پاکستان دی تواریخ وچ سبھ توں گھٹ ٹیرف اُتے سولر پراجیکٹ، زینفا (Zhenfa) پاکستان نیو انرجی کمپنی دا معاہدا……٭رویل نیوز٭

پاکستان دی تواریخ وچ سبھ توں گھٹ ٹیرف اُتے سولر پراجیکٹ، زینفا (Zhenfa) پاکستان نیو انرجی کمپنی دا معاہدا……٭رویل نیوز٭ لاہور (نمایندا رویل) بزدار سرکار نے اِک ہور تواریخ ساز میل پتھر پار کر لیا۔ ضلع لیہ دے علااے چوبارا وچ 100 میگا واٹ دا سولر پراجیکٹ لایا جاوے گا جہدے نال ملکی تواریخ دے سبھ توں گھٹ ترین ٹیرف 3.7 سینٹ اُتے بجلی حاصل کیتی جاوے گی۔ ایس منصوبے اُتے 10 ارب رُپئے دی سرمایا کاری ہووے گی۔ وزیر اعلا آفس وچ محکما توانائی پنجاب دے پنجاب پاور ڈویلپمنٹ بورڈ‘ متبادل توانائی ترقی بورڈ تے زینفا (Zhenfa) پاکستان نیو انرجی کمپنی دے وچکار معاہدے اُتے دستخط دی تقریب منعقد ہوئی۔ وزیر اعلا پنجاب سردار عثمان بزدار تے وفاقی وزیر توانائی عمر ایوب خان اُچیچے پروہنے سن۔ پنجاب پاور ڈویلپمنٹ بورڈ دے مینجنگ ڈائریکٹر‘ متبادل توانائی ترقی دے چیف ایگزیکٹو افسر تے زینفا پاکستان نیو انرجی کمپنی دے چیف ایگزیکٹو افسر نے لیٹر آف سپورٹ اُتے دستخط کیتے۔ تقریب نال خطاب کردیاں ہویاں وزیر اعلا عثمان بزدار نے کہیا اے کہ انرجی نال نہ صرف عام شہری مستفید ہوندے نیں سگوں صنعتاں دا پہیا وی چلدا اے۔ پنجاب وچ ابادی تے ترقی پذیر معیشت دی تجوا توں توانائی دیاں لوڑاں باقی صوبیاں دی نسبت بُہتیاں اے۔ پنجاب سرکار آئین پاکستان دے تحت توانائی دیاں ساریاں لوڑاں اپنے وسایل توں حاصل کرن لئی کوشاں اے۔ بجلی دی ملکی پیداوار دا تقریبن 70 فیصد پنجاب وچ استعمال ہوندا اے۔ بجلی توں حاصل ہون والی پورے ملک دی کل آمدنی دا 82 فیصد ریونیو پنجاب ادا کردا اے۔ وزیر اعلا نے کہیا کہ ماضی دے اُلٹ ساڈی حکومت سستی بجلی دے دیر پا وسیلے دے حصول ول گامزن اے۔ پچھلی حکومت نے انرجی دے مہنگے منصوبے لائے جہدے نال لوکائی اُتے بھار پیا۔ اوہناں نے دَسیا کہ پنجاب وچ سکولاں‘ کالجاں تے یونیورسٹیاں‘ بنیادی مراکز صحت سنے ہور سرکاری عمارتاں نُوں مرحلا وار شمسی توانائی اُتے منتقل کیتا جاوے گا۔ پنجاب دے 950 بنیادی مراکز صحت نُوں سولر انرجی اُتے منتقل کرن دے منصوبے اُتے کم جاری اے۔Punjab Energy Efficiency and Conservation Agency محکما انرجی دے اہتمام ہیٹھ لاہور دی یونیورسٹی آف انجینئرنگ اینڈ ٹیکنالوجی تے ہور سرکاری اداریاں دی سولر آئزیشن لئی ٹیکنیکل ایڈوائس فراہم کر رہیا اے۔ پنجاب وچ توانائی دی بچت لئیEnergy Conservation Building Codes مرتب کر چکے آں تے ایہناں اُتے عملدرآمد کر کے پنجاب سرکار ارباں رُپئے دی بچت دی پالیسی اُتے عمل پیرا اے۔ انڈسٹریل سٹیٹس‘ واساز‘ اورنج لاین ٹرین ورگے منصوبیاں نُوں وی توانائی دے متبادل وسیلیاں اُتے منتقل کرن دی تجویز دا جایزا لیا جا رہیا اے۔ عثمان بزدار نے کہیا کہ انرجی سیکٹر وچ سرمایا کاری دے بے شمار موقع موجود نیں۔ حکومت سرمایا کاراں دی بھرویں مددکر رہی۔ توانائی معاہدیاں اُتے عملدرآمد نُوں گھٹ توں گھٹ ویلے وچ یقینی بنان لئی میکنزم بنایا اے۔ زینفا پاکستان نیو انرجی کمپنی دے نال اج ہون والا معاہدا ایسے سلسلے دی کڑی اے۔وزیر اعلا نے دَسیا کہ پنجاب سرکار ایس منصوبے وچ صرف 3.7 سینٹ دے نرخ اُتے بجلی خریدے گی تے ایس منصوبے نال نیشنل گریڈ نُوں 17 کروڑ 30 لکھ یونٹ بجلی فراہم کیتی جاوے گی‘ ایہ بجلی تقریبن 70 ہزار گھراں دیاں لوڑاں نُوں پورا کرن لئی کافی ہووے گی۔ پنجاب وچ ویسٹ ٹو انرجی پراجیکٹ دا وی جایزا لے رہے آں جہڑا متبادل توانائی دے حصول دا بہترین وسیلا ثابت ہووے گا۔ وفاقی وزیر توانائی عمر ایوب خان نے پنجاب سرکار دے اقدام نُوں سلاہندیاں ہویاں کہیا کہ پاکستان دی تواریخ وچ سبھ توں گھٹ ٹیرف اُتے سولر پراجیکٹ دا معاہدا کیتا اے جہدے اُتے وزیر اعلا عثمان بزدار تے اوہناں دی ٹیم نُوں مبارکاباد دیندا آں۔ پچھلیاں حکومتاں نے تیل تے گیس نال بجلی دے مہنگے منصوبے لائے۔ اسیں سستے وسیلیاں نال بجلی دی پیداوار وچ وادھا کر رہے آں۔ پچھلے دور وچ ناقص پلاننگ کیتی گئی۔ نیٹ میٹرنگ نُوں سنگل فیز اُتے لیاواں گے‘ اسیں ٹرانسمیشن لاین دے نظام نُوں بہتر بنایا اے تے اج ٹرانسمیشن لاین 24 ہزار میگا واٹ بجلی ترسیل کرن دی استعداد رکھدی اے۔