بجلی نال چلن والیاں بساں،اَلودگی توں نجات،  ٹیکنالوجی دا استعمال کر کے ترقی دی رفتار وچ تیزی لیاندی جاوے:فواد چودھری ــــ٭رویل نیوز٭

اسلام آباد(نیوز ڈیسک) وفاقی وزیر سائنس اینڈ ٹیکنالوجی فواد چودھری نے کہیا اے کہ ایس سال توں پاکستان وچ الیکٹرک بساں چلنا شروع ہو جان گیاں تے 3 سال دے دوران ایہناں بساں دی مکمل مینو فیکچرنگ پاکستان وچ شروع ہو جاوے گی‘ اگلے 3 توں 5 سال وچ شاید موبائل بیٹریاں نُوں ریچارج کرن دی لوڑ ای نہ پوے‘ بجلی دیاں تاراں تے گرڈ سٹیشن وی ختم ہو سکدے نیں۔ ڈاؤو پاکستان تے سکائی ول کمپنی دے وچکار معاہدے دی تقریب نال خطاب کردیاں ہویاں فواد چودھری نے کہیا کہ آلودگی دیو جھا توں لوک بیمار ہوندے نیں‘ سردیاں وچ لاہور وچ لوک گھراں توں نہیں نکل سکدے‘ اینی آلودگی ہوندی اے پر وزیراعظم عمران خان ماحولیاتی آلودگی دے خاتمے لئی کم کر رہے نیں‘ اسیں ٹیکنالوجی دا استعمال کر کے منزل سوکھی بنانی اے۔ اوہناں نے کہیا کہ اگے توں دنیا وچ بغیر ڈرائیور دے بساں چلن گیاں جد کہ پاکستان جنوبی ایشیا دا پہلا ملک ہوو گا جتھے الیکٹرک بساں چلن گیاں‘ سکائی وہیل تے ڈرائیو دا سانجھا معاہدا ملک لئی وڈی کامیابی اے‘ پاکستان اپنس سپیس مشن اگلے سال گھلے گا۔ فواد چودھری دا کہنا سی کہ کرونا کیس آن دے بعد ماسک باہروں منگوارہے ساں پر ہُن اسیں ماسک تے ہور حفاظتی سامان وچ خُد کفیل آں‘ حکومت پاکستان وچ سولر تے ونڈ راہیں متبادل توانائی دے وسیلے وداھ رہی اے‘ ملکی منصوبا بندی 10 سال توں ودھ نہیں ہوسکدی تے اسیں اپنی پوری کوشش کر رہے آں کہ ٹیکنالوجی دا استعمال کر کے ترقی دی رفتار وچ تیزی لیاندی جاوے۔ وزیر سائنس و ٹیکنالوجی دا کہنا سی کہ جدید ٹیکنالوجی دی طلب نُوں ساہمنے رکھدیاں ہویاں 10 سالا پالیسی بنانی پوے گی‘ آن والے 10 سالاں وچ ساڈا انرجی دا مسئلا اے‘ پاکستان نے اپنی ریونیو ایبل انرجی پالیسی دِتی اے‘ ایہدے وچ اسیں سولر تے ونڈ انرجی اُتے ترجیحی بنیاداں اُتے کم کراں گے۔