کراچی نُوں تباہ و برباد کرن دی ذمے دار سندھ سرکار اے اللہ ایکسپوز کر رہیا اے: شبلی فراز……٭رویل نیوز٭

اسلام آباد (نیوز ڈیسک) وفاقی وزیر اطلاعات و نشریات سینیٹر شبلی فراز دا کہنا اے کہ سندھ سرکار نُوں اللہ ایکسپوز کر رہیا اے۔ اسلام آباد وچ وفاقی وزیر فخر امام دے نال پریس کانفرنس دے دوران شبلی فراز نے کہیا کہ نواز شریف نُوں جس عرصے لئی ضمانت دِتی گئی تے جس مقصد لئی اوہ بیرون ملک گئے اوہدا سبھ نُوں پتا اے‘ نواز شریف نے بیماری نُوں استعمال کیتا‘ اوہ سیاسی سرگرمیاں کردے نیں‘ نواز شریف نُوں واپس لیان دے سارے وسیلے استعمال کراں گے۔ وفاقی وزیر دا کہنا سی کہ حکومت نُوں کسے چیلنج دا ساہمنا نہیں‘ اپوزیشن نہ اِک پیج اُتے اے نہ ہو سکدی اے‘ ایہناں اِک نکاتی ایجنڈا لُتی ہوئی دولت بچانا اے‘ پیپلز پارٹی نُوں ن لیگ تے ن لیگ نُوں پیپلز پارٹی اُتے اعتماد نہیں‘ ایہناں وچ صلاحیت نہیں کہ قوم نُوں حکومت دے خلاف اکسا سکن‘ مولانا فضل الرحمان نے چھوٹیاں پارٹیاں دا اجلاس بلایا اے۔ شبلی فراز دا کہنا سی کہ کراچی نُوں تباہ و برباد کرن دی ذمے دار سندھ سرکار اے‘ کرونا اُتے سندھ حکومت نے سیاست کیتی‘ اپنی نا اہلی تے کرپشن نُوں لُکان لئی ہمیشا الزام وفاق اُتے لایا‘ سندھ سرکار نے صرف ایہ نہیں کہیا کہ بارشاں دی ذمے دار وفاقی حکومت اے‘ سندھ سرکار نے پچھلے 10سال وچ 14 کھرب رُپئے توں ودھ کہڑی شے اُتے لائے‘ بجائے ایہدے کہ لاڑکانا نُوں کراچی بناندے پیپلز پارٹی نے کراچی نُوں لاڑکانا بنا دِتا۔ سندھ سرکار نُوں اللہ ایکسپوز کر رہیا اے۔ ایس موقع اُتے فخر امان نے کہیا کہ آٹا تے کنک بحران کجھ مہینے پہلے شروع ہویا جہدی وجھا ذخیرا اندوزی سی‘ 8 توں 9 سال بعد پہلی وار کنک دیاں قیمتاں وچ فرق پیدا ہویا‘ ذخیرا اندوزاں نے کنک دی قیمت وچ وادھے دا فایدا چُکیا‘ ذخیرا اندوزاں نے کنqک 1400 رُپئے فی من خریدی تے 1800 تک وِکدی رہی‘ ذخیرا اندزاں خلاف کارروائی دی ذمے داری صوبائی حکومتاں اُتے اے۔ وفاقی وزیر نے کہیا کہ کنک دیاں قیمتاں وچ استحکام لئی پنجاب سرکار نے سرکاری کنک سبسڈی اُتے جاری کیتی‘ کنک دی سال وچ 20 توں 25 دن دی تھوڑ سی پر کجھ بندیاں نے ایہدا فایدا چُکیا‘ جہدے اُتے حکومت نے امپورٹ دا فیصلا کیتا۔ کنک نال بھریا پہلا جہاز کراچی پہنچ چکیا جہدے وچ 63 ہزار ٹن کنک اے‘ 2 دن بعد اِک ہور جہاز آ رہیا اے جہدے نال اج کراچی وچ کنک دیاں قیمتاں دا فرق نظر آ گیا اے‘ ستمبر وچ درآمدی کنک آن نال آٹے دیاں قیمتاں وچ استحکام آئے گا۔