نشے دی لعنت ___کالم ـــــ٭رویل٭

ایس گل وچ کوئی شک نہیں کہ صرف پاکستان ای نہیں ساری دنیاں وچ کرونا وایرس وبا نے تباہی مچا دتی اے۔ بہت سارے لوکاں دے کاروبار مُک گئے‘ نوکریاں نہیں رہیاں۔ بے روزگاری وچ تیزی نال وادھا ہویا اے۔ بس ایہدے پس پردا اسیں اِک ہور وڈی تباہی توں دوچار ہاں جہڑی اجے تیکر سانوں محسوس نہیں ہورہی پر آون والے کجھ مہینے یاں سال وچ ایہدے اثرات نظر آون گے‘ تے اوہ تباہی اے نشا۔

کرونا وایرس پاروں لوک بے روزگار ہوئے نیں تے ایہدے توں پیدا ہون والے بے روزگاری تے افراتفری ورگے مسائل توں چھٹکارا حاصل کرن دے دوجیاں ترقی یافتا قوماں ایہدے توڑ لبھ لئے نیں تے لبھ لینے نیں پر ساڈے ورگے پسمانداملکاں وچ رہن والی لوکائی نے ایہدا توڑ نشا لبھ لیا اے۔ کیوں کہ نشئی بندا زندگی دیاں تلخ حقیقتاں دا ساہمنا کرن دی جرت نہیں رکھدا تے اوہ ایہناں تلخیاں نوں برداشت کرن دی بجائے اپنا رُخ نشے وچ موڑ لیندا اے۔

میں اج تھوڑی توجا معاشرے دے ایسے ناسور ول کرانا چاہندا ہاں جہدے توں ساڈا جوان طبقا انج دے رشتیاں اُتے ٹُر پیا اے جہدی منزل صرف موت اے۔ اک اندازے مطابق پاکستان وچ 89 لکھ دے لگھ پگھ لوک نشے دے عادی نیں تے پاکستان وچ ہن ایہ گنتی بہت تیزی نال ودھ رہی اے۔ ایہناں وچ زیادا تر دی گنتی 13 توں 20سال دیاں منڈیاں دی اے۔ پاکستان وچ 75 فیصد منشیات افغانستان توں آوندی اے جہڑا کہ ساڈا گوانڈھی تے مسلمان ملک اے۔

پاکستان دا شمار اوہناں ملکاں وچ ہوندا اے جہدے وچ سبھ توں ودھ ہیروئن استعمال ہوندی اے۔ہر نشئی اپنے نشے دا کارن عشق معشوقی، گھر دے حالات، دوائیاں کھان دی زیادتی، کمزور مالی حالات تے یاراں بیلیاں دی محفل ٹھہراندا اے۔ پر ایہدا اصل کارن ایہ اے کہ نشا کرن والا بندا دنیا دیاں تلخ حقیقیاں دا ساہمنا کرن توں نسدا اے۔

جد کسے گھر پتر جمدا اے تے ماں پیو نوں بڑی خشی ہوندی اے۔ تے ماپے آپ نہ چنگا کھاندے تے نہ پاندے نیں سگوں ایس ہکھی وچ حیاتی لنگھا دیندے نیں کہ اوہناں دا پتر جوان ہو کے سارے دکھ تے مسائل مکا دیوے گا۔ پیو ساری زندگی سخت محنت کردا اے تاں جے میرا پتر وڈا افسر بنے پر جدوں پیو دنیا توں ٹر جاندا اے تے پتر نوں ازادی مل جاندی اے تے اوہ بھیڑے لوکاں وچ بیٹھنا کھلونا شروع کردیندا اے۔ پہلے تے اوہدے یار بیلی اوہنوں اپنے پلے توں نشا کرواندے نیں تے فیر جدوں اوہ عادی ہو جاندا اے تے اوہدے کولوں نشا کردے تے کراندے نیں۔

ماواں بڑیاں آساں اُمیداں نال اپنے پُتراں نوں جوان کردیاں نیں پئی اوہ لاٹھی دی عمر وچ لاٹھی دی تھاں اوہناں دا سہارا بنے گا۔ ماواں اک اک دن گِن گِن کے لنگھاندیاں نیں۔ پر جدوں اوہو لاٹھی نوں کُن لگ جاندا اے تے اوسے دن توں اوہناں ماواں دی عمر گھٹنا شروع ہوجاندی اے۔

زندگی اللہ دی نعمت اے نشا انسانی زندگی نوں انج کھا جاندا اے جویں لکڑی نوں کُن۔ نشئی دی زندگی معاشرے لئی عبرت دا نشان ہوندی اے۔ ناگھر وچ اوہدا کوئی مقام ہوندا اے تے معاشرے وچ کوئی حیثیت ہوندی اے۔ اوہ نہ تے چنگا پتر بن سکدا اے تے نہ چنگا گھروالا تے نہ چنگا پیو ثابت ہوندا اے۔ پاٹے لیڑے، پیراں توں ننگا تے سر وچ سواہ پان والا ایہ نشئی ساری زندگی نشے دی لت وچ جکڑیا رہندا اے۔

انگریزاں برصغیر وچ آ کے شراب دیاں فیکٹریاں لائیاں تاں جے ایہ قوم نوں نشے وچ را کے اپنی غلامی نوں بھل جاوے۔ ایہدے اُلٹ ساڈا مذہب سانوں نشے توں روکدا اے رب سوہنا قرآن مجید وچ فرماندا اے پئی:

”ایہ ایمان والیو! شراب تے جوا ایہ سبھ ناپاک کم شیطان دے اعمال نیں، ایہدے توں بچدے رہنا تاں جے نجات پاو۔“ (سورہ المائدہ۔آیت نمبر 90)

نشئی نوں گھروں کڈھنا، اوہدا ویاہ کردینا یاں اوہنوں مارنا کُٹنا مسئلے دا حل نہیں‘ سگوں اوہدے نال ہمدردی نال پیش آونا چاہیدا اے کیوں جے کوئی وی ماں دے ڈھڈ وچوں ای گندا نہیں جمدا سگوں دنیا وچ آکے ای اوہ مندا یاں چنگا بندا اے۔نشے دی روک تھام سانوں اپنے گھراں وچوں ای کرنی پوے گی جد پیو اپنے پُتر دے ساہمنے سگریٹ پیوے گا تے پُتر وی اپنے پیو دی نقل کرے گا۔ ساڈے تعلیمی نصاب وچ نشے دی روک تھام لئی اک پورا باب ہونا چاہیدا اے تے سکولاں، کالجاں وچ ایہدے نقصاناں بارے پڑھیایا جاوے تاں جے ساڈے پڑھیار نشے دی ایس لعنت توں بچ جان تے اپنے مستقبل نوں سنوارن وچ کامیاب ہون۔

میرا نشیاں چ ڈبیا پنجاب کیہ کراں

کوئی لبھدا نہیں حل جناب کیہ کراں

کِتے پھلاں وانگو گھڑنی سی جہڑی ایہ جوانی

اوہی پیا مرجھایا اے گلاب کیہ کراں

میرا نشیاں چ ڈبیا پنجاب کیہ کراں