا جے کسے نال رابطا نہیں‘ تے اپنے بھرا شہباز شریف نال نہیں اے۔ شبلی فراز نے کہیا کہ نواز شریف نُوں واپس آنا چاہیدا اے‘ اوہ عدالت دے ساہمنے سوالاں دے جواب رکھن۔ وزیر اطلاعات دا کہنا سی کہ نواز شریف اِک بیماری دا بہانا بنا کے باہر چلے گئے سن۔ اوہناں نے قانون دا مذا ق اُڈایا تے بیماری دا بہانا بنا کے ملک توں فرار ہوئے‘ پنجاب سرکار نے اوہناں توں میڈیکل رپورٹاں منگیاں پر لندن وچ علاج تے کیہ اِک ایکسرے تک نہیں کیتا گیا۔ اوہناں دا کہنا سی کہ ستمبر وچ فیٹف نے پاکستان دے حوالے توں اہم فیصلا کرنا اے۔ اپوزیشن چاہندی ا ے کہ پاکستان بلیک لسٹ وچ چلا جاوے۔ ایہ اپنے مفادات اُتے ملکی مفادات نُوں قربان کر رہے نیں۔ ملک بلیک لسٹ ہو جاوے تے کرنسی اُتے دباء پیندا اے۔ جے بلیک لسٹ وچ گئے تے شیواں ہور مہنگیاں ہو جان گیاں۔ شبلی فراز نے کہیا کہ اپوزیشن نے ہمیشا این آر او منگیا۔ اپوزیشن چاہندی اے کہ نیب نُوں ختم کر دِتا جاوے جہدے نال ایہناں نُوں مقدمیاں وچ چھوٹ مل جاوے پر اسیں اپوزیشن دی بلیک میلنگ وچ نہیں آواں گے۔ اپوزیشن نُوں ملک نہیں لُٹیا مال بچان دی فکر اے۔ ایہناں نے ملکی اداریاں تے معیشت نُوں تباہ کیتا‘ جہدی وجھا توں مہنگائی اے۔ ماضی وچ جس طرحاں ملک نُوں چلایا گیا‘ سارے جاندے نیں۔ پچھلے حکمراناں نے اپنے مفادات لئی اپنا طریقا حکمرانی رایج کر رکھیا سی۔ اوہناں دا کہنا سی کہ کرونا وایرس کھلریا تے اپوزیشن نے حکومت اُتے دباء پایا۔ اپوزیشن دا مقصد سی کہ کرونا نال ہلاکتاں ودھن تے ملکی معیشت نُوں نقصان ہوے پر وزیراعظم عمران خان دی نیت ٹھیک سی تے اللہ نے مدد کیتی۔ وفاقی وزیر نے کہیا کہ کجھ لوکاں دا خیال سی کہ لوک بھُکھ نال مر جان گے پر اسیں چاہندے ساں غریب لوکاں دا روزگار چلدا رہوے۔ وزیراعظم نے نیک نیتی نال سمارٹ لاک ڈاؤن دا فیصلا کردیاں ہویاں کرونا دے دوران غریب طبقے نُوں ریلیف دِتا۔ اللہ تعالیٰ نے کرونا دی مشکل توں کافی حد تک کڈھ دِتا اے۔ دنیا حیران اے کہ پاکستان ایس مسئلے توں کویں نکل آیا۔