آئی ایم ایف ولوں اِک واری فیر گیس تے بجلی دیاں قیمتاں ودھان دی منگ ……٭رویل نیوز٭

اسلام آباد (نیوز ڈیسک) عالمی مالیاتی ادارے (آئی ایم ایف) نے پاکستان توں اِک واری فیر گیس تے بجلی دیاں قیمتاں ودھان دا مطالبا کیتا اے۔ آئی ایم ایف تے پاکستان وچکار رابطا ہویا اے جہدے وچ عالمی مالیاتی ادارے نے پاکستان توں اِک واری فیر ڈور مور دا مطالبا کردیاں ہویاں پاکستان اُتے بجلی تے گیس دیاں قیمتاں ودھان لئی زور دِتا اے۔ وسیلیاں دا کہنا اے کہ آئی ایم ایف نے گردشی قرضے گھٹ کرن لئی اقدامات اُتے زور دِتا اے۔ ایہدے علاوا بجلی دے نقصانات گھٹ کرن لئی وی اقدامات اُتے زور دِتا اے۔ آئی ایم ایف نے کہیا اے کہ نیپرا تے اوگرا نُوں نرخاں دے بارے وچ فیصلیاں لئی ودھ توں ودھ خُد مختاری دِتی جاوے۔ ایس توں وکھ آئی ایم ایف ولوں معاشی تے ٹیکس اصلاحات اُتے عملدرآمد یقینی بنان اُتے وی زور دِتا گیا اے جد کہ جولائی توں ستمبر دی تماہی دے ٹیکس دا ہدف ہر صورت حاصل کرن دا کہیا گیا اے۔ آئی ایم ایف نے جولائی توں ستمبر دی تماہی وچ 1 ہزار ارب توں ودھ ٹیکس جمع کرن دا مطالبا کیتا اے۔