اوکھے پینڈے ' لمیاں راہواں عشق دیاں ــــ ٭رویل٭

اوکھے پینڈے ' لمیاں راہواں عشق دیاں ــــ ٭رویل٭

کرونا وبا دے ستائے ' لاک ڈاؤن وچ قید دہ پینڈو تے دو ڈرائیور گھروں نکلے تے پہاڑی علاقیاں ول مونہ دھر لیا ۔ ساون بھادروں دے حبس دے ماریاں ایہ وی نہ سوچیا پئی راہواں لمیاں نیں ' پینڈے اوکھے نیں تے اسیں راہواں تے تھانواں توں منسونہے ہاں ۔ سواریاں وچ اک نمانی مہران تے دوجی بولان سی تے دوویں پوری طرحاں بھریاں ہوئیاں ۔ خیر فیصل آباد موٹر وے تے لگ پئے ۔ ہسدے کھیڈدے نوئیاں زمیناں ویکھن دے شوق وچ ٹردے گئے تے پہلی ٹھیکی کلر کہار توں کجھ پہلے سروس ایریا تے جا لائی کیوں جو موٹرے وے دے ہوٹلاں دے بل بھرن دی گنجائش نہیں سی تے نالے مقصد تھوڑی دیر لئی آرام کرناں سی فضول خرچی نہیں سی ۔ ایہ سب ٹور لیڈر محمد بوٹا انجینئر دی سوچ دا سٹا سی پئی اسیں ڈاہڈی کفایت شعاری نال ٹرے رہے تے اسلام آباد دے ٹول پلازے توں نکل کے اٹک پٹرول پمپ جا اپڑے ۔ اوس ویلے موسم ٹھنڈا مٹھا ہو گیا سی ۔ تھکن دے آثار کجھ گھٹ سن تے اسیں ٹھنڈا پانی پی کے ہور وی تازہ دم ہو گئے ساں ۔ گڈیاں نوں وی پانی دھانی پوا کے ٹھنڈیاں کیتا گیا تے چل سو چل ۔ ہن اسیں پشاور موٹر وے تے ساں تے اگوں ہزارہ موٹر وے سانوں اڈیک رہیا سی ۔ ہزارہ موٹر وے نواں نکور تے بہوں صاف شفاف ٹریک سی جس نہ صرف سفر دے فاصلے گھٹائے سن سگوں راہواں دے حسن وچ وی وادھا کر دتا سی ۔ ایبٹ آباد دے دو ٹنل تے مانسہرہ دے لاگے اک ٹنل وچوں رات نوں لنگھنا اک سوہنا تے نواں تجربہ سی ۔ ٹنل دیاں رتیاں تے نیلیاں پیلیاں روشنیاں وچ سفر کرن دا اک وکھرا ای لطف سی ۔ فیصل آباد توں مانسہرہ تیک سارا سفر موٹر وے دا سی تے ایناں سوکھا پئی کتے وی کوئی روک رکاوٹ نہ آئی ۔ مانسہرہ بائی پاس توں بالا کوٹ ول مڑے تے رستیاں دیاں اچیائی نوائی تے موڑاں دا کجھ کجھ اندازا ہویا ۔ بھکھ اپنا اثر وکھایا تے قافلے نوں رکنا پیا ۔ اک ٹرک ہوٹل تے اترے تے دال دلیے نال گزارہ کیتا ۔ پر نہ دال وچ سواد آیا تے نہ ای بیہن کھلون وچ ۔ پر بھکھ دا اک اپنا ای سواد ہوندا اے اوہ سواد اساں وی رج مانیاں ۔ میری گڈی وچ شبو ڈرائیور توں علاوہ اسیں چار اسوار سن جہناں وچ سجاد ' زاہد نعیم تے شہباز سی ۔ بولان وچ ڈرائیور محمد علی توں علاوہ محمد بوٹا انجینئر ' ماسٹر مجاہد ' بلال ' قاضی باقر ' راشد تے احسن سن ۔ کل باراں مسافراں دا ایہ قافلہ رات یاراں باراں وجے بالا کوٹ دے سدھیاں ڈنگیاں پہاڑی رستیاں تے ٹردا جا رہیا سی ۔ بالا کوٹ دے لاگے مونہ زور میہنہ سانوں جی آئیاں آکھیاں تے گرمی دے ستائیاں دی روح خش ہو گئی ۔ پہاڑی گدڑاں نوں ویکھ کے ماسٹر سجاد تے قاضی باقر گدڑاں وانگ آواجاں گڈھ کے اوہناں نال گل وات کیتی ۔ رات سمے اک پاسے پہاڑ تے دوجے بنے کنہار دریا دا شور تے بارش دیاں کنیاں ڈگن دیاں واجاں اک عجیب موسیقی پیدا کر رہیاں سن ۔ دوجے پاسے جتندر شاہ دے گاؤن " سجن راضی ہو جائے فیر وی رولا نہیوں پائی دا پاگلا " دے بول تے باراں پاگلاں دیاں للکراں ماحول وچ جوش تے جنون بھر رہیاں سن ۔ دو نکیاں گڈیاں وڈیاں وڈیاں اچیائیاں تے فراٹے بھردیاں چڑھ رہیاں سن ۔ رات نوں پہاڑاں تے آباد گھراں وچ بلدے بلب تے دیوے ستاریاں وانگ چمک رہے سن ۔ پہاڑاں دی چپ تے دریا کنہار دے پانیاں دا شور کناں نوں بھلا لگ رہیا سی ۔ انھیرے وچ ولٹیجے پہاڑ سیاہ رنگ دیاں چادراں وانگ آل دو آلے کھلرے سن ۔ قراقرم ہائی وے دا سنہپ تے پہاڑاں وچکار سپ وانگ ڈنگ چب ویکھن لائق سی ۔ کیوائی ' پارس ' ملکنڈی ' مہانڈری ' باڑی ' کھنیاں تے کاغان توں لنگھدیاں ہوئیاں رات سمے انھیرے وچ لکے نظاریاں بڑیاں واجاں ماریاں روکن دے بڑے جتن کیتے پر ساڈے گروپ لیڈر رات دا پچھلا پہر ناران گزارن دا فیصلا کیتا ہوئیاں سی ۔ راجوال ' چٹہ کھٹہ تے بٹل توں لنگھدیاں اخیر اسیں ناران جا اپڑے ۔ ہن اجیہے ہوٹل دی بھال سی جہڑا سستا ہووے تے جتھے دو تن گھنٹے اکھ کانی کیتی جا سکے ۔ چنگے ہوٹل سارے بک ہو چکے سن ایس لئی ہن ٹینٹ ہوٹل ای وارے سن ۔ رات تن ساڈھے تن دا عمل سی لبھدیاں لبھاندیاں اک خیما ہوٹل وچ دو خیمے بک کرائے ۔ جس خیمے وچ میں ' سجاد ' زاہد ' محمد علی تے شبو ڈرائیور نوں تھاں ملی اس دے نہ بستر صاف سن تے نہ ای کمبل ۔ نسواراں دی بد بو تے بستریاں دی میل کچیل وچ ساہ لیناں اوکھا ہو گیا ۔ ایہو حال واش روم دا سی نہ بوہا نہ کنڈی نہ صابن ۔ بس دریا کنہار دا میلا جہیا پانی سی جہڑا پائپاں نال لیایا گیا سی تے ایناں ٹھنڈا سی پئی ہتھ لانا وی اوکھا سی ۔ میں گھروں لیاندی چادر کڈھی تے اک فرشی گدے تے لھویٹ کے سون دی کوشش کیتی پر بد بو وچ سونا کتھوں آوے؟ شبو ' زاہد تے محمد علی رات دا پچھلا حصا گڈیاں وچ گزاریا ' سجاد تے بلال کسے نہ کسے طرحاں اکھ لا لئی تے میں رات ناران دیاں سڑکاں تے دریا کنہار دا شور سندیاں گزاری ۔ اس جگراتے دا صلہ مینوں دھمی ویلے ملیا جدوں چڑھدے سورج دیاں کرناں نال بھخدیاں پہاڑاں دیاں چوٹیاں تے نسدے بجھدے بدلاں تے کنہار دے کنارے ٹھنڈے پانیاں میرے نال گلاں کیتیاں تے میں فطرت دے حسن نوں نیڑیوں ہو کے ڈٹھا ۔ کنہار دے دوجے کناریوں ڈولی وچ بیٹھدے پکے سیباں ورگیاں صورتاں تکیاں تے من موہنیاں مورتاں ڈٹھیاں جہڑیاں دریا پار کر کے ناران ول آ رہیاں سن ۔ ایہ منظر تے ایہ نظارے ستیاں اکھاں کدوں ویکھے جا سکدے سن ؟

(چلدا)