کرونا وایرس دے خطریاں نُوں گھٹ کر کے پیش کیتا: ٹرمپ ……٭رویل نیوز٭

واشنگٹن (نمایندا رویل) امریکی صدر ڈونلڈ ٹرمپ نے اعتراف کیتا اے کہ اوہناں نے کرونا دی ابتداء وچ وایرس دے خطرے دی سنجیدگی نُوں گھٹ کرن دی کوشش کیتی۔ اوہناں نے ایہ گل امریکی صحافی باب وڈورڈ نُوں دِتے گئے اِک انٹرویو وچ کہی۔ انٹرویو وچ ٹرمپ نے ایہ واضح کر دِتا کہ اوہناں نُوں شر وع وچ ای سمجھ آ گئی سی کہ وایرس خطرناک ہووے گا‘ عام فلو توں کدھرے ودھ خطرناک پر 2020 دے اوائل وچ لوکاں دے ساہمنے اوہناں نے ایہ وار وار کہیا اے کہ وایرس خطرناک نہیں تے آپ غایب ہو جاوے گا۔ اوہناں نے باب وڈورڈ نُوں دَسیا کہ وایر س ہوا راہیں جاندا اے تے آن والے ہفتیاں تے مہینیاں وچ ماسک پان والے بندیاں دا مذاق اُڈایا۔ اوہناں دا کہنا سی کہ اوہ ہُن وی ایہدی سنجیدگی گھٹ ظاہر کرنا چاہندے نیں کیوں جے اوہ ایس بارے وچ ہلچل نہیں کھلارنا چاہندے‘ اوہ نہیں چاہندے سن کہ لوک ڈرن‘ میں ایس ملک یاں دنیا نُوں ہلچل وچ نہیں پاواں گا۔