شہاز شریف تے مولانا فضل الرحمان دی ملاقات ناکام،لگدا اے نوازشریف واپس نہیں آن گے،  قیدیاں دی واپسی لئی برطانیا نال معاہدا نہیں اے: وزیر ریلوے شیخ رشید  ……٭رویل نیوز٭

اسلام آباد (نیوز ڈیسک) وزیر ریلوے شیخ رشید نے کہیا اے کہ شہاز شریف تے مولانا فضل الرحمان دی ملاقات ناکام سی۔ برطانیا توں ملزمان لیان دا کوئی معاہدا نہیں۔ ایف اے ٹی ایف اُتے حکومت نُوں شکست نہیں‘ اپوزیشن بے نقاب ہوئی‘ پہلی ستمبر نُوں اہم فیصلے آن والے نیں۔ وویمن کالج دی نویں عمارت دی افتتاحی تقریب دے بعد میڈیا نال گلابت کردیاں ہویاں شیخ رشید دا کہنا سی کہ وزیر اعلا عثمان بزدار کدھرے نہیں جا رہے‘ جو کجھ سی اوہ ختم ہو گیا‘ اج لاہو تے کراچی ڈُبیا ہویا اے کراچی وچ لوک خون دے اتھرو رو رہے نیں لوک ارکان اسمبلی نُوں گالھاں کڈھ رہے نیں۔ اسیں 2 مہینے پہلاں راولپنڈی دا لئی نالا صاف کیتا ورنا پنڈی وی ڈُب جاندا‘ وزیر اعلا نُوں لال حولی دی بجائے نالا لئی لے کے گیا جہدے نال فوری صفائی شروع ہو گئی۔ اوہناں نے کہیا کہ پاکستان وچ ترقیاتی منصوبیاں لئی فائل دا پچھا کرنا پیندا اے‘ ایہو جہیا نظام اے جہدے کول فائل جاندی اے اوہ چونکڑی مار کے بَہ جاندا اے‘ اسیں فائلاں دا پچھا کیتا جتھے فایل اپڑی اسیں اوتھے پہنچ گئے۔ 70 ارب رُپئے نالا لئی اُتے خرچ کرن جا رہے آں‘ بزدار سرکار دا مشکور آں نالا لئی نُوں ترجیح دِتی‘ نالا لئی دے دوہاں پاسے سڑکاں بنان جا رہے آں‘ نالا لئی دے دولاے 8منزلا پلازے بنان دی اجازت دواں گے۔ نواز شریف نُوں وطن واپس لیان بارے سوال اُتے شیخ رشید نے کہیا کہ وزیراعظم عمران خان نُوں نوا ز شریف دے جان دا دُکھ اے تے میں کابینا دے نواز شریف نُوں واپس بلان دے فیصلے نال اتفاق کردا آں۔ حکومت نواز شریف نُوں واپس لیان لئی ہر ممکن کوشش کرے گی پر لگدا اے اوہ واپس نہیں آن گے کیوں جے حالے تک ساڈا قیدیاں دی واپسی لئی برطانیا نال معاہدا نہیں اے‘ عمران خان جہڑے کم دے پچھے لگ جان اوہ پورا کر کے رہندے نیں۔ اپوزیشن ایکے بارے شیخ رشید نے کہیا کہ اپوزیشن دی آل پارٹیز کانفرنس بہت دور اے‘ لوک اپوزیشن لئی باہر نہیں نکلن گے‘ شہباز شریف تے مولانا فضل الرحمان ملاقات ناکام سی‘ پہلی وار اِک مذہبی جماعت دا آگو کَہ رہیا اے مینوں سیاسی لیڈراں اُتے اعتماد نہیں۔ اپوزیشن دا صرف اِک مطالبا اے‘ نیب ختم کر دوو‘ کل دی شہباز شریف نال ملاقات وچ فضل الرحمان نے بہت چُبے ہوئے سوال کیتے‘ اپوزیشن کہندی اے ساڈے توں ہتھاں پَیراں دے انگوٹھے لگوا لوو پر نیب ختم کر دوو۔ نیب ازاد ادارا اے اوہ کسے دے وی خلاف انکوایری کر سکدا اے۔ اوہناں نے کہیا کہ اسیں سیاسی طور اُتے بدمعاشاں دیاں دھوناں اُڈا دِتیاں نیں شہباز شریف تے حمز ہ دا معاملا سنگین اے اوہ اندر جان گے‘ پہلی ستمبر نُوں اہم فیصلے آن والے نیں۔ وفاقی وزیر ریلوے نے کہیا کہ کرونا وایرس دے دوران مَوت دے مونہ توں واپس آیا‘ جنی اللہ نے ہمت دِتی اسیں کم کیتا۔