پاکستان وچ اشرافیا دا قبضا سی، پہلی وار پُچھ گچھ دا ساہمنا ہو یا اے،افغان امن معاہدا اِک معجزا اے، جو وی فیصلا کراں گے اوہ قومی مفاد وچ کراں گے: وزیراعظم عمران خان ……٭رویل نیوز٭

اسلام آباد (رویل نیوز) وزیراعظم عمران خان نے کہیا اے کہ حکومت تے فوج وچ مکمل ساجھے داری اے‘ پالیسیاں نُوں ہتھیار بند فوجاں دی حمایت حاصل اے‘ ساڈیاں ساریاں پالیسیاں دا محور پسماندا طبقے دی ترقی اے‘ پاکستان افغانستان وچ امن دے استحکام دا حامی اے‘ افغان امن معاہدا اِک معجزا اے‘ پاکستان دے چین‘ امریکا تے سعودی عرب نال بہت چنگے تعلقات نیں‘ ساڈا معاشی مستقبل چین دے نال ا‘ پاکستان دی تواریخ وچ پہلی وار طاقتور تے اشرافیا طبقا احتساب دے دایرے وچ آئے نیں‘ کرپشن کسے وی سوسایٹی لئی تباہی دا کارن ہوندی اے‘ ا ج پاکستان وچ کوئی میگا کرپسن سکینڈل نہیں اے کیوں جے اعلا سطح اُتے ایہنوں کنٹرول کر لیا گیا اے۔ الجزیرا ٹی وی نُوں دِتے گئے انٹرویو وچ وزیراعظم دا کہنا سی کہ اسیں حکومت سانبھی تے کئی معاشی چیلنجز دا ساہمنا سی پر اسیں معاشی اصلاحات تے کاروبار وچ اسانی لئی اقدامات کیتے‘ قرض اُتے انحصار ہووے تے معیشت نہیں چلدی تے اسیں نہیں چاہندے کہ ملک قرض اُتے چلے‘ جہو جہے معاشی تے اقتصادی حالات پاکستان دے نیں ایس صورتحال وچ کوئی وی ملک صرف چٹکی وجا کے تبدیلی نہیں لیا سکدا‘ معیشت دی بحالی اِک رات وچ ممکن نہیں اے ایہد ے وچ ویلا لگدا اے‘ کیوں جے پہلے مائنڈ سیٹ دی تبدیلی ہووے گی ایہدے بعد اوہ تبدیلی درکار اے جس طرحاں حکومت کم کرنا چاہندی اے‘ وزیراعظم عمران خان نے کہیا کہ غیر ملکی معمولی داخلی تے خارجا کسارے دا ساہمنا اے‘ ملکی توانائی دا شعبا بحران نال دوچار اے‘ معیشت دی بحالی لئی جدوجہد جاری اے جدوں ملک نُوں صحیح سمت اُتے گامزن کرن دی نیت ہووے تے جدوجہد کرنی پیندی اے‘ میں نہیں چاہندا کہ میرا ملک اپنی بقا لئی ہمیشا قرض لوے‘ انتظامی ڈھانچے دی تبدیلی تے محصولات وچ وادھے لئی اصلاحات دی لوڑ پیندی اے‘ اسیں اپنے اخراجات وچ نمایاں کمی لیائے۔ اوہناں نے کہیا کہ سانوں کرونا دے نال لوکائی نُوں بھُکھ توں وی بچانا سی‘ اسیں اکھاں بند کر کے مکمل لاک ڈاؤن دی پالیسی اُتے عمل نہیں کیتا‘ اسیں کرونا نال نبڑن لئی سارے ممکنا اقدامات کیتے۔ وزیراعظم نے کہیا کہ اسیں جمہوری طریقے نال اقتدار وچ آئے تے ساریاں سیاسی جماعتاں نُوں کہیا کہ الیکشن وچ دھاندلی دی نشانکاری کرن کوئی اِک حلقا دَسن جہدے وچ دھاندلی ہوئی ہووے‘ ساڈی حکومت نے کھِرے متھے تنقید دا ساہمنا کیتا۔ اِک سوال دے جواب وچ اوہناں نے کہیا کہ بھارت وچ آر ایس ایس نظریے دی حکمرانی اے‘ کشمیر پاکستان تے بھارت وچکار متنازعا علاقا اے تے پچھلے سال بھارت نے ایہدے اُتے قبضا کیتا اے‘ بھارتی حکمران جماعت دے زیر تابع دہشتگرد تنظیم بھارت اُتے قابض اے‘ کشمیر دی خصوصی حیثیت ختم کر کے بھارت نے ایہدے اُتے قبضا کیتا ہویا اے‘ مقبوضا کشمیر اُتے بھارتی فوج دے قبضے دے پوری دنیا اُتے اثرات آن گے‘ اسیں چاہندے آں کہ او آئی سی ایس مسئلے نُوں چنگے طریقے نال چُکے‘ دنیا بھارت دی مارکیٹ نُوں ویکھدیاں ہویاں مسئلا کشمیر نُوں نظر انداز کر رہی اے پر اسیں ایس مسئلے نُوں اجاگر کردے رہواں گے۔ سعودی عرب دے نال پاکستان دے بہترین براددرانا تعلقات نیں۔ وزیراعظم نے کہیا کہ جدوں حکومت سانبھی تے بھارت ول دوستی دا ہتھ ودھایا‘ بدقسمتی نال بھارتی وزیراعظم نے امن دی پیشکش نُوں قبول نہیں کیتا‘ بھارت وچ انتہا پسنداں دی حکومت اے۔ 70 سال توں کشمیر بھارت تے پاکستان وچ متنازعا اے‘ مسئلا کشمیر دا حل فوجی طاقت نہیں اے پاکستان دے خلاف بھارت کجھ کرے تے اسیں چُپ نہیں رہ سکدے۔ اسرائیل دے نال تعلقات اُتے گل کردیاں ہویاں وزیراعظم عمران خان نے کہیا کہ کجھ ملکاں ولوں اسرائیل نُوں تسلیم کرن نال فلسطین دا مسئلا حل نہیں ہووے گا‘ فلسطین دے معاملے اُتے اِک پاسی فیصلیاں نال مسئلا حل نہیں ہووے گا‘ جدوں تک اسرائیل فلسطین نُوں وکھری ریاست نہ دیوے‘ مسئلا حل نہیں ہو سکدا‘ پاکستان ازاد فلسطین دی حمایت کردا اے تے ایسے مؤقف اُتے قایم اے۔ پاک چین تعلقات دے سوال اُتے گل کردیاں ہویاں اوہناں نے کہیا کہ ساڈامعاشی مستقبل چین دے نال اے‘ ہر ملک اپنے مفادات نُوں ویکھدا اے‘ چین نال پہلے دی نسبت بُہتے چنگے تعلقات نیں۔ اِک ہور سوال دے جواب وچ اوہناں نے کہیا کہ افغان مسئلے دے حوالے توں میرا مؤقف ایہو اے کہ فوجی طاقت حل نہیں پاکستان افغانستان وچ امن و استحکام دا حامی ا‘ مذاکرات تے افہام و تفہیم نال افغان مسئلے دا حل کڈھیا جا سکدا اے‘ افغانستان دی 19 سالا جنگ وچ بہت خون ریزی ہوئی۔ میں کہندا رہیا افغان مسئلے دا حل مذاکرات نیں‘ کئی عناصر افغان امن عمل نُوں متاثر کرنا چاہندے نیں‘ پاکستان افغانستان وچ امن دے استحکام دا حامی ا ے‘ افغان امن معاہدا اِک معجزا اے‘ بھارت افغانستان وچ معاملات وچ مداخلت کردا اے‘ 7 گنا وڈا ملک گوانڈھیاں دے معاملات وچ مداخلت کرے تے مسئلے ہوندے نیں۔ ملکی صورتحال اُتے گل کردیاں ہویاں عمران خان دا کہنا سی کہ پاکستان وچ ایلیٹ دا قبضا سی جتھے امیر امیر تر ہو رہے سن پر اسیں پالیسیاں تبدیل کیتیاں ساڈیاں ساریاں پالیسیاں دا محور پسماندا طبقے دی ترقی اے‘ اگلے سال توں ملک وچ اِک نصاب تعلیم نافذ ہووے گا‘ پاکستان لئی جو وی فیصلا کراں گے اوہ قومی مفاد وچ کراں گے‘ پہلی وار پاکستان نُوں اشرافیا دے چنگل توں ازا د کر رہے آں‘ پہلی وار فیصلے غریب تے متوسط طبقے نُوں ویکھ کے کر رہے آں‘ پہلی وار پاکستان وچ لوکائی نُوں ہیلتھ انشورنس دِتی جا رہی اے۔ میڈیا دے حوالے توں کیتے گئے سوال دا جواب دیندیاں ہویاں وزیراعظم عمران خان نے کہیا کہ پاکستان وچ میڈیا اُتے کوئی قدغن نہیں تے ساڈی حکومت اظہار رائے دی ازادی اُتے یقین رکھدی اے‘ میرے دور حکومت وچ سبھ توں ودھ تنقید ہوئی‘ ساڈی حکومت نے کھرے متھے تنقید دا ساہمنا کیتا‘ اِک صحافی 2 توں 3 گھنٹے غایب رہیا اوہدی تحقیقات ہو رہی اے۔ اِک سوال دے جواب وچ اوہناں نے کہیا کہ حکومت تے فوج وچکار مکمل ہم آہنگی اے۔ سول تے عسکری قیادت وچکار بہترین تعلقات نیں تے رَل کے کم کر رہے آں۔