نواز شریف ولوں سرنڈر کرن دا حکم واپس لین دی اپیل،صحت یاب ہون اُتے پہلی فرصت وچ واپس آواں گا ۰۰۰۰۰٭رویل نیوز٭

اسلام آباد (نیوز ڈیسک) پچھلے وزیراعظم نواز شریف نے العزیزیا ریفرنس وچ عدالت ولوں جاری کیتے گئے حکم اُتے نظرثانی دی درخاست دایر کر دِتی۔ درخاست وچ مؤقف اختیار کیتا گیا کہ میرا ایس ویلے پاکستان آنا ممکن نہیں‘ عدالت میرے سرنڈر کرن دا حکم واپس لوے۔ درخاست وچ ہور کہیا گیا کہ بیان حلفی وچ طے پایا سی کہ حکومت پہلے اپنے طور اُتے میری صحت دا پتا کرے گی‘ وفاقی حکومت نے ایس بارے زرا برابر وی کوشش نہیں کیتی۔ وفاقی حکومت دے کول میری صحت بارے کوئی مستند معلومات نہیں نیں۔ ڈاکٹراں نے حالے ایہو جہیا کوئی سرٹیفکیٹ نہیں دِتا کہ واپسی دا سفر کرن لئی فٹ آں۔ نواز شریف نے درخاست نال میڈیکل رپورٹاں وی جوڑ دِتیاں نیں۔درخاست وچ ہور کہیا گیا اے کہ صحت یاب ہون دے بعد پہلی فرصت وچ پاکستان آواں گا تے سارے جھوٹھے کیساں دا ساہمنا کراں گا۔ www.rvel.org