لوکائی اِک ویلے دی روٹی تے پرانے پاکستان نُوں ترس رہی اے: شہباز شریف  ……٭رویل نیوز٭

اسلام آباد (نیوز ڈیسک) مسلم لیگ ن دے صدر تے قومی اسمبلی وچ قائد حزب اختلاف شہباز شریف نے کہیا اے کہ حکومت نُوں لوکائی دے مسئلیاں نال کوئی سروکار نہیں‘ کشکول توڑن دے دعوے کرن والے کَہ رہے نیں گھبرانا نہیں اے‘ کیہ ایس طرحاں لوکاں دے ڈِھڈ بھر جان گے‘ تبدیلی سرکار اپنے 2 سالا دور اقتدار وچ نواز شریف دے 3 ادوار توں ودھ قرضے لے چکی اے فیر وی لوکائی اِک ویلے دی روٹی تے پرانے پاکستان نُوں ترس رہی اے‘ حکومت احتساب دے ناں اُتے اپوزیشن نُوں انتقام دا نشانا بنا کے کندھ نال لا رہی اے‘ کنک دا سیزن ختم نہیں ہویا تے ملک توں کنک سمگل ہو گئی‘ کنک تے آٹے دیاں قیمتاں اسمان نال گلاں کر رہیا نیں‘ اج کھنڈ دی قیمت 100 رُپئے فی کلو توں وی اُتے چلی گئی اے‘ غریب نُوں تباہی دے دہانے اُتے پہنچا دِتا تے اج وی حکومتی ارکان دا طریقا کار اپوزیشن دا ای ا‘ ن لیگ دی قیادت دے خلاف بے پناہ پروپیگنڈا کیتا گیا‘ کہڑا این آور‘ کہنے این آر او منگیا اے ساہمنے لیاؤ‘ پروپیگنڈے دا مقصد عوامی مسئلیاں توں توجا ہٹانا اے‘ وزیر خارجا نے غیر ذمے دارانا بیان دے کے سعودی عرب ورگے سنگی ملک نُوں وی ناراض کر دِتا‘ ایس حکومت نے سی پیک نُوں متنازعا بنایا‘ حکومت دی اپنی کابینا وچ اشرافیا دے لوک بیٹھے نیں‘ دوائیاں سکینڈل وچ ملوث وزیر پتا نہیں کتھے اے‘ ایہ نیب نیازی گٹھ جوڑ دا شاخسانا اے۔ ایہناں خیالاں دا اظہارشہباز شریف نے پیر نُوں اسلام آباد وچ پارٹی دے سینئر آگوواں شاہد خاقان عباسی‘ خواجا آصف‘ مفتاح اسماعیل تے ہوراں نال پریس کانفرنس کردیاں ہویاں کیتا۔ سہباز شریف نے کہیا کہ میر حاصل بزنیجو دے انتقال اُتے افسوس ہویا‘ اوہناں نے پاکستان تے جمہوریت دی خاطر بے پناہ قربانیاں دِتیاں۔ تبدیلی سرکار نے لوکائی نُوں دُکھاں‘ تکلیفاں تے مسئلیاں دے سوال کجھ نہیں دِ تا‘ 2 سال وچ مہنگائی نے غریب لوکائی دا لَک توڑ کے رکھ دِتا اے‘ نواز شریف دے 2014 توں 2018 تک جہڑے منصوبے شروع ہوئے اوہناں دی مثال نہیں ملدی‘ ایہ سارے منصوبے برق رفتاری نال مکمل ہوئے‘ 72 سال وچ ایہو جہے منصوبیاں تے ترقی دی کوئی نطیر نہیں ملدی‘ اج تک ساڈے اُتے اِک دھیلے دی کرپشن ثابت نہیں ہو سکی‘ حکومت نے بھرویں کوشش کیتی پر اوہ ساڈے اُتے ایل این جی منصوبا ہووے یاں وفاقی‘ سی پیک سنے ساڈے اُتے اِک رُپئے دی کرپشن ثابت نہیں کر سکے‘ نواز شریف دے دور وچ پاکستان وچ تواریخی کم ہوئے اوہناں دی حکومت دے تیجے دور وچ اِک دمڑی تے دھیکے دی کرپشن ثابت نہیں ہوئی‘پہلے کھنڈ ایکسپورٹ ہوندی سی پر ہُن امپورٹ کیتی جا رہی اے۔ کھنڈ ایکسپورٹ کر کے حکومتی نمایندیاں نے ارباں رُپئے کمائے‘ ملک دی 72 سالا تواریخ وچ پہلی وار انج ہویا کہ کنک واڈھی دا حالے سیزن وی ختم نہیں ہویا سی کہ کنک ملک توں غایب ہو گئی‘ پر حکومت نے 66 لکھ ٹن کنک اکٹھی کیتی سی تے اوہ گئی کتھے کیوں جے ملک وچ تے اج وی آٹے دا بحران اے۔ ایہناں نے پٹرولیم مصنوعات تے بجلی دیاں قیمتاں ودھائیاں‘ ایس حکومت دی نا اہلی تے نالایقی دی وجھا توں بجلی دی لوڈشیڈنگ پورے ملک وچ جاری اے‘ حالاں جے ملک وچ بجلی وادھو ماترا وچ موجود اے۔ 1952 دے بعد ملکی تواریخ وچ دوجی وار جی ڈی پی دی گروتھ منفی وچ آ گئی اے۔ جنا قرض ایہناں نے لیا اے‘ اینا نواز شریف نے اپنے 3 ادوار وچ وی نہیں لیا۔ حکومت اج وی کنٹینر اُتے کھلوتی اے‘ ایہناں نُوں غریب لوکائی دا احساس تک نہیں۔ ہسپتالاں توں دوائیاں غایب کر دِتیاں گئیاں نیں۔ سی ٹی سکین غریباں لئی بند کر دِتی گئی اے۔ کینسر دے روگیاں لئی مفت دوائیاں بند کر دِتیاں گئیاں نیں۔ حکومت دے دوالے اشرافیا بیٹھی ہوئی اے۔ ایہناں نُوں نہ گورننس آندی اے کہ کوئی کم کویں کرنا اے‘ ایہناں نُوں بس نیب راہیں اپوزیشن نُوں کندھ نال لانا آندا اے‘ تبدیلی دے خاہاں اج آپ ایس تبدیلی اُتے رو رہے نیں۔ اوہناں نے کہیا کہ مسلم لیگ ن لکھاں پڑھیاراں نُوں وظایف دیندی سی اوہ سبھ ختم کر دِتے گئے نیں‘ ساڈی حکومت نے ہونہار پڑھار تے پڑھیاراں نُو ں 20 ارب رُپئے دے وظایف دِتے‘ میرٹ دے اُتے اعلا تعلیم ایہناں نُوں مفت دلوائی گئی۔ ایس سارے نظام نُوں تبدیلی سرکار نے تباہ و برباد کر دِتا اے۔ اپنی گل نُوں جاری رکھدیاں ہویاں اوہناں نے کہیا کہ خارجا امور اُتے حکومت نے اج پاکستان نُوں کلا کر دِتا اے۔ اِک منجھے ہوئے بندے توں سعودی عرب دے حوالے توں ایس طرحاں د ے بیان دی توقع نہیں سی۔ ایہناں نے سی پیک دا مذاق اُڈایا‘ الزامات لائے تے تضحیک کیتی‘ 27 لکھ پاکستانی سعودی عرب وچ روزگار حاصل کر رہے نیں۔ ایہناں نے اوہنوں وی ناراض کر دِتا۔ حکومت نے پاکستان نُوں جو کہ ترقی ول گامزن سی ایہنوں دُبارا 1952 دے دور وچ لیا کھلاریا اے۔ ساڈی معیشت ایس ویلے زبوں حال اے۔ ساڈی ایکسپورٹ‘ انوسٹمنٹ سبھ زیرو ہو چکی اے۔