اوکھے پینڈے ' لمیاں راہواں عشق دیاں ـــ قسط 2ـــــ٭رویل٭

اوکھے پینڈے ' لمیاں راہواں عشق دیاں ـــ قسط 2ـــــ٭رویل٭

اصغر علی بلوچ

ناران دا ٹینٹ ہوٹل چائنا دے دان کیتے گئے خیمیاں نال بنایا گیا سی ۔ ٹینٹ دے متھے تے انگریزی تے چینی زبان وچ اکرے اکھر دسدے سی پئی ایہ یقینن اکتوبر 2005زلزلے دوران چین ولوں پاکستان نوں امداد وچ دتا گیا سی ۔ ہن اس ٹینٹ وچ تھاں تھاں توں موریاں تے مگھورے اس دے پرانیاں ہون دی گواہی دیندے سن ۔ مینوں تے لگدا ائے شاید گدے تے کمبل وی چائنا ولوں امداد وچ ملے سن جہناں وچوں بدبو جاون دا ناں نہیں لیندی سی ۔ سویرے سوقتے ای سارے اٹھ کھلوتے تے مینوں اڈیکن لگ پئے ۔ میں ' شبو تے بلال نیڑیوں تیڑیوں چاہ دے ہوٹل دی بتیری بھال کیتی پر اس ویلے تیک کوئی اجہیا ہوٹل نہیں کھلیا سی جتھے چاہ لبھ سکدی ۔ اسیں واپس مڑے تے گڈیاں تیار سن ۔ انجینئر محمد بوٹا تے ماسٹر مجاہد ہوراں رات گزرن بارے پچھیا تے میں آکھیا چنگا سی اسیں رات گڈی وچ اپنی اپنی سیٹ تے انگھلاندیاں گزار لیندے ۔ اوہناں آکھیا پئی اسیں تے تہاڈے اَرام دا سوچ کے ٹینٹ کرائے تے لئے سن ورنہ شیڈول وچ ناران وچ ٹھہرن دا کوئی پروگرام نہیں سی ۔ ایہ سن کے مینوں ہور وی افسوس ہویا پئی اوہناں خاہ مخاہ دو ہزار ضائع کیتے ۔ خیر ناران توں نکلے تے دریا کنہار دیاں پانیاں دا شور ہور وی ودھ سنیجا تے تھوڑی تھوڑی دیر بعد پہاڑی چشمیاں دے ٹھنڈے ٹھار پانیاں اگے ودھ کے سانوں جی آیاں نوں آکھیا ۔ جویں جویں اسیں اگے سفر کردے گئے ٹھنڈ ہوندی گئی تے پہاڑاں تے بدلاں دیاں قطاراں نچدیاں گاوندیاں نظریں آون لگ پئیاں ۔ دریا دے دوجے کنارے تے بنے گھراں وچوں ناشتا بنان لئی چلھے بلن دا اشارہ اوتھوں اٹھدیاں دھوں دے بدل دیندے رہے تے ساڈے ڈرائیور شبو دی بھکھ حدوں ودھ ہوندی گئی ۔ شبو نال چھیڑ چھاڑ نال سفر سکھالا ہو گیا تے اسیں خدا دی قدرت دا نظاراکردے کردے پہاڑاں ' دریا تے ہریالی دے حسن نوں ویکھ ویکھ کے اگے ٹردے رہے ۔ شبو دا ایہ آکھناں سی پئی تسیں مینوں کھلاندے پلاندے رہو تے بھاویں دن رات ڈرائیونگ کراندے رہو میں نہیں تھکاں گا ۔ ایہ گل واقعی ٹھیک سی ۔ اساں اوہدی بھکھ دا چاراکر لیا سی ۔ شہباز ساڈا خزانچی سی تے اوہنوں اساں کھاون پیون لئی کھلا خرچا کرن دی اجازت دتی ہوئی سی ۔ اس لئی ساڈی گڈی وچ کسے ویلے وی نمکو ' بسکٹ ' ٹافیاں تے پانی نہیں سی مکیا ۔ جد کہ انجینئر بوٹا دا ایہ ماٹو سی " گھٹ کھانا ' گھٹ سونا تے

بہتی سیر کرنا -" میں شوگر پاروں کجھ نہ کجھ کھاون تے مجبور سی تے شبو ڈھڈ ہتھوں مجبور سی ۔ ایہو حال ماسٹر سجاد ' زاہد تے شہباز دا سی اوہ وی ساڈے نال کھان پین نوں شیر سن پر ناں میرا تے شبو دا ای کردے سن ۔ خیر ساڈا قافلا ناران توں اٹھ کلو میٹر دور 8966 کلو میٹر دی بلندی تے واقع بٹہ کنڈی جا کے رکیا تے دریا دی پل دے نال ای بنے اک ہوٹل تے ناشتے دا آرڈر دے دتا گیا ۔ اس ہوٹل دی خاص گل ایہ سی پئی اس دیاں منجیاں تے کرسیاں دریا کنہار دے وگدے پانی وچ وچھیاں سن تے دور توں لالہ زار نوں جاندے پہاڑی رستے ' اک بہوں سوہنی مسیت تے اچیائی تے بنے پہاڑی گھر تے ون سونے ہوٹلاں دیاں عمارتاں وکھالی دیندیاں سن ۔ ایتھے اپڑ کے اساں انڈے پروٹھے تے چاہ نال ودھیا ناشتا کیتا ۔ ماسٹر مجاہد ہوراں ویلے سر ناشتا نوں وی میری وجھا قرار دتا پئی اوہناں میری شوگر دا خیال کر کے ایتھے ٹھہرن دا فیصلا کیتا اے ۔ قاضی باقر میرے کن وچ ہولی جہیاآکھیا سر شکر اے تہاڈے نال ہوون کارن سانوں ناران وچ اکھ کانی کرن تے بٹہ کنڈی وچ ناشتا کرن دا موقع مل گیا نہیں تے ساڈے ٹور وچ روٹی ٹکر کھان تے اَرام کرن دا کوئی تصور نہیں ہوندا ۔ میں شکر ادا کیتا پئی چلو کسی وجہ نال ای سہی سانوں ٹائم سر ناشتا تے لبھ گیا ۔ بٹہ کنڈی وچ ٹائراں دی ہوا چیک کروان لئی پیسے پچھے تے خان صاحب چپ رہن دا اشاراکیتا تے جدوں چارے ٹائر چیک کروا لئے تے چالھی روپیے منگ لئے ۔ اسیں سوچ رہے ساں پئی سو توں گھٹ نہیں لوے گا پر شکر کیتا پئی اوہنے چالھی تے ای گزارا کر لیا اے ۔ انجینئر بوٹا ہوراں دی گڈی ساتھوں اگے رہندی سی کیوں جے ڈرائیور محمد علی نوں پہاڑی راہواں دا اندازہ سی تے شبو ایہناں راہواں تے نواں ڈرائیور سی ۔ انجینئر صاحب بلال نوں شمالی علاقا جات دا نقشالین گھلیا تے بلال لتاں کھلار کے نسدا بھجدا نخرے وکھاندا اترائی ول نوں پچھے گیا تے فیر اوکھا ہو کے چڑھائی چڑھدیاں آ کے بڑے ٹوہر نال آکھیا ایہ لوؤ نقشا تے سٹو میرے پنجاہ روپئے بقایا ۔ بوٹے انجینئر گوہ نال نقشا ویکھیا تے اوہ شمالی علاقے دیاں جھیلاں دا نقشا سی ۔ ہن بلال دا مونہ ویکھن آلا سی جدوں ساریاں رل کے اوہدا توا لایا تے وچارا دوبارہ نسدا نسدا گیا پچھے باقر دیاں للکراں تے ببھلیاں سن تے اگے اگے بلال گھرکدا جاندا سی ۔ وچارے نوں دُبارا جا کے نواں نقشا لیاؤنا پیا ۔ بٹہ کنڈی توں اگے 12 کلومیٹر دے پندھ تے بڑاوائی دا مقام آیا ۔ ایہ اوہ مقام سی جتھے 2018 وچ پروفیسر ظہیر عباس ' رانا امتثال تے میں میں اکٹھے آئے ساں تے دریا کنہار دے کنارے اک ہوٹل وچ رات گزاری سی ۔ ایتھوں دا موسم تے بارش ' مٹر دی تازا فصل تے دریا کنہار دے پانیاں دی موسیقیت مینوں بڑی یاد آئی ۔ اس توں اگے جلکھڈ تے بیسل توں لنگھدیاں 11200 دی بلندی تے واقع جھیل لولو سر اپڑے ۔ ساڈے گروپ لیڈر محمد بوٹا دا اراداسی پئی اسیں بابو سر ٹاپ تے سٹاپ کریئے تے جھیل تے نہ رکیے ۔ پر جھیل نوں ویکھ کے میرا تے سجاد دا دل اگے جاون نوں نہ منیا تے اسیں دس پندرھاں منٹ لئی لولو سر جھیل دے سبز نیلے پانیاں دے نیڑے ہو کے جھیل نال دو چار گلاں کیتیاں ۔ جھیل دے سہن سنہپ سانوں اگے جاون توں روک دتا ۔ ایہ قدرتی جھیل اپنی فطری تازگی تے روحانی سرشاری پاروں سانوں کافی دیر کیلی رکھیا تے اسیں اس دے کنارے کھلوتے پہاڑاں وچ گھری اس جھیل دے منظر دا اک حصا جاپن لگ پئے ۔ اس جھیل کنارے پورا دن وی گزارن لئی تھوڑا جاپدا سی ۔ اس جھیل دے پانیاں وچ اترن نوں جی کردا سی پر اساں حالے ایہ سوہنی تے نویں نروئی دنیا ہور ویکھنی سی اس لئی دل نہ چاہندیاں ہوئیاں وی اس منظر نوں اپنے اندر سمیٹ کے اگے ٹر پیا ۔۔۔۔۔ ( چلدا )