کرونا دی ویکسین دو مہینے تک پاکستان وچ ملے گی:ڈاکٹر عطاء الرحمان  ……٭رویل نیوز٭

لاہور (نمایندا رویل) آگو کرونا ٹاسک فورس ڈاکٹر عطاء الرحمان نے کہیا اے کہ پاکستان وچ ویکسین 6 توں 8 مہینیاں وچ دستیاب ہووے گی‘ پاکستان وچ 2 چینی کمپنیاں چھیتی انساناں اُتے ٹرائل شروع کر رہیاں نیں‘ ایہناں ویکسین دے ٹرائل دے نتیجے لئی ہور 3 مہینے انتظار کرنا پوے گا‘ دسمبر وچ ٹرائلز دے نتیجے آن گے‘ ایہدے بعد ویکسین دے کامیاب ٹرایل بارے کجھ کہیا جا سکدا اے۔ ایس حوالے توں آگو کرونا ٹاسک فورس نے نجی ٹی وی نُوں دَسیا کہ دنیا وچ 150 کمپنیاں ویکسین بنا رہیاں نیں‘ ایہناں وِچوں 50 ایہو جہیاں کمپنیاں نیں جہناں دی ویکسین دے کلینیکل ٹرائل دا مرحلا جاری اے‘ کرونا دی ساخت نُوں ویکھ کے ویکسین بنان دے مختلف طریقے نیں‘ پاکستان وچ حالے تک کسے وی شہر وچ ٹرائل شروع نہیں ہوئے‘ ٹرائل چھیتی شروع ہون جا رہے نیں‘ سانوں ٹرائل دے نتیجے لئی 3 مہینے ہور انتظار کرنا پوے گا۔ دسمبر تک ایہناں ٹرائلز دے نتیجے دے بارے حتمی کہنا غلط ہووے گا۔ اوہناں نے کہیا کہ کرونا دا ہُن وی خطرا اے‘ کرونا اپنی شکل تبدیل کر رہیا اے‘ کراچی یونیورسٹی وچ ایہدی ساخت اُتے ریسرچ کیتی گئی اے تے پتا لگا کہ کرونا وایرس ہر دو تِن ہفتے بعد اپنی شکل تبدیل کر رہیا اے‘ ایہ خطرناک صورتحال ہو سکد ی اے۔ اوہناں نے کہیا کہ پچھلے ہفتیاں وچ کیسز گھٹ سن پر ہُن گنتی ودھ ک واپس 600 یاں 700 تک ہو چکی اے۔ کرونا ویارس دی دوجی لہر پہلے دی نسبت خطرناک ہوندی اے‘ کیوں جے وایرس اپنی شکل تبدیل کر چکیا ہوندا اے۔