سعودی عرب دا اسرائیل دے معاملے اُتے دو ٹوک تے تواریخی مؤقف اے: مخدوم شاہ محمود قریشی  ……٭رویل نیوز٭

اسلام آباد۔ بیجنگ (اُچیچا نمایندا) وزیر خارجا مخدوم شاہ محمود قریشی نے کہیا اے کہ پاکستان تے سعودی عرب اِک دوجے دی ضرورت نیں‘ دوہاں ملکاں دے تعلقات وچ کوئی قدغن نہیں اے‘ سعودی عرب نال پاکستان دے تعلقات گوڑھے سن‘ گوڑھے نیں‘ گوڑھے رہن گے‘ مستقبل قریب وچ ساڈیاں سعودی عرب نال ہور سیٹاں ہون گیاں‘ سعودی عرب دا اسرائیل دے معاملے اُتے دو ٹوک تے تواریخی مؤقف اے۔ دہشتگردی دے خلاف جنگ وچ پاکستان دا عزم غیر متزلزل اے۔ وزیر خارجا شاہ محمود قریشی چین دے دورے اُتے نیں جتھے اوہناں نے اِک بیان دیندیاں ہویاں کہیا کہ سعودی عرب تے پاکستان دے تعلقات ماضی وچ وی چنگے تے گوڑھے رہے نیں تے مستقبل وچ وی انشاء اللہ چنگے رہن گے‘ دوہاں ملکاں وچکار تعلقات اِک دوجے دی ضرورت نیں تے ایہناں تعلقات وچ کوئی قد غن نہیں اے۔ وزیر خارجا نے کہیا کہ فلسطین دے بارے وچ سعودی وزیر خارجا دا مؤقف بہت واضح اے‘ سعودی عرب نے فلسطین دے معاملے اُتے 2 ٹوک مؤقف اپنایا اے۔ اوہناں نے کہیا کہ مقبوضا کشمیر دی صورتحال وِگڑدی جا رہی اے‘ اِک سال وچ مقبوضا کشمیر دے حالات وچ تبدیلی آئی اے‘ کشمیر وچ جو کجھ ہو رہیا اے اوہ کسے توں لُکیا نہیں اے۔ وزیر خارجا دا کہنا اے کہ کشمیر ی پاکستان اُتے نظر لائی بیٹھے نیں‘ چین دے اسیں شکر گزار آں کہ اوہناں دے تعاون نال اسیں 55سال دے بعد پچھلے 1 سال وچ 3 وار مسئلا کشمیر نُوں سلامتی کونسل وچ بحث ہیٹھ لیان وچ کامیاب رہے تے ایہ اِک بہت وڈی ٹورا کاری اے‘ کجھ قوتاں نہیں چاہندیاں کہ خطے وچ امن دا عمل اگے ودھے‘ اج بھارت دہشتگردی نُوں ہوا دے رہیا اے‘ دنیا ویکھ رہی اے کہ اج بھارت دے اندروں ایہدے خلاف اوازاں اُٹھ رہیاں نیں‘ بھارت دے اندر وں بھارتی سرکار اُتے تنقید ہو رہی اے۔ اوہناں نے کہیا کہ بھارت نے جدوں اِک متنازع علاقے اُتے قبضے دی کوشش کیتی تے چین ساہمنے آیا‘ قوماں دی سوچ دا انداز کسے حد تک بدل رہیا اے۔ وزیر خارجا نے کہیا کہ دنیا دے حالات بدل رہے نیں چین ہمیشا اوکھے ویلے وچ نال کھلوتا رہیا اے‘ کرونا وایرس دی وباء اُتے چین تے پاکستان نے کافی حد تک قابو پا لیا اے‘ دوہاں ملکاں نے آپسی مشاورت نال اگے ودھنا اے‘ سی پیک دی اہمیت توں کوئی انکار نہیں کر سکدا۔