پنجاب وچ  ہور دس پناہ گاہواں بنائیاں جاون گئیاں، منشیات دے عادی بندیاں تے منگتیاں لئی بحالی مراکز قایم کیتے جان:سردار عثمان بزدار……٭رویل نیوز٭

لاہور (نمایندا رویل) وزیر اعلا پنجاب سردار عثمان بزدار دی صدارت ہیٹھ منعقدا اجلاس وچ پناہ گاہاں وچ ٹھہرن والے بندیاں لئی سہولتاں نُوں ہور بہتر بنان لئی اقدامات دا جایزا لیا گیا۔ وزیر اعلا عثمان بزدار نے لاہور وچ 10 نویاں پناہ گاہاں بنان دی منظوری دیندیاں ہویاں کہیا کہ نویاں پناہ گاہواں کرائے دیاں عمارتاں وچ بنائیاں جان تے نویاں پناہ گاہواں بنان لئی تھاواں دی نشانکاری کیتی جاوے۔ اوہناں نے کہیا کہ پناہ گاہواں دے نویں ماڈل دا دایرا کار مرحلا وار ہور وڈے شہراں تک ودھایا جاوے گا۔ پناہ گاہواں وچ سہولتاں دی بہتری لئی ہر ممکن اقدام چُکاں گے۔ وزیر اعلا پنجاب عثمان بزدار نے پنجاب پناہ گاہ اتھارٹی تشکیل دین دی وی اصولی منظوری دیندیاں ہویاں کہیا کہ ایہ اتھارٹی پناہ گاہواں دے انتظامات تے دیکھ بھال دی ذمے دار ہووے گی جد کہ پناہ گاہواں دیاں عمارتاں دی دیکھ بھال محکما تعمیرات و مواصلات دے ذمے ہووے گی۔ پناہ گاہواں وچ سہولتاں دی مانیٹرنگ لئی ڈجیٹل مینجمنٹ سسٹم بنایا جاوے گا تے پنجاب انفارمیشن ٹیکنالوجی بورڈ دے تعاون نال مانیٹرنگ دا نظام وضع کیتا جاوے گا۔ پناہ گاہواں دے موجودا نظام نُوں خوب توں خوب تر بناواں گے۔ ساریاں پناہ گاہواں دی جیو ٹیکنگ ہووے گی تے روزانا دی بنیاد اُتے ڈیٹا اکٹھا کیتا جاوے گا۔ وزیر اعلا نے ہدایت کیتی کہ لاہور دیاں اہم سڑکاں اُتے پناہ گاہواں دی نشاندہی دے حوالے توں سائن برڈز لائے جان تے لاہور دے داخلی راہواں اُتے وی پناہ گاہواں دی نشاندہی لئی نمایاں طور اُتے بورڈز لائے جان۔ اوہناں نے کہیا کہ سڑخاں اُتے سُتے بندیاں نُوں پناہ گاہواں وچ شفٹ کرن لئی ہور گڈیاں لئیاں جان تے پناہ گاہواں دے حوالے توں مخیر حضرات دا وی تعاون حاصل کیتا جاوے۔ وزیر اعلا عثمان بزدار نے کہیا کہ منشیات دے عادی بندیاں تے منگتیاں لئی بحالی مراکز قایم کیتے جان گے۔ اجلاس وچ پناہ گاہواں دے باہر نادرا تے غریب بندیاں لئی لنگر خانے کھولن دا فیصلا کیتا گیا۔ وزیر اعلا نے کہیا کہ لنگر خانیاں راہیں غریب بندیاں نُوں کھانا کھوایا جاوے گا۔ اوہناں نے کہیا کہ وزیراعظم عمران خان دی قیادت وچ فلاحی ریاست دے خاب نُوں حقیقت وچ بدلاں گے۔ نادار‘ بے آسرا تے غریب لوکاں دا خیال رکھنا بہت وڈی نیکی اے‘ اللہ تعالیٰ وی نیک کم وچ برکت پاندا اے۔ پچھلیاں حکومتاں نے کدی لاچار طبقے دی فلاح دے بارے وچ نہ سوچیا‘ نہ کجھ کیتا۔ تحریک انصاف دی حکومت ای بے آسرا طبقے دا سہارا بنی اے۔