وزیراعظم نے معصوم بچیاں تے سوانیاں نال زیادتی دے واقعات روکن لئی  قانون بناون دی ہدایت کر دتی ……٭رویل نیوز٭

اسلام آباد (نمایندا رویل) وزیراعظم عمران خان دا معصوم بچی تے سوانی نال زیادتی دے مختلف وقعات دا سخت نوٹس لے لیا تے متعلقا آئی جی صاحبان توں ایہناں واقعات دیاں رپورٹاں منگ لئیاں اے۔ جاری بیان مطابق وزیراعظم عمران خان نے کہیا اے کہ سوانیاں دا تحفظ حکومت دی پہلی ترجیح تے ذمے داری اے۔ کسے مہذب معاشرے وچ ایہو جہی درندگی تے حیوانیت دی اجازت نہیں دِتی جا سکدی۔ ایہو جہے واقعات ساڈیاں سماجی قدراں دے منافی تے سوسایٹی اُتے بدنما داغ نیں۔ وزیراعظم نے واقع وچ ملوث بندیاں نُوں چھیتی توں چھیتی قانون دی گرفت وچ لیان تے قرار واقعی سزا دلوان دا حکم جاری کیتا اے۔ وزیراعظم نے معصوم بچیاں تے سوانیاں نال زیادتی دے واقعات دے تدارک دے حوالے توں قوانین نُوں ہور مؤثر بنان لئی اقدامات کرن دی ہدایت کیتی اے۔ ایس توں وکھ سینیٹ دی انسانی حقاں دی کمیٹی نے سوانی نال موٹروے اُتے پیش آن والے واقع اُتے آئی جی پنجاب نُوں سَد لیا اے۔ سینیٹ کمیٹی نے آئی جی پنجاب تے وزارت مواصلات نُوں نوٹس جاری کر دِتا۔ نوٹس وچ کہیا گیا اے کہ سوانی ولوں موٹروے پولیس نُوں کیتی گئی فون کال اُتے ایکشن کیوں نہیں لیا گیا۔ آئی جی پنجاب تے سیکرٹری مواصلات واقع بارے بریفنگ دین۔ دوجے پاسے سی سی پی او لاہور عمر شیخ نے کہیا اے کہ رنگ روڈ زیادتی کیس وچ 15 مشتبا بندے حراست ہیٹھ نیں‘ 48 گھنٹیاں وچ ملزماں تک پہنچ جاواں گے۔ نجی ٹی وی نال گل کردیاں ہویاں سی سی پی او لاہور عمر شیخ دا کہنا سی کہ سوانی رات ساڈھے 12 وجے گوجرانوالا جان لئی نکلی‘ سوانی نُوں گھر توں نکلن ویلے گھٹ توں گھٹ گڈی وچ پٹرول چیک کرنا چاہیدا سی‘ سوانی نے 15 اُتے کال کرن دی بجائے اپنے بھرا نُوں فون کر کے اطلاع دِتی‘ سوانی دے بھرا نے 130 اُتے موٹروے پولیس نُوں فون کر کے کہیا کہ اپنی موبایل گھلو۔ سی سی پی او لاہور دا کہنا سی جہڑی تھاں ایہ واقع ہویا اوتھے 5 کلو میٹر دے علاقے وچ 3 پنڈ نیں‘ ملزماں دے گڈی دا شیشا توڑن نال خون نکلیا جہدی وجھا توں ساڈے کول خون دا نمونا موجود اے‘ تحقیقات وچ رورل تے اربن پولیس دی جدید تکنیک دا استعمال کیتا جا رہیا اے‘ اطلاع ملدیاں ای تحقیقات دا اغاز کر دِتا سی جد کہ انسپکٹر جنرل پنجاب پولیس انعام غنی نے دعوا کیتا اے کہ موٹروے زیادتی کیس وچ ملزماں تک پہنچن لئی ثبوت مل گیا اے۔ موٹروے اُتے پیش آن والے واقع دے کیس وچ ہُن تک بہت چنگا کم ہویا اے‘ اسیں پنڈ تک پہنچ چکے آں جہدے نال ملزماں دا تعلق اے۔ آئی جی پنجاب پولیس نے کہیا کہ 20 ٹیماں ایہدے اُتے کم کر رہیاں نیں تے ایس انویسٹی گیشن نُوں ڈی آئی جی آپ ویکھ رہے نیں‘ ملزمان چھیتی توں چھیتی گرفتار ہون گے۔ انعام غنی دا کہنا سی کہ سوانی نے ملزماں دی عمر تے کجھ شناخت وی ظاہر کیتی اے‘ ایس ویلے اِک بہت چنگا سراغ ملیا اے جہڑا سدھا ملزماں تک پہنچائے گا پر حالے ایہنوں میڈیا اُتے نہیں دَسیا جا سکدا۔ آئی جی پنجاب نے دَسیا کہ پورے علاقے دی ووٹر لسٹ تے نادرا دا ریکارڈ لے لیا اے‘ ملزماں دی ایج بریکٹ دے لوکاں نُوں شناخت کیتا اے تے 70 ایہو جہے لوک نیں جہناں دا پہلے توں کرمنل ریکارڈ اے‘ اسیں ایہناں ساریاں نُوں چیک کر رہے آں تے جیو فینسنگ وی کروائی اے جہدی رپورٹ دا انتظار اے۔اوہناں نے کہیا کہ جے موٹروے یاں ایہدے کول کوئی واقع ہوندا اے اسیں ذمے دار آں‘ اسیں آپ ملزماں تک پہنچاں گے‘ جے ایس کیس وچ حالے غلطی لبھاں گے تے ملزمان بچ جان گے۔ ایس لئی ظلم کرن والے ظالماں تک پہنچنا ایس ویلے ساڈی ترجیح اے۔ آئی جی پنجاب دا کہنا سی کہ متاثرا سونی دے بچے گھروالیاں دے نال نیں‘ کوشش اے متاثرین نُوں جنی سپورٹ دے سکیے۔