نواز شریف نُوں واپس لیانا حکومت دی ذمے داری اے:عمران خان ……٭رویل نیوز٭

اسلام آباد (نمایندا رویل) وفاقی کابینا نے پچھلے وزیراعظم نواز شریف نُوں فوری وطن واپس لیان دا فیصلا کیتا اے جد کہ وزیراعظم عمران خان نے کہیا اے کہ نواز شریف نُوں واپس لیانا حکومت دی ذمے داری اے‘ ایس حوالے توں سارے قانونی پہلوواں دا جایزا لیا جاوے گا‘ کسے وی قسم دی کوئی بلیک میلنگ برداشت نہیں کراں گا۔ منگل والے دن وزیراعظم عمران خان دی صدارت ہیٹھ وفاقی کابینا دا اجلاس ہویا جہدے وچ ملکی سیاسی‘ معاشی صورتحال سنے مختلف چیلنجز بحث ہیٹھ رہے۔ اجلاس وچ پچھلے وزیراعظم نواز شریف دی واپسی تے مریم نواز دیاں حالیا سرگرمیاں اُتے تفصیلی وچار وٹاندرا کیتا گیا۔ اجلاس وچ وزیراں نے پچھلے دن ہون والے قومی اسمبلی دے اجلاس وچ افسوسناک واقع دا معاملا وی چُکیا۔ وزیراں نے کہیا کہ مسلم لیگ (ن) دے سینئر آگو شاہد خاقان عباسی نے غلط زبان استعمال کیتی تے سپیکر قومی اسمبلی دے عہدے دا وی خیال نہیں رکھیا‘ ایہدے اُتے وفاقی وزیر فیصل واوڈا برہم نظر آئے۔ اوہناں نے کہیا کہ اسیں گالھاں سنن لئی لوکائی توں ووٹ نہیں لئے سن‘ قومی اسمبلی وچ ہون والا بدزبانی دا معاملا انتہائی تشویش جو گ اے‘ اگے توں ایہو جہی حرکت کیتی گئی اے ایہدا مونہ توڑ جواب دواں گا۔ وفاقی وزیر اسد عمر نے کہیا کہ بدزبانی دے معاملے اُتے سپیکر قومی اسمبلی اسد نُوں فوری ایکشن لینا چاہیدا اے تے اوہناں دی رکنیت نُوں ختم ہونا چاہیدا اے‘ اسد عمر دی ایس تجویز اُتے اجاس دے رلتیاں نے حمایت کیتی۔ اجلاس دے رلتیاں دا کہنا سی کہ سپیکر قومی اسمبلی دے منصب دا خیال نہیں رکھیا گیا ایہ ساڈے لئی تشویش د ا کارن اے۔ فیصل واوڈا نے مریم نواز دی نیب پیشی دا معاملا وی چُکیا۔ اوہناں دا کہنا سی کہ مریم نواز نے اِک سوچے سمجھے منصوبے دے تحت ڈراما رچایا تے ایس توں ودھ افسوسناک گل ایہ اے کہ حکومتی مشینری حرکت وچ نہیں آئی‘ مریم نواز نے نیب دفتر دے باہر جو کجھ کیتا ایہدے اُتے قانون حرکت وچ آندا تے اوہناں دی فوری گرفتاری عمل وچ لیاندی جاندی پر افسوس نال کہندا آں کہ انج نہیں ہویا۔ نویں پاکستان وچ ایہو جہیاں ڈرامے بازیاں نہیں چلن دواں گے‘ لوکائی نے سانوں ووٹ تبدیلی لئی دِتا اے‘ قانون دی حکمرانی یقینی بنانی ہووے گی۔ اوہناں دا کہنا سی کہ مریم نواز نُوں کسے صورت ملک توں باہر جان دی اجازت نہیں دواں گے۔ اجلاس وچ پچھلے وزیراعظم نواز شریف دی بیماری‘ میڈیکل رپورٹاں‘ لندن توں جاری کیتیاں گئیاں تصویراں تے مولانا فضل الرحمان سنے ہور سیاسی آگوواں نال رابطیاں اُتے وی تفصیلی وچار وٹاندرا کیتا گیا جد کہ اجلاس دے رلتیاں نے نواز شریف دی واپسی لئی سارے قانونی آپشنز استعمال کرن اُتے زور دِتا۔ وفاقی کابینا دے اجلاس وچ وزیر مذہبی امور پیر نور الحق قادری نے ایم ایل ون منصوبے اُتے پشاور توں طور خم سیکشن شامل کرن دا مطالبا کر دِتا جہدے اُتے وزیراعظم عمران خان نے ایم ایل ون وچ پشاور توں طور خم دا سیکشن وی شامل کرن دا حکم دے دِتا اے۔ وزیر ریلوے شیخ رشید نے وی پشاور توں طور ختم سیکشن نُوں ایم ایل ون وچ شامل کرن دی حمایت کر دِتی اے۔ وزیر ریلوے پشاور توں طور ختم سیکشن نُوں ایم ایل ون منصوبے وچ شامل کرن اُتے مفصل رپورٹ وزیراعظم نُوں پیش کرن گے۔ اجلاس نال خطاب کردیاں ہویاں وزیراعظم عمران خان نے کہیا اے کہ نواز شریف نُوں ہر صورت واپس لیاندا جاوے گا ایس حوالے توں سارے آئینی تے قانونی آپشنز اُتے غور کیتا جاوے گا‘ اوہناں نے کہیا کہ کسے صورت بلیک میلنگ نُوں برداشت نہیں کیتا جاوے گا۔