نیب بد نیت ادارا اے،نواز شریف دی طبیعت ٹھیک نہیں‘ قانون ا انسانی تقاضیاں نُوں اُچیچ دیندا اے:شاہد خاقان عباسی ……٭رویل نیوز٭

لاہور (نیوز ڈیسک) مسلم لیگ ن دے آگو شاہد خاقان عباسی دا کہنا اے کہ نیب بد نیت ادارا اے جہدی حقیقت ہر پاکستانی جاندا اے‘ نیب دے سارے کیسز اپوزیشن اُتے نیں۔ پچھلے وزیراعظم شاہد خاقان عباسی نے میڈیا نال گلبات کردیاں ہویاں کہیا کہ ہائیکورٹ وچ اپیل نال نواز شریف دی حاضری اُتے کوئی اثر نہیں پوے گا‘ اسلام آباد ہائیکورٹ وچ کیس اُتے گل کرنا مناسب نہیں۔ اوہناں نے دَسیا کہ ہائیکورٹ وچ میڈیکل رپورٹ دِتی اے کہ نواز شریف دا علاج حالے مکمل نہیں ہویا‘ نواز شریف علاج دے مقصد نال باہر گئے‘ مکمل صحت مند ہون اُتے ای واپس آن گے۔ شاہد خاقان عباسی نے کہیا کہ وفاقی حکومت دی ذمے داری سی کہ نواز شریف دیاں مصدقا رپورٹاں دیندی‘ اوہناں نے نہیں دِتیاں۔ نیب نے عدالت وچ کہیا کہ سانوں پتا نہیں نواز شریف کتھے نیں۔ اوہناں نے کہیا کہ نیب بدنیت ادارا اے‘ نواز شریف دی اپیل دا عمل اوہناں دی غیر موجودگی وچ وی چلدا رہوے گا‘ اج شہباز شریف نیب دے ساہمنے پیش ہوئے‘ اوہناں دی دھی تے گھروای اُتے وی نیب نے کیس بنایا۔ پچھلے وزیراعظم نے کہیا کہ نیب تے عمران خان پوری کوشش کر لئی‘ اِک دھیلے دی کرپشن ثابت نہیں کر سکے‘ نیب نُوں صرف اپوزیشن‘ صرف نوا ز شریف نظر آندا اے‘ نیب صرف انتقامی کارروائیاں کر رہیا اے جو سانوں نَپ نہیں سکدیاں۔ اوہناں نے کہیا کہ حکومت آپ دعوا کردی اے کہ اسیں لوکاں نُوں گرفتار کردے تے باہر کڈھدے آں‘ جے لوکائی تکلیف وچ اے تے لوکائی ضرور سڑکاں اُتے آئے گی۔ شاہد خاقان عباسی نے کہیا کہ چودھری نثار حالے جماعت دا حصا نہیں جے بن گئے تے ضرور اے پی سی دا حصا بن سکدے نیں۔ اوہناں نے دَسیا کہ نواز شریف دے وکیلاں نے 2 تفصیلی میڈیکل رپورٹاں جمع کروائیاں نیں‘ نواز شریف دی طبیعت ٹھیک نہیں اے‘ قانون ہمیشا انسانی تقاضیاں نُوں فوقیت دیندا اے۔ شاہد خاقان عباسی نے کہیا کہ نیب جاندا اے نواز شریف علاج دی غرض نال باہر نیں‘ نیب اوہ ادارا اے جہدا وجود ای بدنیتی اُتے اے‘ نواز شریف دی اپیل دا سلسلا اوہناں دی غیر موجودگی وچ چل سکدا اے۔ اوہناں نے کہیا کہ نیب دی حقیقت ہر کوئی جاندا اے‘ جہڑی جماعت 10 سال تک اقتدر وچ رہی ہووے اوہد ے اُتے اِک پیسے دی کرپشن دا کیس نہیں بن سکیا‘ کہڑی وزارت اے جتھے کرپشن نہیں ہوندی‘ نیب نُوں ایہ نظر نہیں آندا‘ نیب نُوں بس اپوزیشن تے نواز شریف نظر آندا اے‘ حکومت ناکام ہو چکی اے۔ اوہناں نے ایہ وی کہیا کہ اِک پیسے دی کرپشن ساڈے اُتے ثابت نہیں ہو سکی‘ اج نیب نُوں جدوں کجھ ملیا نہیں تے سفید جھوٹھ بول رہے نیں۔