حکومت دا صرف اِک ایجنڈا اے کہ مخالفین دی کردار کشی کرو:احسن اقبال……٭رویل نیوز٭

اسلام آباد (نیوز ڈیسک) مسلم لیگ (ن) دے سیکرٹری جنرل احسن اقبال نے کہیا اے کہ فنانشل ایکشن ٹاسک فورس (ایف اے ٹی ایف) دے ناں اُتے عمران خان نُوں پاکستان دا ہٹلر نہیں بنن دواں گے۔ اِک سال ہو گیا پر نیب میرے خلاف ریفرنس دایر نہیں کر سکیا‘ مینوں گرفتار وی کیتا گیا جیل وچ رکھیا گیا۔ احتساب عدالت اسلام آباد دے باہر میڈیا نال گلبات کردیاں ہویاں آگو مسلم لیگ ن احسن اقبال دا کہنا سی کہ اج ضمانت دے بعد میری ستویں پیشی سی‘ حیلے بہانے کر کے نیب ہر وار نویں تواریخ لے لیندا اے جد کہ سپریم کورٹ وچ نیب دا مؤقف اے کہ احتساب عدالتاں فیصلے نہیں کردیاں ایس لئی دیر ہو رہی اے‘ پر نیب نُوں جھوٹھ گھڑن لئی ویلا چاہیدا ہوندا اے ایس لئی ہر وار نویں تاریخ لے لیندے نیں۔ آگو ن لیگ نے کہیا کہ پاکستان دے نوجواناں نُوں عالمی معیار دیاں سہولتاں فراہم کرن دا جرم وار وار کراں گا‘ کیہ شراب دا پرمٹ دینا ٹھیک اے پر کھیڈاں دا انفراسٹرکچر تعمیر کرنا کرپشن اے؟ احسن اقبال نے کہیا کہ وزیر مواصلات دَسن کہ ڈیڈھ سال پہلاں بنائی جان والی جے آئی ٹی کتھے گئی‘ اوس جے آئی ٹی دا جے وی ساہمنے نہیں آیا‘ حکومت دا صرف اِک ایجنڈا اے کہ مخالفین دی کردار کشی کرو‘ اپوزیشن عمران خان توں کوئی این آر او نہیں منگ رہی‘ جہانگیر ترین نُوں رات دے انھیرے وچ فرار کروایا سی تے تُسیں این آر او دے دِتا سی۔ اوہناں دا کہنا سی کہ وزیر صحت نُوں دوائی سکینڈل وچ ہٹا دِتا پر پارٹی دا عہدا دِتا تے تُسیں این آر او دِتا‘ عمران خان نیازی نے شوگر مافیا نوں این آر او دے دِتا۔ پچھلے دن سینیٹ توں رَد ہون والے بِلاں دے حوالے توں گل کردیاں ہویاں احسن اقبال دا کہنا سی کہ ایف اے ٹی ایف دے ناں اُتے پاکستان نُوں فاشسٹ ریاست نہیں بنن دواں گے۔ اوہناں نے ہور کہیا کہ ایف اے ٹی ایف دے ناں اُتے عمران خان نُوں پاکستان دا ہٹلر نہیں بنن دواں گے۔ پچھلے وزیر داخلا نے کہیا کہ سینیٹ اجلاس وچ اپوزیشن نے فیٹف نُوں شکست نہیں دِتی سگوں ایہو جہے نظام نُوں شکست دِتی جہڑا حکومت بلڈوز کرنا چاہندی سی۔