ملک وچ سیاسی دہشتگرد وی نیں، جمہوریت دے ناں اُتے پینتی ورھیاں توں لُٹ مار کرن والے واجب القتل نیں: وفاقی وزیر ہوا بازی غلام سرور خان……٭رویل نیوز٭

واہ کینٹ (اُچیچا نمایندا) وفاقی وزیر ہوا بازی غلام سرور خان نے کہیا اے کہ 35 ورھیاں توں ملک نُوں جمہوریت دے ناں اُتے لٹن والے ملک دشمن تے واجب القتل نیں‘ ایہناں دا ہر صورت احتساب ہووے گا‘ ملک نُوں سیاسی دہشتگرداں نے سبھ توں ودھ نقصان پہنچایا‘ جعلی ڈگریاں والے 760 ملازماں نُوں فارغ کر چکے‘ ایہناں وِچ 28 پائلٹس وی شامل نیں‘ کھنڈ دا چوری شدا مال سندھ گھل دِتا جاندا سی جتھے وڈے چور بیٹھے نیں‘ آپ کہندا آں نیب میرا احتساب کرے‘ میرے خاندان دا احتساب کرے۔ ایہناں خیالاں دا اظہار وفاقی وزیر غلام سرور خان نے وفاقی سیکرٹری اوور سیز پاکستانی ڈاکٹر محمد ہاشم پوپلزئی دے نال لیبر کَمپلیکس ٹیکسلا دورا کرن دے بعد صحافیاں نال گلبات کردیاں ہویاں کیتا۔ اوہناں نے کہیا کہ میں 1979 وچ سیاست دے میدان وچ قدم رکھیا۔ 1971 وچ مینوں وراثت وچ ملی۔ نیب میرا تے میرے خاندان دا بلا تفریق احتساب کرے سگوں میں نیب نُوں فلور آف دی ہاؤس ویلکم کیتا سی۔ غلام سرور خان دا کہنا سی کہ ٹیکسلا لیبر کَمپلیکس 6 مئی 2006 وچ جنرل مشرف نے اناؤنس کیتا سی ایہدے فیز ون وچ 504 فلیٹس بنے‘ ایہ پروجیکٹ میری ذات دا نہیں سگوں صنعتی مزدوراں لئی بنایا گیا سی پر پچھلیاں حکومتاں نے ایس پروجیکٹ اُتے کوئی کم کرنا گوارا نہ سمجھیا۔ پی او ایف دے شہداء نُوں مفت فلیٹس دِتے جان گے‘ ایہ فلیٹس لیبر کالونی وزارت اوور سیز دے اہتمام ہیٹھ بنائے گئے سن جہدے اُتے مقامی وکیل نے سٹے آرڈر لے لیا سی۔ اِک سوال دے جواب وچ اوہناں دا کہنا سی کہ ایس ملک وچ سیاسی دہشتگرد وی نیں جہناں دا ملک دے خلاف کم کرنا تے فلاح دے کماں وچ رکاوٹ پانا اے‘ ایہو جہے سیاسی دہشتگرداں دا محاسبا کرنا پوے گا‘ غلام سرور خان نے ہور کہیا کہ موجودا حکومت نے 160 ارب رُپئے حساس کفالت پروگرام دے تحت مستحق لوکاں وچ ونڈے جہدی مثال تواریخ وچ نہیں ملدی تے لوکائی نُوں 716 ارب رُپئے دا بجلی وچ ریلیف ملے گا‘ اوہناں نے کہیا کہ ملک وچ بلا امتیاز احتساب جاری اے‘ اپوزیشن نُوں کسے صورت این آر او نہیں دِتا جاوے گا‘ ملک نُوں بے دردی دے نال لُٹیا گیا‘ 35 سال اقتدار وچ رہن والے سانوں طعنے دے رہے نیں‘ اوہناں نے کہیا کہ ملک نُوں لُٹن والے ملک دشمن تے واجب القتل نیں‘ ایہناں نُوں کسے صورت نہیں چھڈیا جاوے گا۔