سعودی عرب تے پاکستان اِک جان دو دل نیں:وفاقی وزیر ریلوے شیخ رشید احمد ……٭رویل نیوز٭

راولپنڈی (نمایندا رویل) وفاقی وزیر ریلوے شیخ رشید احمد نے کہیا اے کہ سعودی عرب تے پاکستان اِک جان دو دل نیں‘ ریلوے ری سٹرکچرنگ چار ہفتیاں توں پہلے ہو جاوے گی‘ سبھ توں وڈا کم ایم ایل ون دا اے‘ جہڑا انقلاب لیائے گا تے ایہ انقلاب پاکستان دی تقدیر بدل دیوے گا‘ ڈیڈھ لکھ لوکاں نُوں روزگار دیوے گا تے ایہدے اُتے کوئی کراسنگ نہیں ہووے گی‘ عثمان بزدارقایم دایم رہن گے‘ چین دے نال ریلوے ٹریک دے قیام دی مفاہمت دی یاداشت دا معاہدا ہو چکیا جہڑا کہ بی او ٹی دی بنیاد اُتے ہووے گا‘ لئی ایکسپریس وے دے حوالے توں کوئی رکاوٹ نہیں‘ ساری فزیبلٹی بن گئی‘ پی سی ون بن گیا‘ شہباز شریف نُوں مریم پھسان جا رہے نیں‘ مریم جہڑے پتھر لے کے آئی اے ایہ سار پتھر نیب نُوں نہیں مارے گئے سگوں شہباز شریف دی سیاست نُوں مارے گئے نیں‘ انشاء اللہ آٹا کھنڈ وی سستے ہوون جا رہے نیں‘ آٹا امپورٹ کیتا اے‘ کھنڈ وی امپورٹ کرن جا رہے آں‘ سارے ذخیرا اندوزاں نُوں تباہ و برباد کر دواں گے‘ بے شک سانوں امپورٹ شدا کھنڈ سبسڈی دے کے سستی ویچنی پئی تے دواں گے پر ذخیرا اندوزی دا خاتما ہووے گا‘ جتھوں تک اپوزیشن دی گل اے فضل الرحمان نے تحریری معاہدے دی درخاست کیتی اے تے کہیا اے کہ میرے نال وعدا کرو کہ مینوں چھڈ کے نہیں جاؤ گے‘ میں فضل الرحمان نُوں کہندا آں کہ اوہ چھڈ کے جان گے‘ اول تے آن گے ای نہیں‘ جنے لوک ٹی وی اُتے بول رہے نیں ایہ سبھ اوہ نیں جہناں دے نیب وچ کیس نیں‘ عمران خان کوئی وی وڈا فیصلا کر سکدے نیں پر این آر او منگن والیاں نُوں شرمندگی ہووے گی‘ ایہناں نُوں عدالتاں دے ٹرایل توں لنگھنا پوے گا۔ ایہناں خیالاں دا اظہار وفاقی ویر نے جمعے نُوں پوسٹ گریجیوٹ کالج برائے خواتین‘ صدر دے افتتاح دے موقع اُتے منعقدا اجالس نال خطاب تے بعد وچ میڈی انال گلبات کردیاں ہویاں کیتا۔ وفاقی وزیر ریلوے نے خطاب کردیاں ہویاں کہیا کہ چنگیاں ماواں ای عظیم قوم بنا سکدیاں نیں‘ چنگی تعلیم لئی ماں دا تعلیم یافتا ہونا ضروری اے‘ میری ماں تے ان پڑھ سی‘ 74 ورھیاں وچ ایہ پہلا کالج اے جہڑا کنٹونمنٹ دے علاقے وچ قایم کیتا گیا اے تے کسے سول گورنمنٹ نے بنایا اے‘ ایہدا کیس وی ہائیکورٹ وچ آپ لڑیا ایتھے پٹرول پمپ بنانا چاہندے سن‘ ایس 400 ملین دی تھاں دا سودا وی کر دِتا گیا سی‘ اوہ چار سو ملین کینسل کروائے‘ پٹرول پمپ خلاف کیس جتیا تے 100 ملین نال کالج بنایا‘ 14 ورھے لگے ایس کالج نُوں بنن وچ‘ کسے حکومت نے ایہ کالج نہیں بنایا سگوں ایہ کریڈٹ عمران خان دی حکومت نُوں جاندا اے‘ ایس کالج نُوں پنجاب حکومت نُوں منتقل وی کیتا‘ ریلوے دی ملکیت کسے صوبے نُوں منتقل ہونا بہت مشکل اے‘ اوہناں نے کہیا کہ ساڈا ایم ایل ون پراجیکٹ بہت وڈا پراجیخٹ اے تے انٹر نیشنل یونیورسٹی وی بناواں گے پر ایہدے لئی تھاں دا ایشو اے پر میں فیصلا کیتا اے کہ ایہدے لئی ریلوے دی زمین دِتی جاوے‘ آئی ٹی یونیورسٹی دے حوالے توں تھوڑی سستی ہو گئی تے اوہ ساڈے ہتھوں نکل گئی‘ ایہ بڑا ظالم معاشرا اے‘ کوشش کراں گے اوہ بلڈنگ دُبارا ساڈے کول آ جائے۔ اوہناں نے کہیا کہ بیماری دے دناں نُوں وی میں ضایع نہیں کیتا تے میں اِک کتاب لکھی جہڑی 6 ستمبر نُوں چھاپی جاوے گی۔