kraamaat@gmail.com
+ +92 333-430-6384


یوگنڈا دی اِک داستان ـ " خرگوش تے مگرمچھ" ــ----٭ رویل بال ادب٭


خاص لیکھ September 04, 2020


یوگنڈا دی اِک داستانــ ــ " خرگوش تے مگرمچھ" ــ----٭ رویل بال ادب٭

اِک دیہاڑ خرگوش اپنی بھین نوں ملن گیاجہنے اِک مگرمچھ نال ویاہ کیتا ہویا اےاَ تے اوہ اِ ک ٹاپو تے دوجیاں مگرمچھاں دے نال رہندے نیں، جس ٹاپو دے وچکار اک جھیل وی اے۔اوتھے بہت سارے وڈے وڈے مگرمچھ اوہناں دے انگ ساک سن ایس طرحاں نِکے مگر مچھاں نال اوہناں دا کوئی نہ کوئی ساکا داری نکل آندی سی۔جس پاسے وی تُسیں ویکھو اوتھے مگرمچھ ای مگرمچھ وکھالی دیندے سن۔خرگوش تے کدے سُفنے وچ وی اوتھے جاون دا نہ سوچدا جے اوتھے اوہدی بھین نہ ویاہی ہوندی ۔انج ہو چُکیا سی تے اوہ خُد نوں مکمل محفوظ سمجھ رہیا سی۔

تے اوہ محفوظ سی۔ سوائے اک گل توں ،اوہناں نے اوس نال چنگا ویلا لنگھایا۔خرگوش نوں آنڈے کھاون دا شوق سی ۔اک دن اوس نے اک مگرمچھ نوں اپنی بیوی دے آنڈیاں نوں اناج کوٹھی وچ لکوندیاں ویکھ لیا۔ایہ اوہ ای تھاں سی جتھے اوہ اناج تے ہور کھاون دیاں شیواں نوں سانبھ لیندے سن۔ایسے ای دی اِک نُکڑ تے مگر مچھ نے خرگوش توں اکھ بچا کے ساریاں آنڈیاں نوں سانبھ دِتا تے جدوں خرگوش نوں ایس دی جانکاری ملی تاں اوہدے مونہ وچ پانی آ گیا۔

اگلے دیہاڑ مگر مچھ تے اوہدی گھر والی تیراکی لئی گئے تے خرگوش گھرے ای رہیا۔اوس کہیا کہ اوہدے سر وچ پِیڑ اے تے اوہ خموشی نال ارام کرنا چاہندا اے۔جس لمحے اوس ویکھیا اوہ جا چُکے نیں تاں اوہ کالھی نال اناج کوٹھی جا وڑیا تے آنڈے لبھ لئے۔اوہ آنڈے پِیلے رنگ دے وڈے وڈے تے بہت ای سوادی سن۔اوس نے بڑے دھیان نال مونہ پونجھیا تے فیر آپنی بھین تے مگر مچھ دی راہ اُڈیکن لگا۔

جدوں اوہ آئے تاں خرگوش کہن لگا'افف مینوں تاں بہت ای بھُکھ لگی ہوئی اے۔ایس لئی اوہدی بھین نے اوہدے واسطے کجھ رِنھیا تے جدوں خرگوش دے ساہمنے لیاندا گیا تاں خرگوش نوں لگیا اوہ تاں کُجھ کھا ای نہیں سکدا۔اوہدا معدا تاں آنڈیاں نال بھریا پیا سی۔اوہ چھیتی ای سوں گیا تے سویرے جدوں اُٹھیا تاں اوہنوں کُجھ سکون سی۔اوہدی بھین تے مگر مچھ فیر تیراکی واسطے چلے گئے۔خرگوش فیر تھوڑا ارام کرن دا بہانا کر کے گھر ای رُک گیا۔اوہ فیر اناج کوٹھی گیا تے آنڈیاں دی دعوت اُڑائی۔

اخیر تے صرف اِک ای آنڈا بچ گیا۔

خرگوش نے سوچیا کہ ہُن اوس نوں اپنے سیر سپاٹے نوں مُکا دینا چاہیدا اے۔ایس لئی اوس رات اوہنے مگرمچھ نوں کہیا"میں سوچ رہیاں مینوں کل گھر چلے جانا چاہیدا۔ایتھے رہنا مینوں چنگا تے بہت لگدا اے پر گھر وی بہت سارے کم کرنے نیں۔مینوں پک اے تُسیں میرے مسئلے نوں سمجھو گے"مگر مچھ نے وی ہاں وچ سر ہلایا تے اوس دے ایتھے گُزارے ہوئے ویلے دی تعریف کیتی۔

سویر نوں اوہ جدوں جاون لئی تیار ہویا تاں مگرمچھ نے اوس نوں پانی والا علاقا اپنے اُتے بٹھا کے پار کروانا سی،فیر جدوں مگر مچھ نے کہیا"جاون توں پہلاں مینوں آنڈیاں دی گنتی کرنی چاہیدی اے کیوں جے سال دے ایس ویلے میں ہمیشا ای آنڈیاں دی گنتی کردا ہاں۔"

"اوہ ہ ہ آنڈے"خرگوش بولیا"کیہ تہاڈے آنڈے نیں؟مینوں تے کدے پتا ای نہیں چل سکیا کہ تہاڈے کول آنڈے نیں۔آنڈے آہ ہ؟تُسیں کتھے رکھدے اوہ آنڈیا ں نوں؟"اوہ کافی پریشان دکھائی دین لگا۔

"اوہ اناج کوٹھی وچ رکھے نیں"مگرمچھ دسن لگا"کیہ تُوں دِھیان وی نہیں دِتا؟"

"دھیان دِتا ۔۔۔۔"خرگوش بولن لگا"نہیں نہیں میرے تے ذہن وچ ای نہیں آیا انج دا خیال وی کدی۔کِنے سن؟"

"پورے ستـر نیں"مگرمچھ نے دسیا۔

"میں وی اوہناں نوں واچنا چاہواں گا۔"خرگوش کہن لگا۔

"ٹھیک اے "مگرمچھ کہن لگا"جے تیرا دِل کرے تے میرے واسطے اوہناں دی گنتی وی کر لویں"

"مینوں ایس نال کیہ خُشی ہونی"خرگوش بولن لگا(اوہدا کہن دا ایہ ای مطلب سی)۔اوہ اناج کوٹھی گیا تے فیر اوس نُکرے جتھے آنڈے رکھے ہوئے سن۔"واہ"اوہ چِیکیا"کِنے کمال دے آنڈے نیں۔کِنے وڈے وڈے پِیلے آنڈے۔میں کہیا،مینوں گِنتی کر کے سواد آئے گا"

اوس نے آخری بچیا آنڈا چُکیا تے مگرمچھ نوں وکھایا۔ایس توں مگروں خرگوش نے آنڈے گننا شروع کیتے۔"اِک" اوس نے کہیا تے آنڈے چُکن لئی پیندے ول نوں جھُکیا۔اوس نے فیر آنڈا چُکیا تے تاں جو مگر مچھ اوس نوں ویکھ سکے تے فیر بولیا "دو"فیر اوہ پیندے ول نوں جھُکیا تے کہیا "تِن" تے فیر ایس توں اگانہ گنتی جاری ہو جاندی"۔۔۔۔۔پندرھاں،سولھاں۔۔۔۔۔۔۔"اوہ بولی جا رہیاسی۔کدے کدار اوہ تھلے اِک منٹ نوں جھُکدا جویں کدھروں دُوروں چُک کے لیا رہیا ہوئے۔"۔۔۔۔اِکتی،بَتّی۔۔۔۔۔"اوہ کہہ رہیا سی۔اوڑک اوہ ایس گنتی تیکر اَپڑیا"۔۔۔۔۔اُنہتر،ستّر"

"پورے ستّر"اوہ پُکاریا۔

"ہاں،میں تینوں دسیا سی نا کہ ساڈے کول پورے ستّر آنڈے نیں،"مگرمچھ بولیا"ٹھیک گنتی ہو گئی ۔ایہ سارے آنڈے محفوظ نیں"ایس توں مگروں اوس خرگوش نے بھین نوں گُڈ بائے کہیا تےا وہ جھیل ول نوں ٹُر پئے۔جدوں اوہ پانی دے نیڑے اَپڑے تاں خرگوش ،مگرمچھ دی کنڈھ اُتے چڑھ گیا تے مگر مچھ اودھر نوں تیرن لگا جدھر خرگوش وسدا سی۔

حالے اوہناں نوں گیاں نوں بُہتا چِر نہیں سی ہویا کہ مگرمچھ دی گھر والی اناج گھر گئی تاں جو اوتھے پئے آنڈیاں نوں ویکھ سکے کہ سبھ اوتھے ای نیں۔اوس نے ٹوکرے تے چڑھ کے ویکھیا۔اوتھے تاں صرف اِک ای آنڈا بچیا پیا سی۔اوہ نس کے جھیل دے کنارے اَپڑی۔ادھے راہ وچ ای اوس نوں مگرمچھ دے تیرن دی چھڑ چھڑ دی واج آن لگی۔اوس نے پورے زور نال واج ماری۔"مگر مچھ،مگر مچھ خرگوش سارے آنڈے کھا پی گیا اے۔سارے مُکن گئے نیں صرف اِک ای باقی پیا اے۔اوس نوں جھیل وچ ای سُٹ دیوے۔"

" کیہ میری گھر والی واجاں مار رہی اے؟"خرگوش نے پُچھیا،"تیز ہوا دے کارن کجھ سُنائی نہیں دے رہیا۔"

"مینوں اوس دی واج صاف سُنائی دے رہی اے"خرگوش بولیا۔

"فیر دس ،اوہ کیہ کہہ رہی اے،دس؟"

"اوہ کہہ رہی اے کہ تُسیں چاہو تاں ایس توں وی تیز تَیر سکدے او کیوں جے ساڈے پچھے تیز ہوا اے"

"او ،اچھا"مگرمچھ نے دسیا"میں ہُن ہور تیز تَیردا تاں جو میرے مِتر تُوں چھیتی ای گھر اَپڑ جاویں "

اوس نے انجے ای کیتا تے خرگوش چھیتی ای اپنے گھر اپڑ گیا۔ اوس نے گڈ بائے کہیا تے مگر مچھ اپنے گھر نوں روانا ہو یا۔

پر میں تہانوں دس دیاں کہ خرگوش نے کدے نہیں سوچیا سی کہ اوس گھر اِک دن توں ودھ رُکیا جاوے۔کسے کارن،اوہ کدھرے بہت ای دُور چلا گیا تے جدوں لوک اوس نوں پُچھدے کہ اوس دی بھین دا ویاہ مگر مچھ نال ہویا اے کہ نہیں تے اوہ ایس طرحاں دا ویہار کردا جویں اوہ بہرا ہوئے تے جو اوہ بول رہے ہوون اوس نوں سُنائی ای نہ دے رہیا ہوئے۔

٭٭٭٭٭